Mbụk Obio Ubọn̄ Nọ. 35

Ndi Tutu Amama Kpukpru Owo Ẹyema Kiet Eken?

Ima Mbọhọidụn̄ Omosụhọde

EDIWAK miliọn owo inyeneke un̄wam ẹnyụn̄ ẹdu ke nnanenyịn, inyeneke ebiet ndika kaban̄a un̄wam. N̄wan oro ekesinamde mbubehe idemesie oro mînamke utom aba ọkọdọhọ ete: ‘Mbubịteyo kiet ebeakpa oro odụn̄de ke ufọkenyọn̄ oro ndụn̄de ama ọkọn̄ enyịnusụn̄ mi onyụn̄ ọdọhọ ke imọ ikop ndobo. Mma nsian enye ke mfọnido edi in̄wan̄în̄wan̄ nte ke nnyeneke ini. Enye ama ekpe mi ubọk ke ndikafịna mi onyụn̄ ọnyọn̄.’

Ke mfụhọ, okoneyo oro, ebeakpa oro ama owot idem. Ke oro ebede, n̄wan anam mbubehe idemesie oro ama ọdọhọ ete ke imọ ima ikpep “n̄kpọ ke ọkpọsọn̄ usụn̄.”

Unana ima mbọhọidụn̄ esiwak ndidi n̄kpọ mmọn̄eyet. Ke ini ekọn̄ eke ekpụk ke Bosnia ye Herzegovina, ke akpa ekedide ubak Yugoslavia, ẹma ẹnyịk se ibede owo miliọn kiet ẹsio ke ufọk mmọ ẹnyụn̄ ẹwot ediwak tọsịn ke mme itie duop. Mmanie ẹkenam emi? “Mme mbọhọidụn̄ nnyịn,” ntem ke n̄kaiferi emi ẹkebịnde ẹsio ke obio mmọ ekeseme. “Nnyịn ima idiọn̄ọ mmọ.”

Ke Rwanda ẹma ẹwot ediwak tọsịn owo ke mme itie ikie, ediwak ini mme mbọhọidụn̄ mmọ ẹkewot. “Hutu ye Tutsi [ẹkedụn̄] ọtọkiet, ẹdọde kiet eken, ikereke iban̄a m̀mê idem ndidiọn̄ọ m̀mê anie ekedi owo Hutu m̀mê anie okonyụn̄ edi owo Tutsi,” ntem ke The New York Times ọkọtọt. “Ekem n̄kpọ ama okpụhọde inikiet inikiet,” ndien “uwotowo ama ọtọn̄ọ.”

Kpasụk ntre, mme Jew ye mbon Arab ke Israel ẹdụn̄ ọtọkiet, edi ediwak ẹsua kiet eken. Ukem idaha oro odu ke ufọt ediwak mbon Catholic ye Protestant ke Ireland ye ediwak owo oro ibat ọkọride-kọri ke mme idụt en̄wen. Akananam ke mbụk ima inanake ntem ke ererimbot.

Ntak Emi Ima Mbọhọidụn̄ Osụhọrede?

Andibot nnyịn ọnọ ibọrọ. Ikọ esie, kpa Bible, okot ini oro nnyịn idude uwem “ukperedem ini.” Emi edi ini emi, nte prọfesi Bible ọdọhọde, mme owo ‘ẹdinanade ima uduotowo.’ Kaban̄a “ndiọkeyo” ẹmi, ẹkotde n̄ko ke N̄wed Abasi “akpatre ini eyo emi,” Jesus Christ ama ebem iso etịn̄ ete ke “ima ediwak owo oyosụhọde.”—2 Timothy 3:1-5; Matthew 24:3, 12.

Ke ntre, unana ima mfịn edi ubak uyarade nte ke nnyịn idu uwem ke ukperedem ini ererimbot emi. Ke inemesịt, ọwọrọ n̄ko ete ke edinen obufa ererimbot emi ima akarade ọyọsọp ada itie ererimbot mbon unana uten̄e Abasi emi.—Matthew 24:3-14; 2 Peter 2:5; 3:7, 13.

