Ibuot 93

Ke Ini Ẹyararede Eyen Owo

KE ADAN̄AEMI Jesus osụk odude ke edem edere (edide ke Samaria m̀mê ke Galilee), mme Pharisee ẹbụp enye ẹban̄a ini eke Obio Ubọn̄ edidide. Mmọ ẹnịm ke akpanikọ ẹte ke enye edidi ye akwa n̄wụtidem ye ido edinam, edi Jesus ọdọhọ ete: “Ubọn̄ Abasi idịghe ke ido nte owo okụtde enye ke enyịn: owo idinyụn̄ idọhọke ẹte, Se enye mi; mîdịghe, Se enye do: koro sese, Ubọn̄ Abasi odu ke otu mbufo.”

Ikọ Jesus oro “ke otu mbufo,” edi se ẹsikabarede ndusụk ini, “ke esịt mbufo.” Ntre ndusụk owo ẹkere ẹte ke ikọ Jesus ọkọwọrọ ke Obio Ubọn̄ Abasi akara ke esịt mme asan̄autom Abasi. Edi, nte an̄wan̄ade, Obio Ubọn̄ Abasi idụhe ke esịt mme Pharisee oro mînịmke ke akpanikọ mi, kpa mbon ẹmi Jesus etịn̄de ikọ ọnọ. Edi, enye odu ke otu mmọ, sia Jesus Christ, Edidem Obio Ubọn̄ Abasi oro ẹkemekde, odude do ke otu mmọ.

Iso-ọfọn edi ke mme Pharisee ẹma ẹkedaha ẹkpọn̄ do ke Jesus akaiso etịn̄ ikọ ye mme mbet esie aban̄a edidi Obio Ubọn̄ oro. Enye akpan akpan enyene edidu esie eke ini iso ke ukara Obio Ubọn̄ ke ekikere ke ini enye odụride owo utọn̄ ete: “Mmọ ẹyedọhọ mbufo ẹte, Sese, ko! Sese, mi! Ẹkûwọrọ ẹka, ẹkûnyụn̄ ẹtiene [mme nsunsu Messiah ẹmi]. Koro kpa nte emịnen̄mịnen̄ ọwọrọde ke n̄kan̄ ikpaenyọn̄ kiet, ayama osịm n̄kan̄ eken, kpa ntre ke Eyen Owo eyedi ke usen Esie.” Ntre, Jesus owụt ete ke kpa nte ẹkụtde emịnen̄mịnen̄ ke ebiet oro an̄wan̄ade, kpukpru owo ẹmi ẹnyịmede ndise ẹyekụt uyarade edidu imọ ata in̄wan̄în̄wan̄ ke ukara Obio Ubọn̄.

Jesus ndien ada emi odomo ye mme n̄kpọntịbe ini eset ndiwụt nte edu mme owo editiede ke edidu esie eke ini iso. Enye anam an̄wan̄a ete: “Ndien nte ekedide ke eyo Noah, kpa ntre ke edidi ke usen Eyen Owo . . . Kpa nte okonyụn̄ edide ke eyo Lot; mmọ ẹkedia n̄kpọ, ẹnyụn̄ ẹn̄wọn̄ n̄kpọ; mmọ ẹdep, ẹnyụn̄ ẹnyam; ẹtọ in̄wan̄, ẹnyụn̄ ẹbọp ufọk: edi ke usen oro Lot ọwọrọde ke Sodom, ikan̄ ye itai ẹto ke enyọn̄ ẹdep ẹdisobo mmọ kpukpru: kpasụk ntre ke edidi ke usen emi Eyen Owo ediyararede idem.”

Jesus idọhọke ite ke ẹkesobo mme owo ke eyo Noah ye ke eyo Lot ke ntak mmọ ẹkesịnde idem ke mme ndammana edinam ẹdide edidia n̄kpọ, edin̄wọn̄ n̄kpọ, edidep n̄kpọ, edinyam n̄kpọ, editọ in̄wan̄ ye edibọp ufọk. Idem Noah ye Lot ye ubon mmọ ẹma ẹnam mme n̄kpọ ẹmi. Edi mme owo eken ẹma ­ẹkaiso ke mme utọ edinam ­ofụri usen ntre ye unana edinọ ntịn̄enyịn ndomokiet ke uduak Abasi, ndien ekedi ke ntak emi ke ẹkesobo mmọ. Ke ukem ntak oro, ẹyesobo mme owo ke ini ẹdiyararede Christ ke ini akwa ukụt ke editịm n̄kpọ emi.

Ke ọsọn̄ọde etịn̄ ufọn edinam n̄kpọ usọp usọp mban̄a uyarade edidu esie ke ini iso ke ukara Obio Ubọn̄, Jesus adian do ete: “Ke usen oro, owo eke odude ke ọkọm ufọk, n̄kpọ esie ẹnyụn̄ ẹdude ke esịt ufọk, okûkam osụhọde odụk editan̄ mmọ: kpa ntre n̄ko owo eke odude ke in̄wan̄ okûkam afiak aka ufọk. Mbufo ẹti n̄wan Lot.”

Ke ini uyarade edidu Christ owụtde idem, mme owo ikemeke ndiyak edidian idem ke inyene obụkidem mmọ akpan mmọ ndinam n̄kpọ usọp usọp. Ke usụn̄ isan̄ esie ndiwọrọ ke Sodom, n̄wan Lot nte an̄wan̄ade ama ọwọn̄ọde enyịn ese edem ye udọn̄ kaban̄a n̄kpọ ẹmi ọkọkpọn̄de ke edem, ndien enye ama akabade edi adaha inụn̄.

Ke akade iso nditịn̄ nte n̄kpọ editiede ke edidu esie eke ini iso, Jesus asian mme mbet esie ete: “Ke okoneyo oro owo iba ẹyena ke mbri kiet; ẹyeda kiet, ẹkpọn̄ enye eken. Iban iba ẹyekọk ibokpot; ẹyeda kiet, ẹkpọn̄ enye eken.”

Ndida owo ndaha asan̄a ekekem ye Noah ye ubon esie ndidụk ubom ye mme angel ndida Lot ye ubon esie n̄n̄wọrọ n̄kpọn̄ Sodom. Enye ọwọrọ edinyan̄a. Ke n̄kan̄ eken, ndidi se ẹkpọn̄de ọwọrọ ndikụt nsobo.

Ke ọtọ emi, mme mbet ẹbụp ẹte: “Ọbọn̄, ke m̀mọ̀n̄?”

“Ọtọ nte okpo anade, do ke mme utere [“mme ntrukpom,” NW] ẹdiboho,” ntre ke Jesus ọbọrọ. Mbon oro ‘ẹdade ẹwọrọ’ kaban̄a edinyan̄a ẹbiet ntrukpom ẹmi ẹkụtde n̄kpọ anyan usụn̄ koro mmọ ẹbohode ọtọkiet ẹkanade “okpo” ẹkụk. Okpo enyene n̄kpọ ndinam ye ata Christ ke edidu esie oro enyịn mîkwe ­ke ukara Obio Ubọn̄ ye usọrọ eke spirit oro Jehovah anamde. Luke 17:​20-37; Genesis 19:⁠26.

▪ Didie ke Obio Ubọn̄ okodu ke otu mme Pharisee?

▪ Ke nso usụn̄ ke edidu Christ ebiet emịnen̄mịnen̄?

▪ Ntak emi ẹdisobode mme owo kaban̄a edinam mmọ ke edidu Christ?

▪ Edida kiet nnyụn̄ n̄kpọn̄ enye eken ọwọrọ nso?