Ikpehe 6

Ntak Emi Abasi Ayakde Ndutụhọ Odu

1, 2. Didie ke akpa ete ye eka nnyịn ẹkebiat eti ntọn̄ọ oro Abasi ọkọnọde mmọ?

NSO ikakwan̄a? Nso ikada itie oro akabiatde eti ntọn̄ọ oro Abasi ọkọnọde akpa ete ye eka nnyịn ke Paradise Eden? Ntak emi ukwan̄ido ye ndutụhọ ẹdude ke ediwak tọsịn isua utu ke emem ye n̄kemuyo eke Paradise?

² Ntak edi koro Adam ye Eve ẹkedade ifụre uduak mmọ ẹnam n̄kpọ ke idiọk usụn̄. Mmọ ẹma ẹfre akpanikọ oro nte ke owo ikobotke mmimọ ndikụt unen ke ẹsiode Abasi ye ibet esie ẹfep. Mmọ ẹma ẹbiere ndida ke idem n̄kpọn̄ Abasi, ẹkerede ẹte ke emi eyenam uwem mmimọ ọfọn akan. Ntre mmọ ẹma ẹbe adan̄a ifụre uduak oro Abasi okonịmde.—Genesis, ibuot 3.

Eneni Aban̄ade Itie Edikara Ofụri Ekondo

3-5. Ntak emi Abasi mîkakam isoboke Adam ye Eve inyụn̄ ifiak itọn̄ọ?

³ Ntak emi Abasi mîkakam isoboke Adam ye Eve inyụn̄ ifiak itọn̄ọ ye eren ye n̄wan efen-⁠e? Koro ẹma ẹmia ata ẹban̄a itie edikara ofụri ekondo esie, oro edi, unen esie ndikara oro owo mîkemeke ndimen mfep.

⁴ Mbụme ekedi: Anie enyene unen ndikara, ndien ukara anie enen? Enye ndidi ata ọkpọsọn̄ ye Andibot kpukpru edibotn̄kpọ ọnọ Abasi unen ndikara mmọ. Sia enye enyenede akakan ifiọk, ukara esie edi mfọnn̄kan ọnọ kpukpru edibotn̄kpọ. Edi idahaemi ẹma ẹmia ata ẹban̄a ukara Abasi. N̄ko, nte ama odu n̄kpọ emi akakwan̄ade ye edibotn̄kpọ esie​—⁠kpa owo? Nnyịn iyeneme ke ukperedem nte mbụme aban̄ade nsọn̄ọnda owo abuanade.

⁵ Ke owo ndida ke idem n̄kpọn̄ Abasi, mbụme efen ama abuana: Nte mme owo ẹkpekeme ndinam ọfọn akan edieke Abasi mîkarake? Andibot ke akpanikọ ama ọdiọn̄ọ ibọrọ, edi mfọnn̄kan usụn̄ owo ndifiọk emi ekedi ndiyak mmọ ẹnyene ọyọhọ ọyọhọ ifụre oro mmọ ẹkeyomde. Mmọ ẹkemek usụn̄uwem oro ke ifụre uduak idemmọ, ntre Abasi ama ayak emi ada itie.

6, 7. Ntak emi Abasi ayakde owo enyene ọyọhọ ifụre ke anyanini ntre?

⁶ Ke ndiyak mme owo ẹnyene ini oro okponde ekem ndidomo mme n̄kpọ nse ye ọyọhọ ọyọhọ ifụre, Abasi eyewụt ke kpukpru ini m̀mê mme owo ẹkpenam ọfọn akan ke idak ukara Abasi m̀mè ke idemmọ. Ndien ini oro ẹyakde ekpenyene ndiniọn̄ n̄kem man ayak mme owo ẹsịm se mmọ ẹkerede nte etịn̄e ke mme edinam ukaraidem, usiakifia, ifiọk ntaifiọk, ye ifiọk ibọkusọbọ mmọ.

⁷ Ke ntre, Abasi amayak owo enyene ọyọhọ ifụre tutu osịm eyo nnyịn man ẹwụt ye unana eyịghe ekededi m̀mê ukara owo oro adade ke idem ọkpọn̄ enye ekeme ndikụt unen. Ntem owo ama ekeme ndimek ke ufọt mfọnido ye nsọn̄ido, ke ufọt ima ye usua, ke ufọt edinen ido ye ukwan̄ido. Edi enye n̄ko ekenyene ndisak iso nse mme utịp edimek esie: eti ido ye emem m̀mê ukwan̄ido ye ndutụhọ.

Nsọn̄ibuot Mme Edibotn̄kpọ Eke Spirit

8, 9. (a) Didie ke nsọn̄ibuot ọkọtọn̄ọ ke ebietidụn̄ eke spirit? (b) Mmanie ke ẹsiode Adam ye Eve ẹfep ke Satan okonụk ndisọn̄ ibuot?