Edi ndi nnyịn imenen̄ede inyene ntak ndinịm ke akpanikọ nte ke utọ ukpụhọde oro ayada itie—nte ke kpukpru owo ẹkeme ndikpep ndima kiet eken nnyụn̄ ndu uwem ọtọkiet ke emem ye kiet eken?

Ima Mbọhọidụn̄—Ata Idem N̄kpọ

“Anie edi mbọhọidụn̄ mi nan̄a?” ekpeibet akpa isua ikie okobụp Jesus. Nte eyịghe mîdụhe enye okodori enyịn Jesus ndidọhọ, ‘Ekemmọ mme Jew.’ Edi ke mbụk aban̄ade owo Samaria ekenyenede edu mbọhọidụn̄, Jesus ama owụt ete ke mme owo ẹtode idụt efen ẹdi mme mbọhọidụn̄ nnyịn n̄ko.—Luke 10:29-37; John 4:7-9.

Jesus ama ọsọn̄ọ etịn̄ ete ke, adianade ye ima Abasi, ima mbọhọidụn̄ ekpenyene ndikara uwem nnyịn. (Matthew 22:34-40) Edi ndi akanam otu owo ekededi ẹnen̄ede ẹma mme mbọhọidụn̄ mmọ? Mme akpa Christian ẹma ẹma! Ẹma ẹfiọk mmọ ke ima oro mmọ ẹkenyenede ẹnọ mbon en̄wen.—John 13:34, 35.

Nso kaban̄a mfịn? Ndi owo ekededi owụt mbiet ima Christ? Encyclopedia Canadiana ọdọhọ ete: “Utom Mme Ntiense Jehovah edi edifiak ndemede ye edifiak ntọn̄ọ Ido Ukpono Christ eke eset oro Jesus ye mme mbet esie ẹkenamde . . . Kpukpru mmọ ẹdi nditọete.”

Nso ke oro ọwọrọ? Ọwọrọ ete ke Mme Ntiense Jehovah iyakke n̄kpọ ndomokiet—edide idaha eke orụk, eke idụt, m̀mê eke ekpụk—anam mmọ ẹsua mme mbọhọidụn̄ mmọ. Mmọ idinyụn̄ iwotke owo ekededi, koro mmọ ke ndamban̄a usụn̄ ẹmeda ofụt mmọ ẹdom n̄kpọ ufụn̄isọn̄ ẹnyụn̄ ẹda eduat mmọ ẹdom ikwa udiọn̄ vine. (Isaiah 2:4) Ke akpanikọ, ẹdiọn̄ọ Mme Ntiense ke ndinam usio-ukot ndin̄wam mme mbọhọidụn̄ mmọ.—Galatia 6:10.

Eyịghe idụhe uwetn̄kpọ ewetmbụk n̄kpọntịbe kiet ke Sacramento Union eke California ọkọdọhọde ete: “Enen ndidọhọ nte ke edieke ofụri ererimbot ẹkpedade ikọ mbuọtidem Mme Ntiense Jehovah ẹsịn ke edinam uduọkiyịp ye usua ẹkpetre, ndien ima akpakara nte edidem.” Ewetn̄wed ke magazine Ring eke Hungary ọkọdọhọ ete: “Mmedisịm ubiere nte ke edieke ekpedide Mme Ntiense Jehovah kpọt ẹdu ke isọn̄, ekọn̄ ẹkpetre ndidu, ndien n̄kukụre utom oro mme bodisi ẹkpenamde ekpedi ndinọ mme moto ndausụn̄ nnyụn̄ nnọ mme n̄wedisan̄.”

Nte ededi, nte ẹnyịmede, oyoyom ukpụhọde ke ofụri ererimbot edieke anade kpukpru owo ẹma kiet eken. Ukpụhọde oro edisan̄a didie edi? (Mbọk se page ikpaedem.)

