Ibuot 103

Ndifiak N̄kese Temple

JESUS ye mme mbet esie ndisụk mbiat ọyọhọ okoneyo ita ke Bethany edi oro tọn̄ọ nte mmọ ẹketo Jericho ẹdibehe. Idahaemi un̄wana usenubọk Monday, Nisan 10 osịm mmọ ke usụn̄ uka Jerusalem. Jesus okop biọn̄. Ntem ke ini Jesus okụtde eto fig nsannsan ye ikọn̄, enye asan̄a ekpere ete ise m̀mê iyekụt fig ẹyịrede.

Eto oro abak akaha ndisiaha ikọn̄, sia ini fig mîkemke tutu osịm June, ndien idahaemi akam edi utịt utịt March. Nte ededi, Jesus nte an̄wan̄ade ekere ete sia ikọn̄ oro abakde asiaha, ke anaedi mfri fig n̄ko eyebak odu. Edi idotenyịn esie akpa mfụhọ. Ikọn̄ amanam eto oro etie abian̄a abian̄a ke enyịn. Jesus ndien osụn̄i eto oro, ọdọhọde ete: “Owo okûdia aba mfri eke otode fi tutu amama.” Ẹdiọn̄ọ ẹban̄a utịp ye se edinam Jesus adade aban̄a ke ndan̄nsiere.

Ke ẹkade iso, Jesus ye mme mbet esie idahaemi ẹsịm Jerusalem. Enye odụk ke temple, emi enye ama akaka ekese ke uwemeyo eken. Mfịn, nte ededi, enye otịbe n̄kpọ anam, kpasụk nte enye akanamde isua ita ke mbemiso ke ini enye ekedide Passover ke 30 C.E. Jesus ebịn mbon oro ẹnyamde ẹnyụn̄ ẹdepde n̄kpọ ke temple efep onyụn̄ onụk okpokoro mme okpụhọ-okụk ye nnyan n̄kpọitie mme anyam ibiom ọduọk. Enye ikam inyịmeke owo ekededi emen n̄kpọ ndomokiet ọwọrọ ke temple.

Ke obiomde mbon oro ẹkpụhọde okụk ẹnyụn̄ ẹnyamde ufene ke temple ikpe, enye ọdọhọ ete: “Nte iwetke ite, ufọk Mi eyekere ete, ufọk akam kpukpru mme idụt? Edi mbufo ẹmenam enye akabade edi itie mbon-n̄wo.” Mmọ ẹdi mbon n̄wo koro mmọ ẹyomde akwa ekọmurua ẹto mbon oro mîkwe usụn̄ efen ke ebede ndidep mme ufene oro ẹyomde ẹda ẹnam uwa, nto mmọ. Ntre Jesus ada ubịn mbubịne emi nte uduot edibọ owo n̄kpọ ke n̄kanubọk m̀mê ediwo n̄wo.

Ke ini ikpọ oku, mme scribe, ye mme etubom mbio obio ẹkopde se Jesus akanamde, mmọ ẹfiak ẹyom usụn̄ nte ẹkpewotde enye. Mmọ ke ntre ẹwụt ẹte ke mmimọ idi se owo mîkemeke ndinen̄ede. Edi, mmọ ifiọkke nte ẹkpesan̄ade ẹwot Jesus, sia kpukpru owo ẹyịrede enye ndikop ikọ esie.

Ke ẹsiode mme ata Jew ẹfep, mme Gentile n̄ko ẹmedi usọrọ Passover. Mmọemi ẹdi mme okpono Abasi ke ido mme Jew, ọwọrọde ete ke ẹma ẹkabade mmọ esịt ẹsịn ke ido ukpono mme Jew. Ndusụk mbon Greek, nte an̄wan̄ade ẹdide mme okpono Abasi ke ido mme Jew, kemi ẹbịne Philip ẹnyụn̄ ẹsịn eben̄e ndikụt Jesus. Philip aka ebịne Andrew, iso-ọfọn ndibụp m̀mê edisobo ntre odot. Jesus nte an̄wan̄ade osụk odu ke temple, ke ebiet mbon Greek ẹkemede ndikụt enye.

Jesus ọmọfiọk ete ke usen ifan̄ kpọt osụhọ ọnọ imọ ndidu uwem, ntre enye anam idaha esie an̄wan̄a ke usụn̄ oro eyede ete: “Ekem ini emi Eyen Owo edinyenede ubọn̄. Ke akpanikọ ke ndọhọ mbufo, Adan̄a nte n̄kpasịp ibokpot mîduọhọ isịne ke esịt isọn̄ ikpa, enye osụk odu ke idemesie ikpọn̄; edi enye ama akpa, on̄wụm ekese mfri.”

N̄kpasịp ibokpot kiet enyene esisịt ufọn. Edi, nso edieke ẹsịnde enye ke esịt isọn̄ enye onyụn̄ “akpa,” adade uwem esie nte n̄kpasịp okosịm utịt? Enye ndien eyetịbe ndien nte ini akade ọkọri akabade edi ekpateto oro osion̄ode ata ediwak n̄kpasịp ibokpot. Ukem ntre, Jesus edi mfọnmma owo kiet. Edi edieke enye akpade ke edinam akpanikọ nnọ Abasi, enye eyekabade edi usụn̄ unyene nsinsi uwem ọnọ mme anam-akpanikọ ẹmi ẹnyenede ukem spirit uwaidem oro enye enyenede. Ntre, Jesus ọdọhọ ete: “Owo eke amade uwem esie ọduọk uwem esie; edi owo eke asuade uwem esie ke ererimbot emi eyemụm uwem esie onịm tutu osịm uwem nsinsi.”

Jesus nte an̄wan̄ade ikereke iban̄a idemesie ikpọn̄îkpọn̄, koro enye anam an̄wan̄a ete: “Edieke owo ekededi anamde n̄kpọ ọnọ Mi, yak enye etiene Mi; ndien ebiet eke Ami ndude, asan̄autom Mi edidu do n̄ko. Edieke owo anamde n̄kpọ ọnọ Mi, Ete Mi eyekpono enye.” Nso utịbe utịbe utịp ke nditiene Jesus nnyụn̄ nnam n̄kpọ nnọ enye! Enye edi utịp owo ndidi se Ete okponode ke ndibuana ye Christ ke Obio Ubọn̄.

Ke ekerede aban̄a akwa ufen ye ubiak ubiak n̄kpa oro anade ebet enye, Jesus akaiso ete: “Ukpọn̄ otịmede Mi ke idem kemi, ndien ndidọhọ nso? Ete, nyan̄a Mi sio ke ubọk ini emi.” Ekpedide ẹkam ẹkeme ndikpan se inade ke iso ibet enye! Edi, baba, nte enye ọdọhọde ete: “Edi mma nsịm ini emi ke ntak emi.” Jesus odu ke n̄kemuyo ye ofụri ndutịm Abasi, esịnede n̄kpa uwa esiemọ. Matthew 21:​12, 13, 18, 19; Mark 11:​12-18; Luke 19:​45-48; John 12:20-⁠27.

▪ Ntak emi Jesus odoride enyịn ndikụt fig idem okposụkedi mîdịghe ini fig-⁠e?

▪ Ntak emi Jesus okotde mbon oro ẹnyamde n̄kpọ ke temple “mbon-n̄wo”?

▪ Ke nso usụn̄ ke Jesus ebiet n̄kpasịp ibokpot oro akpade?

▪ Didie ke Jesus ekere aban̄a ufen ye n̄kpa oro anade ebet enye?