Ibuot 102

Ubọn̄ Ubọn̄ Edidụk Oro Christ Odụkde Jerusalem

KE NDAN̄NSIERE, Sunday, Nisan 9, Jesus ọkpọn̄ Bethany ye mme mbet esie ẹnyụn̄ ẹsan̄a ẹbe Obot Olive ẹka Jerusalem. Ke ibio ibio ini, mmọ ẹsan̄a ẹkpere Bethphage, emi odude ke Obot Olive. Jesus ọnọ owo iba ke otu mbet esie item ete:

“Ẹka ẹkedụk ke obio-in̄wan̄ emi asakde iso ese mbufo, ndien idahaoro mbufo ẹyekụt ass emi ẹyịride, ye eyen esie ye enye; ẹtat mmọ, ẹda ẹsọk Mi. Ndien owo ekededi ama ọdọhọ n̄kpọ ye mbufo, ẹbọrọ ẹte, Ọbọn̄ ke oyom mmọ; ekem idahaoro enye eyenọ mmọ ẹdi.”

Okposụkedi mme mbet ke mbemiso mîkọdiọn̄ọke ite ke ntọt ẹmi ẹnyene n̄kpọ ndinam ye edisu prọfesi Bible, ke ukperedem mmọ ẹdifiọk ẹte ke ẹmi enyene n̄kpọ ndinam. Prọfet Zachariah ama ebemiso etịn̄ ete ke Edidem oro Abasi ọkọn̄wọn̄ọde ediwat ke ass odụk Jerusalem, ih, “ke abak ass, eyen uman ass.” Edidem Solomon ke ukem usụn̄ oro ama awat ke eyen ass aka itie ẹkeyetde enye aran.

Ke ini mme mbet oro ẹdụkde Bethphage ẹnyụn̄ ẹmende eyen ass ye eka esie, ndusụk owo ẹmi ẹdade do ẹdọhọ ẹte: “Nso ke mbufo ẹnam oro?” Edi ke ẹsiande mmọ ẹte ke ẹda ufene ẹmi ẹsọk Ọbọn̄, mme owo oro ẹyak mme mbet ẹda mmọ ẹsọk Jesus. Mme mbet ẹbri ọfọn̄idem mmọ ke edem ass oro ye ke edem eyen esie, edi Jesus ọdọk odoro ke edem eyen ass oro.

Nte Jesus awatde aka Jerusalem, otuowo ke ọkọri. Ediwak owo ẹbri ọfọn̄idem mmọ ke ọkpọusụn̄ ke adan̄aemi mbon eken ẹsịbede ndakeyop ẹnyụn̄ ẹbride mmọ ke usụn̄. Mmọ ẹfiori ẹte, “Itoro enyene Edidem emi edide ke enyịn̄ Jehovah: Emem odu ke heaven, ubọn̄ odu ke ata enyọn̄.”

Ndusụk mme Pharisee ẹmi ẹsan̄ade ye otuowo oro ẹkop iyatesịt ke ntak utan̄a etop emi ẹnyụn̄ ẹtọt ẹnọ Jesus ẹte: “Andikpep, kpan mbet Fo ete ẹkûtịn̄ ntre.” Edi Jesus ọbọrọ ete: “Ndọhọ mbufo nte, Edieke mme mmọemi ẹkpedopde uyo, mme itiat ẹkpesio n̄kpo.”

Nte Jesus asan̄ade ekpere Jerusalem, enye ada okụt obio oro onyụn̄ ọtọn̄ọ nditua eyet mban̄a enye, ọdọhọde ete: “Afo ke idemfo akpakam ọfiọk ke usen emi mme n̄kpọ eke ẹkpenamde fi odu ke emem! Edi kemi mmọ ẹmedịbe fi ke enyịn.” Ke ntak enye ndikokoi nsọn̄ ibuot, ana Jerusalem ekpe utịp, nte Jesus ebemde iso etịn̄ ete:

“Mme asua fo [mbon Rome ke idak Etubom Titus] [ẹyebot] ibombom ẹkanade fi, ẹkan fi ẹkụk, ẹnyụn̄ ẹbaha fi ke kpukpru n̄kan̄; ẹyenyụn̄ ẹsụhọde fi ẹnịm ke isọn̄, ye nditọ fo ẹmi ẹdụn̄de fi ke esịt; ndien idikpọn̄ke itiat kiet ke enyọn̄ itiat eken ke esịt fo.” Nsobo Jerusalem oro Jesus ekebemde iso etịn̄ mi ke akpanikọ ama ada itie ke isua 37 ke ukperedem, ke isua 70 C.E.

N̄kpasịp urua ifan̄ ke mbemiso, ediwak owo ke otuowo oro ẹma ẹkụt Jesus anamde Lazarus eset ke n̄kpa. Idahaemi mmọemi ke ẹkaiso nditịn̄ utịben̄kpọ emi nnọ mbon en̄wen. Ntre ke ini Jesus odụkde Jerusalem, ofụri obio odu ke ndutịme. “Anie edi emi?” mme owo ẹyom ndifiọk. Ndien otuowo ẹmi ẹkaiso ẹdọhọ ẹte: “Emi edi Jesus, prọfet emi otode ke Nazareth, ke Galilee.” Ke ẹkụtde se itịbede, mme Pharisee oro ẹseme ẹte ke mmimọ ke akpanikọ ikaha ndomo ebiet, koro, nte mmọ ẹdọhọde: “Ererimbot ama adaha etiene Enye.”

Nte ido esie esidide ke akade Jerusalem, Jesus aka ke temple ndikpep owo n̄kpọ. Do nnan ye mbụn̄ọ ẹdi ẹbịne enye, ndien enye anam udọn̄ọ okụre mmọ! Ke ini ikpọ oku ye mme scribe ẹkụtde mme utịben̄kpọ oro Jesus anamde n̄ko ke ini mmọ ẹkopde nditọiren ẹfioride ke temple ẹte, “Hosanna enyene Eyen David,” mmọ ẹkop iyatesịt. Mmọ ẹfan̄a ẹte, “Nte omokop se mmọemi ẹdọhọde?”

Jesus ọbọrọ ete, “Edi ntre; nte akanam mbufo ikotde se ẹwetde ẹte, Afo osio itoro eke ọfọnde ama ke inua nseknditọ ye mme awap-eba?”

Jesus akaiso ndinọ ukpep, enye onyụn̄ owụk enyịn ese kpukpru n̄kpọ ke temple. Ibịghike eyedi mbubịteyo. Ntre enye asan̄a ọwọrọ, ọkọrọ ye mbet esie 12, onyụn̄ anam isan̄ afiak ọnyọn̄ Bethany emi edide itiat iba m̀mê akande oro. Do ke enye adan̄ ke okoneyo Sunday oro, iso-ọfọn ke ufọk ufan esie Lazarus. Matthew 21:​1-11, 14-17; Mark 11:​1-11; Luke 19:​29-44; John 12:​12-19; Zechariah 9:⁠9.

▪ Ini ewe, n̄ko ke nso ido ke Jesus odụk Jerusalem nte Edidem?

▪ Edi akpan n̄kpọ adan̄a didie nte otuowo ẹtoro Jesus?

▪ Didie ke otụk Jesus ke idem ke ini enye okụtde Jerusalem, ndien nso prọfesi ke enye etịn̄?

▪ Nso itịbe ke ini Jesus akade temple?