Ibuot 125

Ọkpọsọn̄ Ubiak ke Eto

KE ADIANADE ye Jesus, ẹda inọ iba ẹka ndiwot. Ke mîyomke usụn̄ ikpọn̄ obio, udịm owo ẹtuak ẹda ke ebiet ẹkotde Golgotha, m̀mê Ebiet N̄kpọkpọrọ.

Ẹkpọk mbon n̄kpọkọbi oro edisịnen̄kpọ mmọ ke idem. Ekem ẹnọ wine oro ẹbuakde myrrh. Nte an̄wan̄ade, edi iban Jerusalem ẹnam enye, ndien mbon Rome idọhọke ẹkûnọ mbon oro ẹkọn̄de ke eto, n̄kpọ oro anamde ubiak osụhọde mi. Nte ededi, ke ini Jesus atabide, enye esịn ndin̄wọn̄. Ntak-a? Nte an̄wan̄ade, enye oyom ndidiọn̄ọ idem mfọn mfọn ke ini akakan idomo mbuọtidem esie emi.

Ẹnyanade Jesus kemi ẹnịm ke eto ye ubọk esie ẹbonode ke enyọn̄ ibuot esie. Mbonekọn̄ ndien ẹkọn̄ ikpọ okpukwak ẹdọn̄ ke ubọk ye ukot esie. Enye enen̄ede idem ye ubiak nte mme okpukwak oro ẹtịbide enye obụkidem ye osịp. Ke ini ẹmenerede eto oro ẹwụk, ubiak oro ototịm ọsọn̄ ubọk, koro udobi idem asiakde nde unan okpukwak oro. Edi, utu ke nditịn̄ ikọ ndịghe, Jesus ọbọn̄ akam aban̄a mbonekọn̄ Rome ete: “Ete, dahado nọ mmọ; koro mmọ mîfiọkke se mmọ ẹnamde.”

Pilate adian idiọn̄ọ ke eto oro, emi okotde ete: “Jesus a-Nazareth, Edidem Mme Jew.” Nte an̄wan̄ade, enye ewet n̄kpọ emi idịghe koro enye okponode Jesus ikpọn̄îkpọn̄ edi koro enye asuade mme oku Jew ke mmọ ndifịk enye ebiere ikpe n̄kpa ọnọ Jesus. Man kpukpru owo ẹkeme ndikot idiọn̄ọ oro, Pilate anam ẹwet enye ke usem ita—ke Hebrew, ke akpan usem Latin, ye ke ọsọ usem Greek.

Ikpọ oku, esịnede Caiaphas ye Annas, ẹkop mfụhọ. In̄wan̄în̄wan̄ ntọt oro abiat ini idara mmọ. Ntre mmọ ẹfan̄a ẹte: “Kûwet ete, Edidem mme Jew; edi wet ete, Enye ọkọdọhọ ete, Imọ idi Edidem mme Jew.” Ke okopde iyatesịt ke mme oku ndida enye nnam uduak mmọ, Pilate ọbọrọ ye uko uko emiom ete: “Se mma n̄kewet, mmewewet.”

Mme oku, ọkọrọ ye akwa otuowo, kemi ẹsop idem ke itie uwotowo oro, ndien mme oku ẹfan̄a ikọ ntiense idiọn̄ọ oro. Mmọ ẹfiak ẹtịn̄ ikọ ntiense nsu oro ẹkenọde ke mbemiso ke ikpe Sanhedrin. Idịghe n̄kpọ n̄kpaidem, ke nte, mme owo oro ẹsan̄ade ẹbe ẹtọn̄ọde nditịn̄ ikọ esuene, ẹnyen̄ede ibuot mmọ ke nsahi, ẹnyụn̄ ẹdọhọde ẹte: “O afo emi owụride temple onyụn̄ ọbọpde enye ke usen ita, nyan̄a idemfo! Edieke afo edide eyen Abasi, sụhọde ke eto ndutụhọ di!”—NW.

