Ibuot 96

Jesus ye Ọbọn̄ Owo Inyene

NTE Jesus asan̄ade ebe ke n̄kann̄kụk obio Perea aka Jerusalem, akparawa kiet efehe etiene enye onyụn̄ ọtọn̄ọ edọn̄ ke iso esie. Ẹkot eren emi ọbọn̄, iso-ọfọn ọwọrọde ke enye akama akwa itie ke synagogue n̄kann̄kụk m̀mê nte ke enye akam edi owo Sanhedrin. N̄ko, enye enyene inyene ata etieti. Enye obụp ete, “Eti Andikpep, ndinam nso man nnyene nsinsi uwem?”

Jesus ọbọrọ ete, “Nsinam afo okotde Mi eti? Enyeemi edide eti idụhe, ke mîbọhọke Kiet, kpa Abasi.” Anaedi akparawa emi ada “eti” nte udorienyịn̄, ntre Jesus anam enye ọfiọk ete ke utọ udorienyịn̄ ntre enyene Abasi ikpọn̄îkpọn̄.

Jesus akaiso ete, “Edi edieke oyomde ndidụk uwem, nịm mbet.”

Owo oro obụp ete, “Ibet ewe?”

Ke asiakde ition ke otu Ibet Duop, Jesus ọbọrọ ete: “Kûwot owo, Kûsịn efụbe, Kûyịp inọ, Kûdi ntiense nsu, Kpono usọ ye uka.” Ndien ke adiande ibet oro akam okponde akan, Jesus ọdọhọ ete: “Nyụn̄ ma mbọhọidụn̄ fo nte idemfo.”

“Mma nnonịm kpukpru n̄kpọ ẹmi toto ke uyen mi,” ntre ke eren oro ọbọrọ ke ofụri esịt akpanikọ. “Nso isụhọ mi ndinam?”

Ke akpan̄de utọn̄ ọnọ ọkpọsọn̄ eben̄e esịt akpanikọ eren oro, Jesus onyụn̄ ama enye. Edi Jesus ọfiọk edibọp oro enye ọbọpde idemesie adian ke inyene obụkidem, ndien ke ntre osio udọn̄ esie owụt: “N̄kpọ kiet osụhọ fi; ka kanyam kpukpru se enyenede, yak nọ mme ubuene, ndien eyenyene inyene ke heaven: nyụn̄ di disan̄a ye Ami.”

Nte eyịghe mîdụhe, Jesus ese ye mbọm, nte eren emi adahade ada onyụn̄ ọwọn̄ọrede adaha ye akwa mfụhọ. Inyene esie okịm enye enyịn mbak edikụt ata n̄kpọuto. Jesus eseme ete, “Ọsọn̄ adan̄a didie ye mbon inyene ndidụk ke Obio Ubọn̄ Abasi!”

Ikọ Jesus akpa mme mbet esie idem. Edi idem ototịm akpa mmọ ke ini enye akade iso nditịn̄ edumbet oro otụkde kpukpru owo: “Koro edi mmemmem n̄kpọ ye camel ndibe ke odudu abiabon, akan owo inyene ndidụk ke Obio Ubọn̄ Abasi.”

“Anie ndien ekeme ndibọhọ?” mme mbet ẹyom ndifiọk.

Ke owụkde enyịn nnennen ese mmọ, Jesus ọbọrọ ete: “Owo ikemeke ndinam emi, edi Abasi emekeme: koro Abasi emekeme ndinam kpukpru n̄kpọ.”

Ke okụtde ke mmimọ ima inam edimek oro okpụhọrede ata etieti ọkpọn̄ eke ọbọn̄ owo enyene oro, Peter ọdọhọ ete: “Sese, nnyịn ikọkpọn̄ kpukpru n̄kpọ itiene Fi.” Ntre enye obụp ete: “Nso ndien ke nnyịn idinyene?”