Ke Ini Kpukpru Owo Ẹdimade Kiet Eken

Akam oro Jesus Christ ekekpepde owụt ete ke ndyọ ndyọ ukpụhọde emekpere. Ke ọwọrọetop Ukwọrọikọ esie oro ke Obot, Jesus ama ekpep nnyịn ete ibọn̄ akam ite: “Yak obio ubọn̄ fo edi. Yak ẹnam uduak fo ke isọn̄, kpa nte ẹnamde ke heaven.”—Matthew 6:10, King James Version.

Nso idi Obio Ubọn̄ Abasi? Enye edi ata ukara, kiet emi akarade oto heaven. Oro edi ntak ẹkotde enye “Ubọn̄ Heaven.” Ete ememek Jesus, kpa “Ọbọn̄ Emem,” ete edi andikara ke enye.—Matthew 10:7; Isaiah 9:6, 7; Psalm 72:1-8.

Ke ini Obio Ubọn̄ Abasi edide, nso iditịbe inọ ererimbot emi ọyọhọde ye usua mi? “[Obio] ubọn̄” oro “ayanuak onyụn̄ ama” kpukpru ukara n̄wo ererimbot emi. (Daniel 2:44) Bible anam an̄wan̄a ete: “Ererimbot ke ebebe efep . . . ; edi owo eke anamde se Abasi amade ododu ke nsinsi.”—1 John 2:17.

Kaban̄a obufa ererimbot Abasi, Bible ọdọhọ ete: “Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.” (Psalm 37:9-11, 29; Mme N̄ke 2:21, 22) Nso ubọn̄ ubọn̄ ini ke oro edidi ntem! “N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba.” (Ediyarade 21:4) Mme akpan̄kpa ẹyekam ẹfiak ẹdu uwem, ndien ẹyenam ofụri isọn̄ akabade edi ataata paradise.—Isaiah 11:6-9; 35:1, 2; Luke 23:43; Utom 24:15.

Man idu uwem ke obufa ererimbot Abasi, ana nnyịn ima kiet eken, kpa nte Abasi ekpepde nnyịn ndinam. (1 Thessalonica 4:9) Eyen ukpepn̄kpọ Bible Edem Usiahautịn ọkọdọhọ ete: “Nsak iso nse ini emi, nte Bible ọn̄wọn̄ọde, kpukpru owo ẹma ẹkekpep ndima kiet eken.” Ndien nnyịn imekeme nditịm nnịm nte ke Abasi oyosu mme un̄wọn̄ọ esie! “N̄kọm mma ndọhọ,” ntem ke enye ọdọhọ, “nyonyụn̄ nnam enye edi n̄ko.”—Isaiah 46:11.

Edi man adara mme edidiọn̄ ke idak Obio Ubọn̄ Abasi, ana afo enyene ifiọk Bible, nte ediwak miliọn owo ke ofụri ererimbot oro ẹnyenede esịt akpanikọ ẹnamde. (John 17:3) Ediye uduot ekpri n̄wed oro enyenede page 32 do Nso ke Abasi Oyom Oto Nnyịn? ayan̄wam fi. Emekeme ndibọ idem kiet ebe ke ndiwet n̄kpọ nyọhọ ekebe oro odude ke page oro osụk ebede nnyụn̄ nnọ ẹsọk adres oro ekperede fi akan.

□ N̄kpama ndifiọk nte ndisan̄ade nnyene ediye uduot ekpri n̄wed oro Nso ke Abasi Oyom Oto Nnyịn?

□ Mbọk ẹsobo ye ami kaban̄a ukpepn̄kpọ Bible mfọn.

[Ebiet Ẹdade Ndise Ẹto ke page 2]

Owo emi edịbede otop owo ye ubụkowo ke Bosnia: Reuters/Corbis-Bettmann