Ikpehe 8
Uduak Abasi Asan̄a Ekpere Edisu
1, 2. Didie ke Abasi anam ndutịm ndisio ndutụhọ mfep?
ITIE edikara eke mme ọsọn̄ibuot owo ye mme demon omodụri ekpụk ubonowo ọnọ edem edem ke ediwak isua ikie. Edi, Abasi ifụmike ndutụhọ nnyịn. Utu ke oro, ke ofụri isua ikie ẹmi, enye ke ananam ndutịm ndisio mme owo mfep ke ufịk ukwan̄ido ye ndutụhọ.
2 Ke ini nsọn̄ibuot oro ke Eden, Abasi ama ọtọn̄ọ ndiyarade uduak esie nditịm ukara oro edinamde isọn̄ emi edi paradise ebietidụn̄ ọnọ mme owo. (Genesis 3:15) Ke ukperedem, nte akpan etịn̄ikọ ke ibuot Abasi, Jesus ama anam ukara Abasi oro edide mi edi ibuotikọ ukpepn̄kpọ esie. Enye ọkọdọhọ ete ke emi edidi n̄kukụre idotenyịn ubonowo.—Daniel 2:44; Matthew 6:9, 10; 12:21.
3. Nso ke Jesus okokot ukara isọn̄ oro edide, ndien ntak-a?
3 Jesus okokot ukara Abasi oro edide mi “Ubọn̄ Heaven,” sia akanade enye akara oto heaven. (Matthew 4:17) Enye n̄ko okokot enye “Ubọn̄ Abasi,” sia Abasi edide Anditịm enye. (Luke 17:20) Ke mme isua ikie ẹmi ẹkebede Abasi ama ọnọ mme ewetn̄wed esie odudu ndiwet mme prọfesi ẹban̄ade mbon oro ẹdinamde ukara oro ye se enye ediyọhọde.
Obufa Edidem Isọn̄
4, 5. Didie ke Abasi okowụt ete ke Jesus ekedi Edidem oro enye onyịmede?
4 Ekedi Jesus, ke ekperede tọsịn isua iba ẹmi ẹkebede, okosu ediwak prọfesi ẹmi ẹban̄ade enyeemi edidide Edidem Obio Ubọn̄ Abasi. Enye ama owụt nte idide enyeemi Abasi emekde ndidi Andikara ubonowo ke ukara eke heaven oro. Ndien ke enye ama akakpa, Abasi ama anam Jesus eset odụk uwem ke heaven nte okopodudu edibotn̄kpọ eke spirit oro mîkemeke ndikpa. Ediwak owo ẹma ẹdu oro ẹketiede ntiense ẹban̄a ediset esie ke n̄kpa.—Utom 4:10; 9:1-9; Rome 1:1-4; 1 Corinth 15:3-8.
5 Jesus ndien ama “osụhọde etetie ke ubọk nnasia Abasi.” (Mme Hebrew 10:12) Do enye ama ebet ini emi Abasi edinọde enye odudu ndinam n̄kpọ nte Edidem Obio Ubọn̄ Abasi eke heaven. Emi ama osu prọfesi oro ke Psalm 110:1, ke ebiet emi Abasi ọdọhọde enye ete: “Tie mi ke ubọk nnasia, tutu nda mme asua fo nnịm fi ke udoriukot.”
6. Didie ke Jesus okowụt ete ke imọ imodot ndidi Edidem Obio Ubọn̄ Abasi?
6 Ke adan̄aemi okodude ke isọn̄, Jesus ama owụt ete ke imọ imodot utọ idaha oro. Kpa ye ukọbọ, enye ama emek ndimụm nsọn̄ọnda esie ye Abasi n̄kama. Ke ndinam ntre, enye ama owụt ete ke Satan ama osu nsu ke ini enye ọkọdọhọde ete ke baba owo kiet idinamke akpanikọ inọ Abasi ke idak idomo. Jesus, kpa mfọnmma owo, ‘Adam ọyọhọ iba,’ ama owụt ete ke Abasi ikanamke ndudue ke ndibot mme mfọnmma owo.—1 Corinth 15:22, 45; Matthew 4:1-11.
7, 8. Nti n̄kpọ ewe ke Jesus akanam ke adan̄aemi okodude ke isọn̄, ndien nso ke enye akanam owụt?
7 Ewe andikara akananam akanam adan̄a eti n̄kpọ oro Jesus akanamde ke isua utom esie ifan̄ oro? Ke edisana spirit Abasi ọnọde odudu, Jesus ama ọkọk mbon udọn̄ọ, mbụn̄ọ, nnan, inan, imụm. Enye ama akam anam mme akpan̄kpa ẹset! Enye ama owụt ke ekpri udomo se imọ idinamde inọ ubonowo ke udomo eke ofụri ekondo ke ini imọ ididide ke odudu Obio Ubọn̄.—Matthew 15:30, 31; Luke 7:11-16.
