Eti Mbụk Oro Mmọ Ẹyomde Fi Okop

KE INI Jesus okodude ke isọn̄, mme mbet ẹma ẹka ẹbịne enye ẹkebụp ẹte: “Nso idinyụn̄ idi idiọn̄ọ edidi fo ye eke akpatre ini eyo emi?” Enye ọkọbọrọ ete ke mme ekọn̄ oro ẹbuanade ediwak idụt ẹyedu, akan̄, idiọk udọn̄ọ, unyekisọn̄, n̄kọri ukwan̄ido, mme andikpep nsunsu ido ukpono ẹnamde ediwak owo ẹwaha ẹkpọn̄ usụn̄, usua ye edikọbọ mme ata anditiene enye, ye ima edinen ido eke ediwak owo ndisụhọde. Ke ini mme n̄kpọ emi ẹketọn̄ọde nditịbe, enye okowụt edidu Christ oro enyịn mîkwe ye nte ke Obio Ubọn̄ heaven ama asan̄a ekpere. Emi ekedi mbụk—kpa eti mbụk! Ke ntre Jesus ama adian mme ikọ emi nte ubak idiọn̄ọ oro: “Ẹyenyụn̄ ẹkwọrọ gospel [“eti mbụk,” NW] Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.”—Matthew 24:3-14.

Mme n̄kpọntịbe ererimbot eke ndondo emi ke idemmọ ẹdiọk, edi se mmọ ẹdade ẹban̄a edi eti, oro edi, edidu Christ. Mme idaha ẹtịn̄de ke enyọn̄ emi ẹma ẹtọn̄ọ ndina in̄wan̄în̄wan̄ ke isua 1914 oro ẹketan̄ade ntatara ntatara! Enye ekenịm utịt Ini Mme Gentile ye ntọn̄ọ ini edibe ke ukara owo ndụk Tọsịn Isua Ukara Christ idiọn̄ọ.

Psalm 110, Ps 110 ufan̄ikọ 1 ye 2, ye Ediyarade 12:7-12 ẹwụt nte ke akana ini ukpụhọde odu. Ẹwụt do nte ke Christ editie ke ubọk nnasia Abasi ke heaven tutu esịm ini oro enye akabarede edi Edidem. Adan̄aoro ekọn̄ ke heaven oyosụn̄ọ ke edisio Satan nduọk ke isọn̄, adade nnama ọsọk isọn̄, ndien Christ ayakara ke ufọt mme asua esie. “Akwa ukụt” ayada ọyọhọ utịt ọsọk idiọkido, adade ekesịm ekọn̄ Har–magedon ndien Tọsịn Isua Ukara Christ eke emem eyetiene.—Matthew 24:21, 33, 34; Ediyarade 16:14-16.

Bible ọdọhọ ete: “Edi fiọk emi, ete ndiọk eyo oyodu ke ukperedem ini. Koro mme owo ẹyedi mme ama idem, ye mme ama inyene; ẹnyụn̄ ẹbụre idiọk mbụre, ẹseri iseri, ẹsụn̄i isụn̄i, ẹsọn̄ ibuot ye ete ye eka, ẹnana esịt ekọm, ẹnana uten̄e Abasi, ẹnana ima uduot owo; ẹnyụn̄ ẹbiat un̄wọn̄ọ, ẹma ebiari, ẹyak idiọk itọn̄ akan mmọ ubọk, ẹtie obom-obom, ẹnyụn̄ ẹsua se ifọnde; mmọ ẹdi mme ada owo nnọ mme asua, ye mbon idiọk iwụk, ye mbon n̄kohodeidem; mmọ ẹma mbre ẹkan Abasi; ẹnyene enyọn̄-enyọn̄ ido uten̄e Abasi, edi isan̄ake n̄kpọ ye odudu eke odude ke uten̄e Abasi. Wọn̄ọde kpọn̄ mmọ eke ẹtiede ntem.”—2 Timothy 3:1-5.

Ndusụk owo ẹkeme ndineni nte ke mme n̄kpọ emi ẹma ẹtetịbe ke mbụk ubonowo, edi akpanikọ edi nte ke akananam mmọ itịbeke ke ukem udomo oro. Nte mme ewetmbụk eset ye mme etịn̄ n̄kpọ mban̄a n̄kpo ẹdọhọde, akananam idụhe ini ke isọn̄ oro ebietde enye oro mme owo ẹsobode tọn̄ọ ke 1914 ka iso. (Se page 7.) Mme nnama emi ẹtịm ẹtara ẹkan nte akanam edide. Akan oro, amaedi mme ikpehe eken ke idiọn̄ọ Christ aban̄ade ukperedem ini, ẹkpenyene ndikere mban̄a mme akpan n̄kpọ emi: Ẹmetan̄a edidu Christ ye Obio Ubọn̄ ke ofụri ererimbot ke anana-mbiet udomo ke mbụk owo. Ukọbọ ke ntak ukwọrọikọ akanam ikponke nte se isịmde Mme Ntiense Jehovah. Ẹma ẹwot ediwak mmọ ke mme itie ikie ke mme itienna ekikere Nazi. Tutu esịm mfịn emi Mme Ntiense Jehovah ẹdu ke ukpan ke ndusụk itie, ndien ke mme itie efen ẹmemụm mmọ, ẹdọn̄ ke ufọk-n̄kpọkọbi, ẹtụhọde, ẹnyụn̄ ẹwot. Kpukpru emi edi ubak idiọn̄ọ oro Jesus ọkọnọde.

