Ibuot 98
Mme Mbet Ẹneni Eneni nte N̄kpa Jesus Ekperede
JESUS ye mme mbet esie ẹkpere Akpa Jordan, kpa ebiet emi mmọ ẹtode obio Perea ẹbe ẹdụk Judea. Ediwak mbon en̄wen ke ẹsan̄a ye mmọ ẹka ndidụk Passover eke 33 C.E., emi osụhọde n̄kpọ nte urua kiet.
Jesus asan̄a ebe mme mbet esie iso, ndien mmọ ẹdu ke n̄kpaidem ẹban̄a uko uko ubiere esie. Ti ete ke urua ifan̄ ke edem ke ini Lazarus akakpade ndien Jesus okoyomde ndito Perea n̄ka Judea, Thomas ama esịn udọn̄ ọnọ mmọ eken ete: “Ẹyak nnyịn itiene Enye ika ikakpa ye Enye.” Ti n̄ko ete ke Jesus ama akanam Lazarus eset, mbon Sanhedrin ẹma ẹdiomi ndiwot Jesus. Eyịghe idụhe ndịk omụmde mme mbet nte mmọ ẹfiakde ẹdụk Judea idahaemi.
Man otịm mmọ idem eben̄e se inade ke iso, Jesus ada mbet 12 adaha ndịbe ndịbe onyụn̄ ọdọhọ mmọ ete: “Sese, nnyịn imọn̄ idọk ika Jerusalem; ndien ẹyeda Eyen Owo ẹyak ẹnọ ikpọ oku ye mme scribe; mmọ ẹyenyụn̄ ẹbiom Enye ikpe, ẹte iwot Enye, ẹyenyụn̄ ẹyak Enye ẹnọ mme Gentile: ndien mmọ ẹyesak Enye nsahi, ẹyenyụn̄ ẹfiari Enye etap, ẹnyụn̄ ẹmia Enye; ẹnyụn̄ ẹwot Enye; ndien ke usen ita ẹma ẹbe; Enye eyeset ke n̄kpa.”
Emi edi ọyọhọ utịm ikata ke mme ọfiọn̄ ndondo emi, emi Jesus asiande mme mbet esie aban̄a n̄kpa ye ediset ke n̄kpa esie. Ndien okposụkedi mmọ ẹkpan̄de utọn̄ ẹnọ enye, mmọ ikemeke ndidiọn̄ọ. Iso-ọfọn edi sia mmọ ẹnịmde edifiak n̄wụk obio ubọn̄ Israel ke isọn̄ ke akpanikọ, ndien mmọ ẹsak iso ẹse edibọ ubọn̄ ye ukpono ke obio ubọn̄ eke isọn̄ ye Christ.
Salome, eka apostle James ye John odu ke otu mbonisan̄ uka Passover oro. Jesus okokot irenowo ẹmi “Nditọ obuma,” nte eyịghe mîdụhe ke ntak ikan̄ ikan̄ edu mmọ. Ke ndusụk ini owo iba ẹmi ẹma ẹnyene udọn̄ uwọrọiso ke Obio Ubọn̄ Christ, ndien mmọ ẹma ẹnam eka mmọ ọdiọn̄ọ aban̄a udọn̄ mmọ. Enye idahaemi okụt Jesus ke ibuot mmọ, atuak ibuot ọnọ enye, onyụn̄ eben̄e enye eben̄e.
Jesus obụp enye ete, “Oyom nso?”
N̄wan emi ọbọrọ ete: “Nọ uyo ete nditọ mi iba ẹmi ẹditie, kiet ke ubọk nnasia Fo, kiet ke ufien, ke Obio Ubọn̄ Fo.”
Ke ọdiọn̄ọde ntak eben̄e emi, Jesus ọbọrọ James ye John ete: “Mbufo ifiọkke se ẹben̄ede. Nte mbufo ẹmekeme ndin̄wọn̄ cup emi Ami mmọn̄ n̄n̄wọn̄?”
“Nnyịn imekeme,” ntre ke mmọ ẹbọrọ. Idem okposụkedi Jesus ke ndondo oro asiande mmọ ete ke imọ isak iso ise ọkpọsọn̄ ukọbọ ndien ke akpatre iyekpa, mmọ nte an̄wan̄ade idiọn̄ọke ite ke emi edi se enye etịn̄de aban̄a nte “cup” emi enye oyomde ndin̄wọn̄.
Edi, Jesus asian mmọ ete: “Ke akpanikọ mbufo ẹyen̄wọn̄ cup Mi: edi nditie ke ubọk nnasia Mi ye ke ufien inyeneke Mi ndinọ, edi enyene mmọemi Ete Mi okonịmde oro ọnọ.”
Nte ini akade apostle duop eken ẹdidiọn̄ọ se James ye John ẹkeben̄ede, ndien esịt ayat mmọ. Iso-ọfọn James ye John ẹkeda iso ke eneni oro ekebemde iso ada itie ke otu mme apostle aban̄a enyeemi edide n̄kpon n̄kan. Eben̄e oro mmọ ẹben̄ede idahaemi ayarade nte ke mmọ ikadaha item oro Jesus ọkọnọde ke n̄kpọ emi isịn ke edinam. Ke edide n̄kpọ mfụhọ, udọn̄ mmọ kaban̄a uwọrọiso osụk ọsọsọn̄ ubọk.
Ntre man anam n̄kpọ aban̄a obufa eneni emi ye idiọk uduak oro n̄kpọ emi adade edi, Jesus okot mbet 12 obon ọtọkiet. Ke ọnọde mmọ item ke ima ima usụn̄, enye ọdọhọ ete: “Mbufo ẹfiọk ẹte, mme andikara mme Gentile ẹsọn̄ ubọk ẹkara mmọ, ikpọ owo mmọ ẹnyụn̄ ẹbre odudu ye mmọ. Ididịghe ntre ke otu mbufo; edi owo ekededi eke oyomde ndikabade n̄kpon ke otu mbufo eyedi asan̄autom mbufo; owo ekededi eke onyụn̄ oyomde ndidi ebeiso owo ke otu mbufo eyedụk ufụn ọnọ mbufo.”
Jesus omonịm uwụtn̄kpọ oro mmọ ẹkpekpebede, nte enye anamde an̄wan̄a ete: “Kpa nte Eyen Owo mîkedịghe, man ẹnam n̄kpọ ẹnọ Enye, edi man Enye anam n̄kpọ ọnọ owo, onyụn̄ ọnọ uwem Esie ndifak ediwak owo.” Ikụreke ke Jesus ndinam n̄kpọ nnọ mbon en̄wen edi eyenam ntre okosịm idaha akpade ke ibuot ubonowo! Mme mbet ẹnyene ndiwụt ukem edu Christ emi ke ndinyene udọn̄ edinam n̄kpọ nnọ owo utu ke ndidi se ẹnamde-nam n̄kpọ ẹnọ ndinyụn̄ n̄kama idem nte andikpri n̄kan utu ke ndiyom idaha uwọrọiso. Matthew 20:17-28; Mark 3:17; 9:33-37; 10:32-45; Luke 18:31-34; John 11:16.
▪ Ntak emi ndịk omụmde mme mbet idahaemi-e?
▪ Didie ke Jesus otịm mme mbet esie idem eben̄e se inade ke iso?
▪ Nso eben̄e ke ẹben̄e Jesus, ndien didie ke emi otụk mme apostle eken?
▪ Didie ke Jesus anam n̄kpọ aban̄a mfịna oro odude ke otu mme apostle esie?