Ukpepn̄kpọ 12
Ndiwụt Ukpono nnọ Uwem ye Iyịp
Didie ke nnyịn ikpese uwem? (1) usion̄o idịbi? (1)
Didie ke mme Christian ẹsiwụt ke mmimọ imekpeme mbak idida unan m̀mê idinọ owo unan? (2)
Ndi akwan̄a ndiwot mme unam? (3)
Nso idi ndusụk edinam ẹmi mîwụtke ukpono inọ uwem? (4)
Nso idi ibet Abasi kaban̄a iyịp? (5)
Ndi emi esịne mme edikịm iyịp nsịn ke idem? (6)
1. Jehovah edi Ntọn̄ọ uwem. Kpukpru oduuwem n̄kpọ ẹnyene uwem mmọ ẹto Abasi. (Psalm 36:9) Uwem edi edisana ọnọ Abasi. Idem uwem eyen oro mîmanake kan̄a ke esịt idịbi eka esie edi ọsọn̄urua n̄kpọ ọnọ Jehovah. Ndikokoi n̄wot utọ nsekeyen oro ọkọride mi akwan̄a ke enyịn Abasi.—Exodus 21:22, 23; Psalm 127:3.
2. Mme ata Christian ẹsinen̄ede ẹkpeme mbak ẹdida unan m̀mê ẹdinọ owo unan. Mmọ ẹsikụt ẹte ke moto ye ufọk mmimọ idịghe n̄kpọndịk inọ owo. (Deuteronomy 22:8) Mme asan̄autom Abasi isisioho uwem mmọ inyan inọ n̄kpọndịk nte mîdotke n̄kukụre ke ntak inemesịt m̀mê nduaidem oro odude. Ntre mmọ isibuanake ke afai afai mbre mbuba ẹmi ẹkoide-koi ẹnọ mbon en̄wen unan. Mmọ ẹsifep unọ idem inemesịt oro esịnde udọn̄ ọnọ afai.—Psalm 11:5; John 13:35.
3. Uwem unam n̄ko edi edisana ọnọ Andibot. Christian ekeme ndiwot unam man enyene udia ye edisịnen̄kpọ m̀mê ndikpeme idemesie nsio ke udọn̄ọ ye n̄kpọndịk. (Genesis 3:21; 9:3; Exodus 21:28) Edi akwan̄a ndinam n̄kpọ ke idiọk usụn̄ ye mme unam m̀mê ndiwot mmọ n̄kukụre nte n̄kpọ imam m̀mê ndinọ idem inemesịt.—Mme N̄ke 12:10.
4. Edin̄wọn̄ sika, edita isịp betel, ye edida n̄kpọsọn̄ ibọk ke ntak inemesịt inyeneke mme Christian. Mme edinam ẹmi ẹkwan̄a koro (1) mmọ ẹnam nnyịn idi ifịn inọ mmọ, (2) mmọ ẹnọ idem nnyịn unan, ndien (3) mmọ isanake. (Rome 6:19; 12:1; 2 Corinth 7:1) Ekeme ndisọn̄ ata etieti nditre ido ẹmi. Edi nnyịn inyene ndinam ntre man inem Jehovah esịt.
5. Iyịp edi n̄ko edisana ke enyịn Abasi. Abasi ọdọhọ ke ukpọn̄, m̀mê uwem, odu ke iyịp. Ntre akwan̄a ndidia iyịp. Akwan̄a n̄ko ndita unam oro owo mîkọyọkke itọn̄ man iyịp ọwọrọ nte odotde. Edieke ẹyịride-yịri unam ẹwot m̀mê akpade ke afia, owo ikpenyeneke ndita enye. Edieke ẹtọde enye ke eduat m̀mê ẹtopde ke ikan̄, ana ẹsọsọp ẹyọk itọn̄ man iyịp ọwọrọ edieke ẹnyenede ndita enye.—Genesis 9:3, 4; Leviticus 17:13, 14; Utom 15:28, 29.
6. Ndi akwan̄a ndibọ edikịm iyịp nsịn ke idem? Ti ete, Jehovah oyom nnyịn ibet iyịp. Emi ọwọrọ ke inaha nnyịn ibọ iyịp mbon en̄wen m̀mê idem iyịp nnyịn oro ẹkesiode ẹnịm isịn ke idem nnyịn ke usụn̄ ndomokiet ekededi. (Utom 21:25) Ntre mme ata Christian idibọhọ edikịm iyịp nsịn ke idem. Mmọ ẹyebọ orụk usọbọ efen ekededi, utọ nte edikịm mme n̄kpọ oro iyịp mîsịneke nsịn ke idem. Mmọ ẹyom ndidu uwem, edi mmọ ididomoke ndinyan̄a uwem mmọ ebe ke ndibiat ibet Abasi.—Matthew 16:25.
[Mme ndise ke page 25]
Man inem Abasi esịt, ana nnyịn ifep mme edikịm iyịp nsịn ke idem, mme ido oro mîsanake, ye mme n̄kpọndịk oro mîdotke