Oyom Afo Ekpep N̄kpọ Aban̄a Abasi

Man edi ufan Abasi, oyom afo ekpep n̄kpọ aban̄a enye. Nte mme ufan fo ẹfiọk enyịn̄ fo ẹsinyụn̄ ẹkot enye? Mmọ ẹfiọk. Abasi oyom afo ọfiọk onyụn̄ okot enyịn̄ imọ. Enyịn̄ Abasi edi Jehovah. (Psalm 83:18; Matthew 6:9) Ana afo ekpep n̄ko aban̄a se enye amade ye se enye asuade. Oyom afo ọfiọk mbon ẹmi ẹdide mme ufan ye mbon ẹmi ẹdide mme asua esie. Esida ini ndidiọn̄ọ owo. Bible ọdọhọ ete ke owụt eti ibuot ndisio ini nnịm ndikpep n̄kpọ mban̄a Jehovah.—Ephesus 5:15, 16.

Mme ufan Abasi ẹnam se inemde enye esịt. Kere ban̄a mme ufan fo. Edieke afo anamde n̄kpọ ye mmọ idiọk idiọk onyụn̄ anamde mme n̄kpọ oro mmọ ẹsuade, nte mmọ ẹyeka iso ndidi mme ufan fo? Ke akpanikọ ididịghe! Ke ukem usụn̄ oro, edieke afo oyomde ndidi ufan Abasi, oyom afo anam se inemde enye esịt.—John 4:24.

Idịghe kpukpru ido ukpono ẹda owo ẹsịm edinyene itie ufan ye Abasi. Jesus, emi edide ata n̄kpet n̄kpet ufan Abasi, ama etịn̄ aban̄a ọkpọusụn̄ iba. Ọkpọusụn̄ kiet an̄wan̄wan̄a, mme owo ẹnyụn̄ ẹwak ke esịt. Usụn̄ oro ada aka nsobo. Ọkpọusụn̄ enye eken afafaha ndien mme andisan̄a ke enye iwakke. Usụn̄ oro ada aka nsinsi uwem. Emi ọwọrọ ete ke edieke afo oyomde ndinyene itie ufan ye Abasi, ana afo ekpep nnennen usụn̄ ndituak ibuot nnọ enye.—Matthew 7:13, 14.