Edida Se Ẹnọde Nnam N̄kpọ

BIBLE emen esop Christian odomo ye idem owo. Ndido kiet kiet enyene ufọn, edi “kpukpru ndido emi . . . inamke orụk utom kiet.” Nte ekemde ye emi, nnyịn ikpenyene ndinam utom ke ifetutom ekededi oro ẹnọde nnyịn. Emi oyom nnyịn ifiọk inyụn̄ itịm ise iban̄a utịn̄ikọ ekededi oro ẹnọde nnyịn utu ke ndise ndusụk ibuot nneme ke usụhọde ke ntak emi nnyịn ikerede ke mme ibuot nneme efen ẹyenem ẹkan oro. (Rome 12:4-8) Edi mbiomo otu asan̄autom emi anamde akpanikọ, onyụn̄ enyenede ọniọn̄ ndinọ udia eke spirit “ke edikem ini.” (Matt. 24:45) Ke ini nnyịn idade mme ọkpọkpọ ukeme nnyịn itịm utịn̄ikọ itiene item oro nnyịn ibọde, nnyịn iwụt esịtekọm inọ ndutịm oro. Emi etịp esịn ke ofụri esop ndisan̄a nte ọfọnde.

Se Ekpesịnde. Ke ini ẹnọde fi ibuot nneme ke ufọkn̄wed, da ini tịm ibuot nneme oro, idịghe nditịm n̄kpọ efen. Ke ata ediwak idaha, ẹyenọ akpan ebiet oro ẹdade n̄kpọ ẹto. Edieke owo mînọhọ fi n̄wed oro akpadade etịm utịn̄ikọ fo, afo emekeme ndida n̄kpọ nto mme ebiet oro afo emekde. Nte ededi, ke ini etịmde utịn̄ikọ fo, kụt ete ke ofụri utịn̄ikọ oro ọkọn̄ọ ke ibuot nneme oro ẹnọde. Kere ban̄a otuowo fo ke ini emekde mme n̄kpọ oro edisịnde.

Tịn̄ enyịn dụn̄ọde ebiet oro utịn̄ikọ oro otode, dụn̄ọde mme itie N̄wed Abasi oro ẹdọn̄de. Ekem kere nte akpadade mmọ anam n̄kpọ ata uforo uforo man otuowo ọbọ ufọn. Mek akpan n̄kpọ iba m̀mê ita edieke ekemede to n̄wed oro ẹdade utịn̄ikọ ẹto man akama nte mme akpan n̄kpọ ke utịn̄ikọ fo. Mek n̄ko mme itie N̄wed Abasi oro afo odiomide ndikot nnyụn̄ nneme to n̄wed oro ẹdade utịn̄ikọ oro ẹto.

Afo ekpenyene nditịn̄ n̄kpọ awak adan̄a didie? Tịn̄ sụk se afo ekemede ndikụre uforo uforo. Kûyak uwak ntọt ẹbọ eti ukpepn̄kpọ ẹbiat. Edieke ndusụk n̄kpọ mîdotke ye uduak utịn̄ikọ fo, wụk ntịn̄enyịn ke mme ikpehe oro ẹdin̄wamde fi ndisịm utịtmbuba oro. Da mme n̄kpọ oro ẹditịmde ẹsịne ifiọk ẹnyụn̄ ẹnyene ufọn ẹnọ otuowo fo. Uduak fo ke akpan item utịn̄ikọ enye emi idịghe ndise udomo n̄kpọ oro afo ekemede nditịn̄, edi ndida se ẹnọde nnam n̄kpọ ke utịn̄ikọ fo.

Iyomke utịn̄ikọ fo edi sụk ibio ibio editịn̄ se ẹnọde ẹnam. Afo ekpenyene ndidiomi ndinam ndusụk ikpehe ẹn̄wan̄a, atat mmọ, onyụn̄ ọnọ uwụtn̄kpọ ke nte ẹkpedade mmọ ẹsịn ke edinam. Ẹkpenyene ndida mme ekikere efen efen ntat mme akpan n̄kpọ ẹtode ebiet oro ẹnọde n̄kpọ ẹnam utu ke ndidada n̄kpụhọ ye enye.

Ẹkeme ndinọ nditọete oro ẹdotde nte mme andikpep ifet ndinọ item ke Esoputom. Mmọ ẹfiọk ufọn edida n̄kpọ oro ẹnọde nnam n̄kpọ ke eti usụn̄ utu ke ndikpụhọde nda n̄kpọ efen. Kpasụk ntre, ẹsinọ nditọete oro ẹnọde utịn̄ikọ an̄wa mme n̄wed utịn̄ikọ ndikama. Emi esiyak ẹnam ndusụk ukpụhọde ẹkekem ye idaha, edi mmọ ẹnen̄ede ẹwụt mme akpan n̄kpọ oro ẹnyenede nditat, mme n̄kpọ oro ẹkemede ndida nnọ nsọn̄ọ, ye mme itie N̄wed Abasi oro ẹnọde isọn̄ kaban̄a utịn̄ikọ oro. Ndikpep ndida se ẹnọde nnọ ukpep edi akpan ikpehe ke nditịm idem nnọ mme ifet unọ utịn̄ikọ efen efen.

Ukpep emi ekeme ndin̄wam fi n̄ko ndinịm mme ukpepn̄kpọ Bible oro ẹnyenede uforo. Afo eyekpep ndiwụk ntịn̄enyịn ke n̄wed ukpepn̄kpọ utu ke ndiwọn̄ọde n̄kpọn̄ ibuot nneme oro n̄ketịn̄ mme n̄kpọ efen oro ẹnemde edi mîdịghe se ẹyomde man ẹnam ibuot nneme oro an̄wan̄a. Edi, edieke ukpepn̄kpọ emi an̄wan̄ade fi, afo udusọn̄ọke uyịre ke n̄wed ukpepn̄kpọ tutu etre ndinọ n̄kaiso edinam an̄wan̄a oro eyen ukpepn̄kpọ oyomde.