Edida Idem Ntịn̄ Ikọ Ye Nte Enịmde Iso

MME owo ẹtode ndusụk obio ẹsida idem ẹtịn̄ ikọ ifụre ifụre ẹkan mbon obio efen. Edi, ke nditịm ntịn̄, kpukpru owo ẹsikpụhọde iso ke ini ẹtịn̄de ikọ ẹnyụn̄ ẹda idem ẹtịn̄ ikọ ke ndusụk usụn̄. Ẹsinam emi ke ọkpọkpọ nneme ye ke ini ẹtịn̄de ikọ ke an̄wa.

Edida idem ntịn̄ ikọ ekedi ndammana n̄kpọ ọnọ Jesus ye mme akpa mbet esie. Ke idaha kiet, owo ama editobo Jesus ete ke eka esie ye nditọeka esie ke ẹyom nditịn̄ ikọ ye enye. Jesus ama ọbọrọ ete: “Anie edi eka Mi? mme anie ẹnyụn̄ ẹdi nditọ-eka Mi?” Ekem Bible adian do ete: “Enye anyan ubọk owụt mbet Esie, onyụn̄ ọdọhọ ete, Sese, eka Mi ye nditọ-eka Mi!” (Sịghisịghi ubọkn̄wed edi eke nnyịn; Matt. 12:48, 49) Ke adianade ye mme itie N̄wed Abasi eken oro ẹtịn̄de n̄kpọ ẹban̄a emi, Bible owụt ke Utom 12:17 ye 13:16 nte ke apostle Peter ye Paul ke ndammana usụn̄ ẹma ẹsida idem ẹtịn̄ ikọ n̄ko.

Idịghe sụk uyo ke ẹda ẹtịn̄ mme ekikere ye ntụk oro owo enyenede, edi ẹda n̄ko idem ye nte ẹnịmde iso ẹtịn̄. Editre ndida mmọ nnam n̄kpọ ke eti usụn̄ ekeme ndinọ ekikere nte ke anditịn̄ ikọ inyeneke udọn̄ ke se enye etịn̄de. Edi ke ini ẹtịmde ẹda usụn̄ unyene nneme emi ẹnam n̄kpọ ke eti usụn̄, emi eyenen̄ede ofori utịn̄ikọ. Idem ke ini etịn̄de ikọ ke urụk ukopikọ, edieke afo adade idem etịn̄ ikọ onyụn̄ enịmde iso nte odotde, uyo fo eyetịm owụt nte etop fo edide akpan n̄kpọ ọkọrọ ye nte afo ekerede aban̄a se afo etịn̄de. Ntem, edide afo ọnọ utịn̄ikọ oro mûkotke-kot ke n̄wed m̀mê enye oro okotde-kot ke n̄wed, edide otuowo fo ke ẹse fi m̀mê ẹse Bible mmọ, edida idem ntịn̄ ikọ ye nte enịmde iso ẹnyene ufọn.

Nte afo adade idem etịn̄ ikọ ye nte enịmde iso ikpenyeneke ndidi n̄kpọ eke ẹkotde-kot ẹto n̄wed. Afo ukukpepke-kpep nte ẹsakde imam m̀mê nte ẹyatde esịt. Edida idem ntịn̄ ikọ n̄ko ekpenyene ndiwụt mme ntụk oro ẹtode fi esịt. Nte afo etịmde ada idem etịn̄ ikọ ke ndammana usụn̄, ntre ke enye ọfọn akan.

Edida idem ntịn̄ ikọ edi utọ iba: enye oro owụtde nte n̄kpọ etiede ye enye oro odoride nsọn̄uyo. Edida idem n̄wụt nte mme n̄kpọ ẹtiede esiwụt edinam m̀mê ubom ye itie. Ke ini ẹsede fi ke edida idem ntịn̄ ikọ ke ufọkn̄wed, kûyụhọ ke ndida idem ntịn̄ ikọ ini kiet m̀mê ikaba kpọt. Domo ndida idem ntịn̄ ikọ ke ndammana usụn̄ ke ofụri ini utịn̄ikọ fo. Edieke ọsọn̄de fi ndinam emi, ọyọfọn afo oyom mme ikọ oro ẹwụtde n̄kan̄ emi n̄kpọ akade, nte usụn̄ oyomde, ubom, itie, m̀mê mme udomo idaha. Nte ededi, ke ediwak idaha, ofụri se afo enyenede ndinam edi ndisịn idem ofụri ofụri ke utịn̄ikọ fo, ye unana edikere mban̄a nte ikọ fo etiede, edi etịn̄de ikọ onyụn̄ anamde n̄kpọ nte akpanamde ke uwem ofụri usen. Ke ini owo eteherede idem, edida idem ntịn̄ ikọ esidi ndammana n̄kpọ.

