Ibuot 91

Ke Ini Ẹnamde Lazarus Eset

JESUS, ọkọrọ ye mbon oro ẹtienede enye, idahaemi ẹsịm udi Lazarus. Ke akpanikọ, enye edi aba-itiat emi ẹberide itiat ke inua esie. Jesus ọnọ uyo ete, “Ẹkpat itiat ẹsio.”

Martha afan̄a, sia se Jesus aduakde ndinam mîn̄wan̄ake enye kan̄a. Enye ọdọhọ ete, “Ọbọn̄, kemi okpo ke etebe, koro enye akakpa osịm usen inan̄.”

Edi Jesus obụp ete: “Nte n̄kọdọhọke fi nte, edieke onịmde ke akpanikọ, eyekụt ubọn̄ Abasi?”

Ntre ẹkpat itiat ẹsio. Ndien Jesus emenede enyịn esie ke enyọn̄ onyụn̄ ọbọn̄ akam ete: “Ete, mmọkọm Fi koro Afo okokopde uyo Mi. Ami nnyụn̄ mfiọk nte okop uyo Mi kpukpru ini; edi kaban̄a otuowo ẹmi ẹdade ẹkan ẹkụk, n̄kọdọhọ ntem, man mmọ ẹnịm ke akpanikọ ẹte Afo ọkọdọn̄ Mi.” Jesus ọbọn̄ akam an̄wan̄wa man mme owo oro ẹkpefiọk ẹte ke se enye oyomde ndinam eyesu ebe ke odudu oro ọbọde oto Abasi. Ekem enye ofiori ke ọkpọsọn̄ uyo ete: “Lazarus, wọrọ di.”

Ke ebe oro, Lazarus ọwọrọ edi. Ọfọn̄ udi ke osụk awawan̄a enye ke ubọk ye ukot, ọfọn̄ onyụn̄ awan̄a enye ke iso. Jesus ọdọhọ ete, “Ẹtat enye, ẹyak enye ọnyọn̄ ufọk.”

Ke ẹkụtde utịben̄kpọ emi, ediwak mme Jew oro ẹkedide ndidọn̄ Mary ye Martha esịt ẹbuọt idem ye Jesus. Mmọ eken, nte ededi, ẹdaha ẹnyọn̄ ndiketịn̄ nnọ mme Pharisee mban̄a se ikotịbede. Mmọ ye ikpọ oku ndondo oro ẹdiomi mbono akwa esopikpe mme Jew, kpa Sanhedrin.

Sanhedrin esịne akwa oku eke idahaemi, Caiaphas, ọkọrọ ye mme Pharisee ye mme Sadducee, ikpọ oku, ye n̄kani ikpọ oku. Mmọemi ẹseme ẹte: “Inam didie? Koro owo emi ke ananam ediwak idiọn̄ọ. Edieke iyakde Enye osụk akaiso ntem, kpukpru owo ẹyebuọt idem ye Enye: ndien mbon Rome ẹyedi ẹdibọ nnyịn itie nnyịn ye ubọn̄ nnyịn.”

Okposụkedi mme adaiso ido ukpono ẹnyịmede ẹte ke Jesus ke “ananam ediwak idiọn̄ọ,” n̄kukụre n̄kpọ oro ebehede mmọ edi idaha ye ukara mmọ. Edinam Lazarus eset ke n̄kpa edi ata akwa nnama ọnọ mme Sadducee, sia mmọ mînịmke ediset ke n̄kpa ke akpanikọ.

Caiaphas, emi iso-ọfọn edide owo Sadducee, etịn̄ ikọ ­idahaemi, ọdọhọde ete: “Mbufo ifiọkke n̄kpọ baba esisịt, inyụn̄ ikereke ite ọfọn owo kiet ndikpakpa kaban̄a ufọn mbio obio, akan ofụri obio nditak.”

Abasi anam Caiaphas etịn̄ ntem, koro apostle John ke ukperedem ama ewet ete: “Ikọ emi itoho [Caiaphas ke] idemesie.” Se ikọ Caiaphas ekenen̄erede ọwọrọ ekedi nte ke ẹkpenyene ndiwot Jesus man ẹkpan Enye ndikaiso ntịmede idaha ukara ye odudu mmimọ. Edi, nte John ọdọhọde, ‘Caiaphas eketịn̄ nte prọfet ete ke Jesus eyekpa inyụn̄ idịghe kaban̄a ufọn obio oro ikpọn̄, edi man Enye atan̄ kpukpru nditọ Abasi ẹmi ẹsuanade obon ọtọkiet.’ Ndien, ke akpanikọ, edi uduak Abasi nte Eyen esie akpa nte ufak ọnọ kpukpru owo.

Caiaphas idahaemi okụt unen ke ndikara ekikere Sanhedrin ndidiomi man ẹwot Jesus. Edi Jesus, eyedi okop aban̄a ediomi emi oto Nicodemus, owo Sanhedrin emi edide ufan esie, ọkpọn̄ ebiet oro. John 11:​38-⁠54.

▪ Ntak emi Jesus ọbọn̄de akam an̄wan̄wa mbemiso anamde Lazarus eset ke n̄kpa?

▪ Didie ke mbon oro ẹkekụtde ediset ke n̄kpa emi ẹnam n̄kpọ ẹban̄a oro?

▪ Nso iyarade idiọkido eke mme andibuana ke Sanhedrin?

▪ Nso ikedi uduak Caiaphas, edi nso ke Abasi akada enye nditịn̄ prọfesi mban̄a?