Nte ẹkebemde iso ẹtịn̄ ke Ediyarade 11:18, ‘mme idụt ẹmeyat esịt’ ye mme anam-akpanikọ Ntiense Jehovah, ndien emi owụt nte ke Jehovah oyowụt mme idụt oro ‘iyatesịt esie.’ Ukem itien̄wed Abasi emi ọdọhọ ke Abasi ‘oyosobo mmọ emi ẹsobode isọn̄.’ Akananam idụhe ini ke mbụk ubonowo oro ẹsịnde ukeme isọn̄ ndimụm uwem n̄kama ke itiendịk. Nte ededi, enye okpụhọde idahaemi! Ediwak ntaifiọk ẹtọt ẹte ke edieke owo akade iso ndibiat isọn̄, enye ayakabade ebiet oro owo mîkemeke ndidụn̄. Edi Jehovah ‘okobot enye man ẹdụn̄ ke esịt,’ ndien enye oyosobo mme andibiat emi mbemiso mmọ ẹsobode isọn̄ ofụri ofụri.—Isaiah 45:18.

MME EDIDIỌN̄ EKE ISỌN̄ KE IDAK OBIO UBỌN̄

Ekikere oro nte ke mme owo ẹyedụn̄ ke isọn̄ nte mme andidu ke idak Obio Ubọn̄ Abasi ekeme nditie esen esen nnọ ediwak mme andinịm Bible ke akpanikọ oro ẹkerede ke kpukpru mbon oro ẹnyan̄ade ẹdidu ke heaven. Bible owụt nte ke esisịt ibat owo kpọt ẹdika heaven ye nte ke mbon oro ẹdidude uwem nsinsi ke isọn̄ ẹdidi anana-ibat akwa otuowo. (Psalm 37:11, 29; Ediyarade 7:9; 14:1-5) Ntịn̄nnịm ikọ ke n̄wed Daniel eke Bible owụt nte ke Obio Ubọn̄ Abasi ke idak Christ ọyọyọhọ isọn̄ onyụn̄ akara enye.

Ẹwụt Obio Ubọn̄ Christ do nte itiat emi ẹsịbede ẹsio ke itie edikara Jehovah oro ebietde obot. Enye ọtọ onyụn̄ anuak mbiet oro adade aban̄a n̄kpọsọn̄ idụt ke isọn̄, ndien “itiat oro akanuakde mbiet oro . . . akabade edi akamba obot, onyụn̄ ọyọhọ ke ofụri isọn̄.” Ntịn̄nnịm ikọ oro aka iso ete: “Ndien ke eyo ndidem oro, Abasi enyọn̄ ayanam ubọn̄ eke mîdisoboke ke nsinsi, adaha ada: ndien idikpọn̄ke ubọn̄ emi inọ mbio efen: enye ayanuak onyụn̄ ama kpukpru mme idụt emi, ndien enye ayada ke nsinsi.”—Daniel 2:34, 35, 44.

Obio Ubọn̄ emi ye idotenyịn nsinsi uwem oro enyenede nsọn̄ọ N̄wed Abasi kaban̄a isọn̄ oro ẹnamde asana onyụn̄ eye ke Mme Ntiense Jehovah ẹyom nditịn̄ nnọ fi mban̄a. Ediwak miliọn mbon oro ẹdude uwem idahaemi, ye ata ediwak miliọn mbon oro ẹdude idahaemi ke udi ẹyenyene ifet ndidụn̄ do ke nsinsi. Ekem, ke idak Tọsịn Isua Ukara Christ Jesus, akpa uduak Jehovah ke ndibot isọn̄ nnyụn̄ nsịn akpa owo iba oro ke esịt oyosu. Paradise isọn̄ emi idifekke owo tutu amama. Kpa nte ẹkenọde Adam utom ke in̄wan̄ Eden, ntre ke ubonowo n̄ko edinyene mme utom oro ẹnịmde n̄kpọ-ata ke ndise mban̄a isọn̄ ye eto ye uwem unam ẹdude ke esịt. Mmọ “ẹyebọ ufọn utom ubọk mmọ ke anyan ini.”—Isaiah 65:22, Revised Standard Version; Genesis 2:15.

Ẹkeme ndida ediwak itien̄wed Abasi n̄wụt nte mme idaha oro ẹdidude ke ini ẹdibọrọde akam oro Jesus ekekpepde nnyịn: “Yak ubọn̄ fo edi, yak inam uduak fo, nte ẹnamde ke heaven, yak inam ke isọn̄ kpasụk ntre.” (Matthew 6:10) Nte ededi, yak enye emi ekem ke emi: “N̄kop ọkpọsọn̄ uyo nte otode ke ebekpo ọwọrọ ete, Sese, ebiet idụn̄ Abasi omodu ye owo. Enye oyonyụn̄ odụn̄ ye mmọ; ndien mmọ ẹyedi ikọt Esie, Abasi ke Idem Esie oyonyụn̄ odu ye mmọ, onyụn̄ edi Abasi mmọ. Enye ọyọkwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebe-iso n̄kpọ ẹma ẹbe ẹfep. Anditie ke ebekpo onyụn̄ ọdọhọ ete, Sese, mmanam kpukpru n̄kpọ ẹdi mbufa. Enye onyụn̄ ọdọhọ ete, Wet: koro mme ikọ emi ẹdi akpanikọ ye se owo ekpenịmde.”—Ediyarade 21:3-5.

[Se Ẹwetde ke Ikpọ Abisi ke page 15]

“Ndiọk eyo,”

EDI “adan̄aoro ke utịt eyedi”

[Ndise ke page 18]

Netherlands

[Ndise ke page 18]

Nigeria