Mme Demon Ẹsịn Udọn̄ Ẹnọ Edisọn̄ Ibuot ye Abasi
Ndusụk ido obio ẹkọn̄ọ ke nsu oro nte ke mme akpan̄kpa ẹkeme ndikụt nnyịn
Edi ntak emi Satan ye mme demon esie ẹnamde utom ọkpọsọn̄ ntre ndibian̄a mme owo? Koro mmọ ẹyom nnyịn idiana ye mmọ ke nsọn̄ibuot mmọ. Mmọ ẹyom nnyịn ituak ibuot inọ mmọ. Mmọ ẹyom nnyịn inịm nsu mmọ ke akpanikọ inyụn̄ inam mme n̄kpọ oro Jehovah mîmaha. Ediwak edinam ẹmi abuana mme ido obio oro ẹnyenede ebuana ye mme akpan̄kpa.
N̄kpa owo ima edi n̄kpọntịbe oro akamade ubiak ke n̄kan̄ ntụk, ndien ndifụhọ edi ndammana n̄kpọ ye se idotde. Ke ufan esie Lazarus ama akakpa, Jesus ama “atua eyet.”—John 11:35.
Ediwak ido obio ẹdu ẹmi ẹnyenede ebuana ye n̄kpa, ndien mmọemi ẹnyene ukpụhọde ntatara ntatara ke ofụri ererimbot. Ediwak mmọ ituahake ye mme edumbet Bible. Nte ededi, ndusụk edinam ẹkọn̄ọ ke ekikere oro nte ke mme akpan̄kpa ke ẹdu uwem ẹnyụn̄ ẹkeme ndikụt mme odu-uwem. Ukpeme-okpo, utie ikpo unana mfaraidem, ye ọkpọmiọk ọkpọmiọk usọrọ ubụkowo ẹkọn̄ọ ke ndịk ediyat spirit mme akpan̄kpa esịt. Edi sia mme akpan̄kpa ‘mîfiọkke baba n̄kpọ kiet,’ mbon oro ẹnamde mme utọ n̄kpọ oro ẹmenede nsu Satan ke enyọn̄.—Ecclesiastes 9:5.
Mme ido edinam eken ẹkọn̄ọ ke nsu oro nte ke mme akpan̄kpa ẹyom un̄wam ẹto nnyịn
Mme ido obio m̀mê mme usọrọ eken ẹtịbe ẹto edinịm oro ẹnịmde ke akpanikọ nte ke mme akpan̄kpa ẹyom un̄wam ẹto mme odu-uwem, ndien ke ẹyenọ mme odu-uwem unan edieke mîsụkke mmọ esịt. Ke ndusụk idụt ẹsidia usọrọ ẹnyụn̄ ẹwa uwa ke usen 40 m̀mê isua kiet ke owo ama akakpa. Ẹdọhọ ke emi eyen̄wam akpan̄kpa oro ‘ndibe n̄ka’ obio mme spirit. Ọsọ edinam efen edi ediduọn̄ọ udia ye ediduọk mmịn nnọ mme akpan̄kpa.
Mme n̄kpọ ẹmi ẹkwan̄a sia mmọ ẹmenerede mme nsu Satan ke enyọn̄, oro aban̄ade mme akpan̄kpa. Ndi Jehovah ekpenyịme nnyịn inam ido obio ekededi oro ọkọn̄ọde ke ukpepn̄kpọ mme demon? N̄wan̄ansa-o!—2 Corinth 6:14-18.
Mme asan̄autom Abasi akpanikọ inyeneke ebuana ndomokiet ye mme edinam oro ọnọde mme nsu Satan ibetedem. Utu ke oro, mmọ ke ima ima usụn̄ ẹsisịn idem ke ndin̄wam mme odu-uwem nnyụn̄ nnọ mmọ ndọn̄esịt. Mmọ ẹfiọk ẹte ke inikiet ekededi oro owo ama ekebe efep, ke edi Jehovah ikpọn̄îkpọn̄ ekeme ndin̄wam owo oro.—Job 14:14, 15.
Abasi Obiom Ubụpekpo Ikpe
Ndusụk owo ẹsinyene nneme nnennen nnennen ye mme demon mîdịghe ebe ke owo oro enyenede nsan̄a-ekpo. Ẹkot emi ubụpekpo. Uwa ibọk, ifọt, mfọni, utịn̄ ini iso, ye edibụp mme akpan̄kpa n̄kpọ, kpukpru ẹmi ẹdi orụk ubụpekpo.
Abasi asasua ndiọi n̄kpọ ẹmi. Enye oyom ẹnọ imọ san̄asan̄a utuakibuot.—Exodus 20:5
Bible omobiom mme n̄kpọ ẹmi ikpe, ọdọhọde ete: “Kûyak ẹkụt owo ke otu fo eke . . . [edide] abiaidiọn̄, ye abia-inuen, ye abia-mfa, ye abiaibọk, ye abiaibọk edịm, ye obụpidem, ye owo n̄kukụt, ye obụpekpo. Koro Jehovah esede kpukpru mmọ eke ẹnamde n̄kpọ ẹmi ke mbubiam.”—Deuteronomy 18:10-12.
Ntak emi Jehovah odụride nnyịn utọn̄ ọkpọsọn̄ ọkpọsọn̄ aban̄a mme edinam ẹmi-e?
Ke ufọn nnyịn, Jehovah omodụri nnyịn utọn̄ aban̄a kpukpru orụk ubụpekpo. Enye ama onyụn̄ ekere aban̄a mme owo, ndien enye ọfiọk ete ke mbon oro ẹnyenede ebuana ye mme demon ẹnyene ndibọ ufen.
Utọ owo oro kiet ekedi Nilda, emi ekedide enyene nsan̄a-ekpo ke Brazil. Mme demon ẹma ẹnam uwem esie edi uwem nditaha. N̄wan emi obụk ete: “Mme spirit . . . ẹma ẹdụk mi ke idem, ẹkamade mi ẹdọn̄ utom. Ndusụk ini nyediọn̄ọ idem ndusụk ini ndiọn̄ọke idem, ndien ẹma ẹda mme mfịna udọn̄ọ ibuot ẹbọp mi ẹtem. Mme demon ẹma ẹkọbọ mi ata etieti tutu eyedi se emi otụkde mme osịp mi. Mma nsida ibọk usụhọde ọkpọsọn̄ ubiak nnyụn̄ ntọn̄ọ ndin̄wọn̄ mmịn nnyụn̄ n̄n̄wọn̄ sika kpukpru ini. Emi ama akaiso ke ediwak isua.”
Mbon oro ẹnamde edinam ubụpekpo ẹsiwak ndibọ ufen idiọk idiọk. Mmọ ẹkeme nditaba ufọk mmọ, ifụre mmọ, idem uwem mmọ
Nte ini akade, ye un̄wam Jehovah ye Mme Ntiense esie ke isọn̄, Nilda ama ọbọhọ odudu demon ndien idahaemi enye eyedu inem inem uwem oro enyenede uduak. N̄wan emi ọdọhọ ete: “Ami mmesịn udọn̄ nnọ kpukpru owo nte ẹkûdede, ke idaha kiet ekededi, ẹnyene ebuana ye [ndiọi] spirit.”