Ibuot 95

Mme Ukpepn̄kpọ ke Usiondọ ye ke Ima Ẹnyenede Ẹnọ Nditọ

JESUS ye mme mbet esie ke ẹnam isan̄ ẹka Jerusalem man ẹkedụk Passover eke 33 C.E. Mmọ ẹbe Akpa Jordan ẹnyụn̄ ẹsan̄a usụn̄ oro ebede ke obio Perea. Jesus okodu ke Perea urua ifan̄ ke mbemiso, edi inioro ẹma ẹkot enye ẹte edi Judea ke ntak ufan esie Lazarus emi ọkọdọn̄ọde. Ke adan̄aemi odude ke Perea, Jesus ama enyene nneme ye mme Pharisee aban̄a usiondọ, ndien idahaemi mmọ ẹfiak ẹneme n̄kpọ emi.

Ke otu mme Pharisee nsio nsio ekikere ẹdu kaban̄a usiondọ. Moses ọkọdọhọ ke ẹkeme ndisio n̄wan ndọ ke ‘ẹkụtde enye n̄kpọ o-⁠bụt ke idem.’ Ndusụk owo ẹkere ẹte ke emi n̄kukụre aban̄a unana edisana ido. Edi mmọ en̄wen ẹkere ke “n̄kpọ bụt” esịne ata n̄kpri ndudue. Ntem, man ẹdomo Jesus, mme Pharisee ẹbụp ẹte: “M̀mê enen owo ndisio n̄wan esie ndọ ke ntak ekededi?” Mmọ ẹnịm ke akpanikọ ẹte ke sededi oro Jesus etịn̄de eyesịn enye ke afanikọn̄ ye mme Pharisee oro ẹnyenede isio isio ekikere mi.

Jesus ọbọrọ mbụme emi ye mbufiọk, ye unana ediyom ekikere owo ekededi, edi etịn̄de otụk akpa uduak kaban̄a ndọ. Enye obụp ete, “Nte mbufo ikokotke ite, Enyeemi okobotde mmọ obot mmọ eren ye n̄wan toto ke editọn̄ọ? N̄ko, ke ntak emi owo eyekpọn̄ ete ye eka esie akadiana ye n̄wan esie, ndien mmọ mbiba ẹyekabade ẹdi obụk kiet. Ntre ke mmọ idịghe aba owo iba, edi ẹdi obụk kiet. Mmọdo se Abasi ama akadian, yak owo okûdianade.”

Jesus owụt ete ke akpa uduak Abasi edi nsan̄a ndọ ndidiana ọtọkiet, mmọ ẹkûdianade ndọ. Edieke oro edide ntre, mme Pharisee ẹbọrọ ẹte, “Nsinam Moses etemede ndien ete ẹwet n̄wed usiondọ ẹnọ n̄wan, ẹnyụn̄ ẹsio enye?”

Jesus ọbọrọ ete, “Oto nsọn̄esịt mbufo ke Moses onyịme mbufo ẹsio iban mbufo. Edi toto ke editọn̄ọ ikedịghe ntre.” Ih, ke ini Abasi ọkọtọn̄ọde nnennen idaha ndọ ke in̄wan̄ Eden, enye ikanamke ndutịm inọ usiondọ.

Jesus akaiso ndisian mme Pharisee ete: “Edi ndọhọ mbufo nte, Owo ekededi eke edisiode n̄wan esie ndọ, ke mîtoho ke edidue ye erenowo [otode ikọ Greek oro, por·neiʹa] , onyụn̄ ọdọde efen, esịn efụbe.” Enye kemi owụt ete ke por·neiʹa, emi edide obukpo ido idan̄, edi n̄kukụre isọn̄ usiondọ oro Abasi onyịmede.

Ke ẹdiọn̄ọde ẹte ke ndọ ekpenyene ndidi nsinsi mbọbọ ye n̄kukụre isọn̄ ntak emi kaban̄a usiondọ, emi onụk mme mbet ndidọhọ nte: “Edieke n̄kpọ etiede ntem ye owo ye n̄wan esie, ifọnke owo ndidọ ndọ.” Mfan̄a ndomokiet idụhe nte ke owo emi aduakde ndidọ ndọ ekpenyene ndikere ntotụn̄ọ ntotụn̄ọ mban̄a nsinsi mbọbọ eke ebuana ndọ!

Jesus akaiso nditịn̄ mban̄a itie unana ndọ. Enye anam an̄wan̄a ete ke ndusụk nditọiren ẹmana nte eunuch, ikemeke ndidọ ndọ sia mîkọrike ntụk idan̄. Mme owo ẹnam mmọ en̄wen ẹdi mme eunuch, ke nsọn̄ido ẹwotde ntụk idan̄ mmọ. Ke akpatre, ndusụk owo ẹsụk udọn̄ edidọ ndọ ye edikop inem ebuana idan̄ man otodo mmọ ẹkpekeme ndisịn idemmọ ọyọhọ ọyọhọ ke mme n̄kpọ ẹban̄ade Obio Ubọn̄ heaven. Jesus eberi ete, “Owo eke ekemede ndibọ [itie unana ndọ] , yak ọbọ.”

Mme owo idahaemi ẹtọn̄ọ ndida n̄kpri nditọ mmọ nsọk Jesus. Nte ededi, mme mbet ẹsua ẹnọ nditọn̄wọn̄ oro ẹnyụn̄ ẹdomo ndisio mmọ unyọn̄, nte eyighe mîdụhe ẹyomde ndikpeme Jesus nsio ke mfịghe oro mîdotke. Edi Jesus ọdọhọ ete: “Ẹyak n̄kpri nditọ ẹtiene Mi; ẹkûkpan mmọ: koro Obio Ubọn̄ Abasi edide eke orụk ẹmi. Ke akpanikọ ke ndọhọ mbufo, Owo ekededi eke mîdibọhọ Obio Ubọn̄ Abasi nte ekpri eyen, ididụkke-dụk ke esịt.”

Nso nti ukpepn̄kpọ ke Jesus ọnọ mi ntem! Man ida Obio Ubọn̄ Abasi inyene, nnyịn inyene ndikpebe nsụhọdeidem ye ukeme ubọ ukpep eke n̄kpri nditọ. Edi uwụtn̄kpọ Jesus n̄ko owụt adan̄a nte edide akpan n̄kpọ, akpan akpan ọnọ mme ete ye eka, ndisibiat ini ye nditọ mmọ. Jesus idahaemi owụt ima oro enye enyenede ọnọ n̄kpri nditọ ke ndimen mmọ n̄kama nnyụn̄ ndiọn̄ mmọ. Matthew 19:​1-15; Deuteronomy 24:⁠1; Luke 16:18; Mark 10:​1-16; Luke 18:​15-⁠17.

▪ Nso nsio nsio ekikere ke mme Pharisee ẹnyene ẹban̄a usiondọ, ndien ke ntre didie ke mmọ ẹdomo Jesus?

▪ Didie ke Jesus anam n̄kpọ aban̄a ukeme oro mme Pharisee ẹsịnde ndidomo enye, ndien nso ke enye ọnọ nte n̄kukụre isọn̄ usiondọ?

▪ Ntak emi mme mbet Jesus ẹdọhọde ke ifọnke owo ndidọ ndọ-⁠ọ, ndien nso ke Jesus otoro ete ẹnam?

▪ Nso ke Jesus ekpep nnyịn ke mme edinam esie ye n̄kpri nditọ?