8 Jesus ama anam ekese nti n̄kpọ ke adan̄aemi enye okodude ke isọn̄ tutu mbet esie John ọkọdọhọ ete: “Ediwak n̄kpọ en̄wen ẹnyụn̄ ẹdu ẹmi Jesus akanamde: ndien edieke ẹkpewetde mmọ kpukpru, etie mi nte kpa idem ererimbot ikpekemeke ndikọhọ se ẹwetde.”—John 21:25.a
9. Ntak emi mbon oro ẹnyenede esịt akpanikọ ẹkebụn̄ọde ẹtiene Jesus?
9 Jesus ama ọfọn ido onyụn̄ atua owo mbọm, enyenede ata akwa ima ọnọ mme owo. Enye ama an̄wam mme ubuene ye mbon oro ẹkefịkde, edi enye ikanamke asari ye mbon inyene m̀mê mme akama ikpọ itie. Mbon oro ẹnyenede esịt akpanikọ ẹma ẹyere ima ima ikot Jesus ke ini enye ọkọdọhọde ete: “Ẹtiene Mi, kpukpru mbufo ẹmi ẹkpade mba ẹnyụn̄ ẹbiomde edidobi mbiomo, ndien Ami nyenọ mbufo nduọkodudu. Ẹmen ọkpọnọ Mi ẹkọn̄ọ ke itọn̄ mbufo, ẹnyụn̄ ẹkpebe Mi; koro mmenyene ifụre ifụre ido nnyụn̄ nsụhọde idem ke esịt; ndien mbufo ẹyekụt nduọkodudu ẹnọ ukpọn̄ mbufo. Koro ọkpọnọ Mi ememem, mbiomo Mi onyụn̄ efefere.” (Matthew 11:28-30) Mme owo ẹmi ẹten̄ede Abasi ẹma ẹbụn̄ọ ẹtiene enye ẹnyụn̄ ẹsak iso ẹse itie edikara esie.—John 12:19.
Nsan̄a Mme Andikara
10, 11. Mmanie ẹdibuana ye Jesus ke ndikara isọn̄?
10 Ukem nte mme ukara owo ẹsinyenede nsan̄a mme akama ukara, ntre ke edi ye Obio Ubọn̄ Abasi eke heaven. Mbon efen ke ẹsiode Jesus ẹfep ẹyebuana ke ndikara isọn̄, koro Jesus ama ọn̄wọn̄ọ ọnọ mme n̄kpet n̄kpet nsan̄a esie ete ke mmọ ẹyetiene imọ ẹkara ubonowo.—John 14:2, 3; Ediyarade 5:10; 20:6.
11 Ntem, ke adianade ye Jesus, ẹmenam ekpri ibatowo n̄ko ẹset ẹdụk uwem eke heaven. Mmọ ẹnam Obio Ubọn̄ Abasi oro edidade mme nsinsi edidiọn̄ ọsọk ubonowo. (2 Corinth 4:14; Ediyarade 14:1-3) Ntre ke ofụri emana, Jehovah ama esịn itiat idakisọn̄ ọnọ itie edikara oro edidade mme nsinsi edidiọn̄ ọsọk ekpụk ubonowo.
Ukara Nda-ke-Idem Enyene Ndisịm Utịt
12, 13. Nso ke Obio Ubọn̄ Abasi idahaemi ebet ndinam?
12 Ke isua ikie emi Abasi emenyene ubọk nnennen ke mme mbubehe isọn̄. Nte Ikpehe 9 ke ekpri n̄wed emi edinemede, prọfesi Bible owụt ete ke ẹma ẹwụk Obio Ubọn̄ Abasi ke ubọk Christ ke 1914 ndien idahaemi ke ebet ndinuak ofụri editịm n̄kpọ Satan mfep. Obio Ubọn̄ oro odu ke mben̄eidem “[ndida] ubọn̄ ke otu mme asua [Christ].”—Psalm 110:2.
13 Kaban̄a emi prọfesi oro ke Daniel 2:44 ọdọhọ ete: “Ke eyo ndidem oro [ẹmi ẹdude idahaemi] Abasi enyọn̄ eyewụk obio ubọn̄ [ke heaven] emi owo mîdisoboke tutu amama, m̀mê ndiyak itie edikara esie nnọ mbon efen [owo idiyakke ukara owo ọtọn̄ọ ntak odu aba]. Enye [Obio Ubọn̄ Abasi] eyenuak kpukpru obio ubọn̄ ẹmi mbai mbai onyụn̄ ada utịt ọsọk mmọ, ndien enye eyeda ke nsinsi.”—Revised Standard Version.
14. Nso idi ndusụk ufọn ẹmi ẹdidide nte utịp utịt ukara owo?
14 Ke ẹmende kpukpru itie edikara ẹmi ẹdade ke idem ẹkpọn̄ Abasi ẹfep, ukara oro Obio Ubọn̄ Abasi akarade isọn̄ edidi ọyọhọ ọyọhọ. Ndien sia Obio Ubọn̄ emi akarade oto heaven, owo idikemeke ndibiat enye tutu amama. Odudu oro akarade edidu ke ebiet oro enye okodude ke akpa itie, ke heaven, ye Abasi. Ndien sia ukara Abasi edikarade ofụri isọn̄, owo ididaha mme nsunsu ido ukpono m̀mê ikpọ ifiọk owo ye mme ekikere ukaraidem oro mîkemke itụn owo ekededi usụn̄. Owo idiyakke baba n̄kpọ ẹmi kiet odu.—Matthew 7:15-23; Ediyarade, ibuot 17 osịm 19.
[Mme ebiet ẹdade n̄kpọ ẹto]
a Kaban̄a ọyọhọ mbụk uwem Jesus, se n̄wed oro Akakan Owo Oro Akanam Odude Uwem, emi Watchtower Society ekemịn̄de ke 1991.
[Ndise ke page 18]
Ke adan̄aemi okodude ke isọn̄ Jesus ama ọkọk mbon udọn̄ọ onyụn̄ anam mme akpan̄kpa ẹset man owụt se enye edinamde ke obufa ererimbot
[Ndise ke page 19]
Obio Ubọn̄ Abasi eke heaven eyenuak kpukpru orụk ukara ẹmi ẹdade ke idem ẹkpọn̄ enye