Jesus ọn̄wọn̄ọ ete, “Ke ini ẹdinamde n̄kpọ ẹkabade ẹdi mbufa, ke adan̄aemi Eyen Owo editiede ke ebekpo ubọn̄ Esie, mbufo, ẹmi ẹketienede Mi, ẹyenyụn̄ ẹtie ke ebekpo duopeba, ẹkpe ikpe ẹnọ esien Israel duopeba.” Ih, Jesus owụt ete ke ini eyedu emi ẹdinamde n̄kpọ ẹkabarede ẹdi mbufa ke isọn̄ man otodo n̄kpọ ẹfiak ẹketie nte ẹketiede ke in̄wan̄ Eden. Ndien Peter ye mme mbet eken ẹyebọ n̄kpọ eyenutom eke edikara ye Christ ke Paradise ofụri isọn̄ emi. Ke akpanikọ, utọ akwa utịp oro ekem ye n̄kpọ ekededi oro ẹyakde atak!

Nte ededi, idem idahaemi n̄kpọ eyenutom ẹdu, nte Jesus etịn̄de ye nsọn̄uyo ete: “Baba owo kiet idụhe, eke ọkọkpọn̄de ufọk, m̀mê nditọeka iren, m̀mê nditọeka iban, m̀mê eka, m̀mê ete, m̀mê nditọ, m̀mê isọn̄, ke ntak Mi ye ntak gospel, emi mîdibọhọ n̄kpọ utịm ikikie ke emi ke ini emi, mme ufọk, ye nditọeka iren, ye nditọeka iban, ye mme eka, ye nditọ, ye isọn̄, ikọrọ ye ukụt: ye nsinsi uwem ke eyo emi edidide.”

Nte Jesus ọn̄wọn̄ọde, ebiet ekededi oro mbet esie ẹkade ke ererimbot, mmọ ẹsinyene itie ebuana ye ekemmọ mme Christian oro ekperede akan onyụn̄ ọsọn̄de urua akan enyeoro mmọ ẹsinyenede ye ata mbonufọk mmọ. Ọbọn̄ owo inyene emi nte an̄wan̄ade amataba n̄kpọ eyenutom emi onyụn̄ ataba nsinsi uwem ke Obio Ubọn̄ Abasi eke heaven.

Ke oro ebede Jesus adian do ete: “Edi ediwak mmọ eke ẹbemde iso ẹyekpere edem; mme ekpere edem ẹyenyụn̄ ẹbe iso.” Nso ke ikọ esie ọwọrọ?

Ikọ esie ọwọrọ nte ke ediwak owo ẹmi “ẹbemde iso” ke ndinyene mme ifetutom ido ukpono, utọ nte ọbọn̄ owo inyene oro, ididụkke Obio Ubọn̄. Mmọ “ẹyekpere edem.” Edi ediwak owo, ẹsịnede mme osụhọdeidem mbet Jesus, ẹmi mme Pharisee oro ẹkụtde idem ke edinen ẹsede ke usụhọde nte ẹdide “mme ekpere edem”​—⁠nte ẹdide mbon idụt, m̀mê ‛am ha·’aʹrets⁠—​ẹyekabade ẹdi “ẹbe iso.” Mmọ ndikabade ndi “ẹbe iso” ọwọrọ ke mmọ ẹyebọ ifetutom eke edikabade ndi mme anditiene n̄kara ye Christ ke Obio Ubọn̄ oro. Mark 10:​17-31; Matthew 19:​16-30; Luke 18:​18-⁠30.

▪ Nte an̄wan̄ade, nso orụk ọbọn̄ ke ọbọn̄ owo inyene oro edi?

▪ Ntak emi Jesus afan̄ade ete ẹkûkot imọ eti-⁠e?

▪ Didie ke ifiọk n̄kpọntịbe ọbọn̄ owo inyene oro owụt n̄kpọndịk oro odude ke owo ndidi owo inyene?

▪ Mme n̄kpọ eyenutom ewe ke Jesus ọn̄wọn̄ọ ọnọ mme anditiene enye?

▪ Didie ke ebe iso akabade edi ekpere edem, ndien ekpere edem ebe iso?