Edida idem ndori nsọn̄uyo owụt ntụk ye uko. Mmọ ẹnam n̄kpọ ẹtịm ẹwọrọ ẹda, ẹsịn uwem ke n̄kpọ, ẹnyụn̄ ẹnam mme ekikere ẹnyene odudu. Edida idem ndori nsọn̄uyo edi akpan n̄kpọ. Edi kpeme! Edida idem ndori nsọn̄uyo ekeme ndisọsọp n̄kabade ndi mbumehe. Edieke afo awakde ndida idem ntịn̄ ikọ ke ukem usụn̄ kpukpru ini, enye ekeme ndidụri ntịn̄enyịn nnọ oro utu ke ndifori utịn̄ikọ fo. Edieke esenyịn ufọkn̄wed mbufo ọdọhọde ke afo emenyene mfịna emi, domo sụk edida idem n̄wụt nte mme n̄kpọ ẹtiede ke ndusụk ini. Esisịt ini ama ebe, fiak tọn̄ọ ndida idem ndori nsọn̄uyo.

Ke ndibiere udomo oro akpadade idem odori nsọn̄uyo ye mme utọ edida idem ntịn̄ ikọ oro ẹdotde, kere ban̄a ntụk mbon oro afo etịn̄de ikọ ọnọ. Edinyan otuowo ubọk ekeme ndinam bụt anam mmọ. Ke ndusụk obio, edieke erenowo adade idem etịn̄ ikọ ke ndusụk usụn̄, utọ nte edifụk ubọk ke inua ndiwụt n̄kpaidem, ẹkeme ndida emi nte n̄kpọ oro n̄wan akpanamde. Ke ndusụk ikpehe ererimbot, ẹda nte unana iso o-bụt n̄wan ndida ubọk ntịn̄ ikọ ifụre ifụre. Ntre ke mme itie emi, oyom nditọete iban akpan akpan ẹda nte ẹnịmde iso ẹnam n̄kpọ nte ọfọnde. Ndien ẹkeme ndida ebeubọk edida idem ntịn̄ ikọ ke ekpri otu nte n̄kpọ imam ke ata ediwak ikpehe ke ererimbot.

Nte afo enyenede mbufiọk onyụn̄ etịmde etịn̄ ikọ ifụre ifụre, orụk edida idem ndori nsọn̄uyo ekededi oyowụt ekikere esịt fo ke ndammana usụn̄, owụtde uko fo ye se afo enịmde ke akpanikọ. Mmọ ẹyenam utịn̄ikọ fo etịm enyene se ọwọrọde.

Nte Afo Enịmde Iso. Ke akande ndido idem ekededi, iso fo esiwak ndiwụt nte enen̄erede etie fi ke idem. Enyịn fo, nte afo enịmde inua, ye nte enịmde ibuot fo kpukpru ẹnyene n̄kpọ ndinam. Ye unana editịn̄ ikọ, iso fo ekeme ndiwụt unana udọn̄, itekesịt, editịmede esịt, n̄kpaidem, m̀mê idatesịt. Ke ini enịmde iso ntre etịn̄ ikọ, mmọ ẹyedian odudu oro ẹkụtde ke enyịn ye ntụk. Andibot ama ọdọn̄ ata ediwak esịp ke iso fo—se iwakde ibe 30 ke ofụri ofụri. Se ikperede mbahade iba ke otu emi ẹsinam n̄kpọ ke ini afo atuakde inua imam.

Edide afo ada ke mbot utịn̄ikọ m̀mê abuana ke utom an̄wautom, afo odomo ndibuana etop inemesịt ye mme owo, etop oro ekemede ndinam mmọ ẹdat esịt. Eti inua imam ọsọn̄ọ oro. Ke n̄kan̄ eken, edieke iso fo mîwụtke n̄kpọ ndomokiet, emi ekeme ndidemede eyịghe m̀mê se afo etịn̄de edi akpanikọ.

Ke akande oro, inua imam owụt mbon efen ete ke afo emenyene eti ekikere aban̄a mmọ. Emi edi akpan n̄kpọ akpan akpan idahaemi, emi mme owo ẹwakde ndikop ndịk mban̄a isenowo. Inua imam fo ekeme ndinam mme owo ẹnyene ifụre ẹnyụn̄ ẹtịm ẹkpan̄ utọn̄ ke se afo etịn̄de.