N̄wọrọnda Idotenyịn!
“Owo ekededi eke odude uwem onyụn̄ ọbuọtde idem ye Ami idikpaha ke nsinsi.”—JOHN 11:26.
1. Ẹdinam ediwak miliọn owo oro ẹkpade idahaemi ẹset ẹdidụk mme orụk n̄kann̄kụk ewe?
KE INI ẹdinamde ediwak miliọn owo ẹset ke n̄kpa, owo idinamke mmọ ẹfiak ẹdidu uwem ke isọn̄ oro owo mîdụhe. (Utom 24:15) Mmọ ẹdidemede ke ndiye n̄kann̄kụk oro ẹdiọn̄de ẹyenyụn̄ ẹkụt ẹte ke ẹmetịm mme itieidụn̄, ọfọn̄, ye akpakịp udia ẹnọ mmimọ. Mmanie ẹdinam kpukpru ndutịm ẹmi? Nte an̄wan̄ade, mme owo ẹyedụn̄ ke obufa ererimbot mbemiso ediset ke n̄kpa eke isọn̄ ọtọn̄ọde. Edi mmanie?
2-4. Nso n̄wọrọnda idotenyịn ana ebet mbon oro ẹdude uwem ke “ukperedem ini”?
2 Edisu oro prọfesi Bible osude owụt ete ke nnyịn idu uwem ke “ukperedem ini” eke editịm n̄kpọ emi.a (2 Timothy 3:1) Ke mîbịghike ke emi, Jehovah Abasi ọmọn̄ esịbe odụk mme mbubehe owo onyụn̄ ọsọhi idiọkido efep ke isọn̄. (Psalm 37:10, 11; Mme N̄ke 2:21, 22) Ke ini oro, nso iditịbe inọ mbon oro ẹnamde n̄kpọ Abasi ke edinam akpanikọ?
3 Jehovah idisoboke nti ye ndiọi owo. (Psalm 145:20) Akananam enye inamke orụk n̄kpọ oro, enye idinyụn̄ inamke ke ini anamde isọn̄ asana ọbọhọ idiọkido. (Men Genesis 18:22, 23, 26 domo.) Ke akpanikọ, akpatre n̄wed Bible etịn̄ aban̄a “akwa otu owo, eke baba owo kiet mîkemeke ndibat, eke ẹtode ke kpukpru obio ye esien ye idụt ye usem,” ẹtode ke “akwa ukụt” ẹwọn̄ọ. (Ediyarade 7:9-14) Ih, akwa udịmowo ẹyebọhọ akwa ukụt emi edidade utịt ọsọk idiọk editịm n̄kpọ emi, ndien mmọ ẹyedụk obufa ererimbot Abasi. Do, okopitem ubonowo ekeme ndibọ ufọn ọyọhọ ọyọhọ nto utịbe utịbe ndutịm Abasi ndinam ubonowo ọbọhọ idiọkn̄kpọ ye n̄kpa. (Ediyarade 22:1, 2) Ntem, “akwa otu owo” ididehede itabi n̄kpa. Nso n̄wọrọnda idotenyịn!
4 Nte nnyịn imekeme ndinyene mbuọtidem ke akpa-owo-idem idotenyịn emi? Ọyọhọ ọyọhọ! Jesus Christ ke idemesie ama owụt ete ke oyodu ini emi mme owo ẹdidude uwem ye unana edikpa ke nsinsi. Esisịt ini mbemiso akanamde Lazarus ufan esie eset, Jesus ama ọdọhọ Martha ete: “Owo ekededi eke odude uwem onyụn̄ ọbuọtde idem ye Ami idikpaha ke nsinsi.”—John 11:26.
Afo N̄ko Emekeme Ndidu Uwem ke Nsinsi
5, 6. Edieke afo oyomde ndidu uwem ke nsinsi ke Paradise ke isọn̄, nso ke akpana afo anam?
5 Ndi omoyom ndidu uwem ke nsinsi ke Paradise ke isọn̄? Ndi ọdọn̄ fi ndifiak n̄kụt mbonima fo? Do ana afo enyene nnennen ifiọk aban̄a uduak Abasi. Ke akam ọkọbọn̄de ọnọ Abasi, Jesus ọkọdọhọ ete: “Ndien nsinsi uwem oro edi ndifiọk Fi, ata Abasi kierakiet, ye Enye emi Afo ọkọdọn̄de, kpa Jesus Christ.”—John 17:3.
6 Edi uduak Abasi nte “kpukpru owo ẹnyene edinyan̄a, ẹnyụn̄ ẹsịm ifiọk akpanikọ.” (1 Timothy 2:3, 4) Idahaemi edi ini ndikpep nte afo, adianade ye ediwak miliọn owo eken oro ẹma ẹkenanam uduak Abasi, ẹkemede ndidu uwem ke nsinsi ke Paradise ke isọn̄. Mme Ntiense Jehovah ẹyenem esịt ndin̄wam fi ke ndikpep n̄kpọ efen efen mban̄a Abasi ye se enye oyomde. Ntak mûsoboke ye mmọ ke Ufọkmbono Obio Ubọn̄ ekperede fi mîdịghe ewet n̄wed ọnọ ẹsọk adres ekperede fi akan oro ẹwụtde ke page oro etienede?
[Ikọ idakisọn̄]
a Se Ifiọk Oro Adade Osịm Nsinsi Uwem, page 98-107, emi Watchtower Bible and Tract Society of New York, Inc., osiode.
[Ndise ke page 31]
Idiyomke “akwa otuowo” ẹtabi n̄kpa