⁸ N̄kpọ efen odu ndikere mban̄a. Idịghe akpa ete ye eka nnyịn kpọt ẹkesọn̄ ibuot ye ukara Abasi. Edi mmanie efen ẹkedu ke ini oro? Mme edibotn̄kpọ eke spirit. Mbemiso Abasi okobotde owo, enye ama obot uduot uwem oro okon̄de akan, kpa ediwak ibat mme angel, ndidu uwem ke ebietidụn̄ eke heaven. Ẹkebot mmọ n̄ko ye ifụre uduak n̄ko ye udọn̄ ndisụk ibuot nnọ ukara Abasi.—Job 38:⁠7; Psalm 104:⁠4; Ediyarade 5:⁠11.

⁹ Bible owụt ete ke nsọn̄ibuot ekebemiso ọtọn̄ọ ke ebietidụn̄ eke spirit. Edibotn̄kpọ eke spirit kiet ama oyom ọyọhọ ọyọhọ ifụre. Enye ama akam oyom mme owo ẹtuak ibuot ẹnọ imọ. (Matthew 4:​8, 9) Ọsọn̄ibuot owo eke spirit emi ama onụk Adam ye Eve ndisọn̄ ibuot, ke nsu ọdọhọde ete ke Abasi ama odịp mmọ eti n̄kpọ. (Genesis 3:​1-⁠5) Ntre ẹkot enye Devil (Ọdọk-Edidọk) ye Satan (Asua). Ke ukperedem, enye ama atap mme edibotn̄kpọ eke spirit eken ndisọn̄ ibuot. Ẹkedidiọn̄ọ mmọ nte mme demon.—Deuteronomy 32:⁠17; Ediyarade 12:⁠9; 16:⁠14.

10. Nso ikosụn̄ọ ito nsọn̄ibuot eke edibotn̄kpọ edide owo ye eke spirit?

¹⁰ Mme owo, ke ndisọn̄ ibuot ye Abasi, ẹma ẹyak idemmọ ẹnọ odudu Satan ye mme demon esie. Oro edi ntak emi Bible okotde Satan “abasi eyo emi,” emi “akanamde ikike mmọ eke mînịmke ke akpanikọ okịm.” Ntem, Ikọ Abasi ọdọhọ ete ke “ofụri ererimbot onyụn̄ esịne ke ubọk andidiọk.” Jesus ke idemesie okokot Satan “ọbọn̄ ererimbot emi.”—2 Corinth 4:⁠4; 1 John 5:⁠19; John 12:⁠31.

Eneni Iba

11. Kaban̄a ewe eneni efen ke Satan akamia ata ye Abasi?

¹¹ Satan ama edemede eneni efen oro akamiade ata ye Abasi. Ke editịm ntịn̄, enye ọkọdọhọ ete ke Abasi ama anam ndudue ke usụn̄ oro Enye okobotde mme owo ye nte ke baba owo kiet idiyomke ndinam eti n̄kpọ ke ini ẹsịnde ke idak mfịghe. Ke akpanikọ, enye ọkọdọhọ ete ke idak idomo ke mmọ ẹyekam ẹsụn̄i Abasi. (Job 2:​1-⁠5) Ke usụn̄ emi Satan ama afan̄a aban̄a nsọn̄ọnda edibotn̄kpọ edide owo.

12-14. Didie ke ini ediyarade akpanikọ aban̄ade eneni iba oro Satan ekedemerede?

¹² Ke ntre, Abasi amayak ini oro okponde ekem odu ọnọ mme edibotn̄kpọ oro ẹnyenede ifiọk ndikụt nte ẹdibierede eneni emi ọkọrọ ye eneni oro aban̄ade itie edikara Abasi. (Men Exodus 9:16 domo.) Akpatre ifiọk n̄kpọntịbe eke mbụk owo eyeyarade akpanikọ aban̄ade eneni mbiba ẹmi.

¹³ Akpa kan̄a, nso ke ini ediyarade aban̄a eneni aban̄ade itie edikara ofụri ekondo, kpa unen ukara Abasi? Nte owo ekeme ndikara idemmọ ọfọn akan Abasi? Nte ndutịm ukara owo ekededi ke ẹsiode Abasi ẹfep eyeda inem inem ererimbot oro ọbọhọde ekọn̄, ubiatibet, ye ukwan̄ikpe edi? Nte ekededi eyesio unana efep onyụn̄ ọnọ kpukpru owo uforo? Nte ekededi eyekan udọn̄ọ, usọn̄, ye n̄kpa? Ẹketịm ukara Abasi ndinam kpukpru oro.—Genesis 1:​26-⁠31.

¹⁴ Kaban̄a udiana eneni, nso ke ini ediyarade aban̄a edidot oro edibotn̄kpọ edide owo odotde? Nte ekedi ndudue ọnọ Abasi ndikobot mme owo ke usụn̄ oro enye okobotde? Nte ekededi ke otu mmọ eyenam eti n̄kpọ ke idak idomo? Nte mme owo ekededi ẹyewụt ẹte ke mmimọ ima iyom ukara Abasi utu ke nda-ke-idem ukara owo?

[Ndise ke page 13]

Abasi amayak ini odu ọnọ mme owo ndisịm etịn̄e ke mme edinam mmọ

[Ebiet Ẹdade N̄kpọ Ẹto]

Ubomofụm: Ọkọn̄ọde ke foto NASA