Ikpọ oku ye mme ufan mmọ ẹdide mbon ido ukpono ẹsịbe ẹdụk ẹte, “Enye akanyan̄a owo efen; ikemeke ndinyan̄a idem Esie. Enye edi Edidem Israel: yak enye osụhọde ke [eto ndutụhọ] idaha emi, ndien nnyịn iyenịm enye ke akpanikọ. Enye ọbuọt idem ye Abasi; yak Abasi anyan̄a enye idahaemi, edieke oyomde enye. Koro Enye ọkọdọhọ ete, Ndi Eyen Abasi.”

Ke edu emi omụmde, mbonekọn̄ n̄ko ẹsak Jesus nsahi. Mmọ ke nsahi ẹnọ enye mmamak wine, nte an̄wan̄ade ẹnyande ọniọn̄ akan n̄kpọkinua esie oro ama akasat. Mmọ ẹsụn̄i enye ẹte, “Edieke Afo edide Edidem mme Jew, nyan̄a Idem Fo.” Idem mme inọ--kiet oro ẹkọn̄de ke ubọk nnasia Jesus, ye enye eken ke ufien esie—ẹsak enye nsahi. Kere ban̄a oro! Akakan owo oro akanam odude uwem, ih, enyeemi akabuanade ye Jehovah Abasi ke ndibot kpukpru n̄kpọ, ebiere ndiyọ kpukpru esuene ẹmi!

Mbonekọn̄ ẹmen edisịnen̄kpọ Jesus ẹnyụn̄ ẹdeme mmọ ke itie inan̄. Mmọ ẹsịn afia man ẹfiọk m̀mê mmanie ẹdinyene mmọemi. Ekpri ọfọn̄idem, nte ededi, inyeneke ituak, sia edide eti ọfọn̄. Ntre mbonekọn̄ ẹdọhọ ye kiet eken ẹte: “Ẹyak nnyịn ikûsiak enyeemi, edi isịn afia, man ifiọk owo eke edinyenede enye.” Ntre, ye unana edidiọn̄ọ, mmọ ẹsu itien̄wed Abasi oro ọdọhọde ete: “Mmọ ẹdeme edisịnen̄kpọ Mi ke otu idemmọ, ẹnyụn̄ ẹsịn afia ẹban̄a ọfọn̄idem Mi.”

Nte ini akade, inọ kiet edifiọk ete ke anaedi Jesus ke akpanikọ edi edidem. Ntre, ke asuade ọnọ ufan esie, enye ọdọhọ ete: “Nte afo ufeheke Abasi, emi afo odude kpa ke ubiomikpe oro? Ndien ke akpanikọ nnyịn ikụt ufen eke enende: koro nnyịn ibọ utịp eke odotde ke edinam nnyịn: edi owo emi iduehe baba n̄kpọ kiet.” Ekem enye etịn̄ ikọ ye Jesus, eben̄ede ete: “Ti mi ke adan̄aemi Afo edide ndida ubọn̄.”

Jesus ọbọrọ ete, “Ke akpanikọ ke ndọhọ fi mfịn emi, afo eyedu ye ami ke Paradise.” (NW) Un̄wọn̄ọ emi eyesu ke ini Jesus akarade nte Edidem ke heaven onyụn̄ anamde anamidiọk oro akabarede esịt mi eset odụk uwem ke isọn̄ ke Paradise oro mme andibọhọ Armageddon ye nsan̄a mmọ ẹdinyenede ifet ndidiọn̄. Matthew 27:​33-44; Mark 15:​22-32; Luke 23:​27, 32-43; John 19:​17-24.

▪ Ntak emi Jesus esịnde ndin̄wọn̄ wine oro ẹsịnde myrrh?

▪ Nte an̄wan̄ade, ntak emi ẹdiande idiọn̄ọ ke eto ndutụhọ Jesus, ndien nso eneni ke emi edemede ke ufọt Pilate ye ikpọ oku?

▪ Nso esuene efen efen ke Jesus ọbọ ke eto ndutụhọ, ndien nte an̄wan̄ade nso inam emi ada itie?

▪ Didie ke prọfesi osu ke se ẹnamde ye mme edisịnen̄kpọ Jesus?

▪ Nso ukpụhọde ke inọ kiet anam, ndien didie ke Jesus edisu eben̄e esie?