Kpọn̄ Nsunsu Ido Ukpono; Nam Ido Ukpono Akpanikọ

1. Kaban̄a utuakibuot, nso edimek ke mme owo mfịn ẹsak iso ẹse?

JESUS ọkọdọhọ ete: “Owo eke mîdaha ye Ami an̄wan̄wana ye Ami.” (Matthew 12:30) Nnyịn ida ke n̄kan̄ Jehovah mîdịghe ke n̄kan̄ Satan. Ata ediwak owo ẹkere ke mmimọ ke inam n̄kpọ Abasi ke usụn̄ oro enye enyịmede, edi Bible ọdọhọ ete ke Satan ‘ke abian̄a ofụri ererimbot.’ (Ediyarade 12:9) Ediwak miliọn owo ẹnịm ke akpanikọ ẹte ke mmimọ ituak ibuot inọ Abasi, edi mmọ ẹnen̄ede ẹnam n̄kpọ ẹnọ Satan kpa Devil! Mme owo mfịn ẹnyene n̄kpọ ndimek: Ana mmọ ẹnam n̄kpọ ẹnọ Jehovah, “Abasi akpanikọ,” mîdịghe Satan, “ete nsu.”—Psalm 31:5; John 8:44.

Kịbe Bọhọ Nsunsu Ido Ukpono

2. Nso idi usụn̄ kiet oro Satan odomode ndibiọn̄ọ mme owo ndituak ibuot nnọ Jehovah?

² Ndibiere ndinam n̄kpọ Jehovah edi edimek oro owụtde eti ibuot, edi edimek oro anamde ẹnyene unyịme Abasi. Edi Satan ikopke inemesịt ye owo ekededi oro anamde n̄kpọ Abasi; enye esida mfịna etiene mbon oro ẹnamde. Usụn̄ kiet oro enye anamde emi edi ndinam mbon en̄wen, idem mme ufan ye mbonubon, ẹsak mmọ nsahi m̀mê ẹbiọn̄ọ mmọ. Jesus ama odụri owo utọn̄ ete: “Ndien mme asua owo ẹyedi mbon ufọk esie.”—Matthew 10:36.

3. Edieke ubon m̀mê mme ufan fo ẹbiọn̄ọde fi ndituak ibuot nnọ Abasi, nso ke afo edinam?

³ Edieke oro etịbede ọnọ fi, nso ke afo edinam? Ediwak owo ẹfiọk ẹte ke usụn̄ utuakibuot mimmọ akwan̄a, edi mmọ ẹmen̄e ndikịbe mbọhọ enye. Mmọ ẹkere ke ndinam ntre ediwọrọ unana edinam akpanikọ nnọ ubon mmimọ. Nte oro owụt eti ibuot? Edieke ọfiọkde ete ke n̄kpet n̄kpet mbonubon fo ẹda ndiọi n̄kpọsọn̄ ibọk, nte afo ukpọtọtke mmọ nte ke n̄kpọsọn̄ ibọk oro ẹyenọ mmọ unan? Afo ukpetieneke mmọ uda n̄kpọsọn̄ ibọk oro, nte ekpetiene?

4. Nso ke Joshua eketịn̄ ọnọ nditọ Israel aban̄a utuakibuot ke eyo esie?

⁴ Joshua ama esịn udọn̄ ọnọ nditọ Israel ete ẹsion̄o idem ẹkpọn̄ ndiọi edinam ido ukpono ye ido edinam mme ete ete mmọ. Enye ọkọdọhọ ete: “Mbufo ẹbak Jehovah, ndien, ẹnyụn̄ ẹnam n̄kpọ esie ke esịt kiet, ye ke akpanikọ: ẹnyụn̄ ẹmen mme abasi emi mme ete mbufo ẹkenamde n̄kpọ mmọ ke edem akpa oko, ye ke Egypt, ẹduọk; ndien ẹnam n̄kpọ Jehovah.” (Joshua 24:14) Joshua ama anam akpanikọ ọnọ Abasi, ndien Jehovah ama ọdiọn̄ enye. Edieke nnyịn inamde akpanikọ inọ Jehovah, enye ọyọdiọn̄ nnyịn n̄ko.—2 Samuel 22:26.

Duọn̄ọ Mme N̄kpọ Oro Ẹkamade ke Nsunsu Utuakibuot

5. Ntak emi nnyịn ikpọduọn̄ọde mme n̄kpọ mfọni?

⁵ Ndikịbe mbọhọ nsunsu ido ukpono ọwọrọ n̄ko ete ke nnyịn ikpenyene ndibiat n̄kpọ mfọni ekededi oro nnyịn inyenede, utọ nte ibọk ye n̄kpọ n̄kpemeidem, n̄kpanuen ye okpoho ubọk mfọni, ye mme n̄kpọ ntre. Emi edi akpan n̄kpọ koro enye owụt ete ke nnyịn ikọn̄ ọyọhọ mbuọtidem nnyịn ke Jehovah.

6. Nso ke mme akpa Christian ẹkenam ye mme n̄wed mmọ oro ẹban̄ade mfọni?

⁶ Kere ban̄a se ndusụk mme akpa Christian ẹkenamde ke ini mmọ ẹkebierede ndinam ido ukpono akpanikọ. Bible ọdọhọ ete: “Ediwak mmọ emi ẹkam ẹbrede idiọn̄ ẹtan̄ n̄wed mmọ ẹdi ẹdifọp ke iso kpukpru owo.”—Utom 19:19.

7. Nso ke nnyịn ikeme ndinam edieke mme demon ẹfịnade nnyịn?

⁷ Ekeme ndidi mme demon ẹyefịna ndusụk mbon oro ẹkekamade ifọt, ẹkesibrede idiọn̄, m̀mê mfọni, emi ẹtọn̄ọde ndinam n̄kpọ Jehovah. Edieke oro etịbede ọnọ fi, seme kot Jehovah ke ọkpọsọn̄ uyo ke akam, adade enyịn̄ esie. Enye ayan̄wam fi.—Mme N̄ke 18:10; James 4:7.

8. Didie ke mme Christian ẹse ndisọi n̄kpọ, mme mbiet, ye mme ndise oro ẹsikamade ke nsunsu utuakibuot?

⁸ Inaha mbon oro ẹyomde ndinam n̄kpọ Jehovah ẹnịm m̀mê ẹkama ndisọi n̄kpọ, mbiet m̀mê ndise ekededi oro edide ubak nsunsu utuakibuot. Mme ata Christian ‘ẹsan̄a ke mbuọtidem, isan̄ake ke edikụt ke enyịn.’ (2 Corinth 5:7) Mmọ ẹkpono ibet Abasi oro akpande edikama mbiet ekededi ke utuakibuot.—Exodus 20:4, 5.

Buana ye Ikọt Jehovah

9. Nso item ke Bible ọnọ kaban̄a owo ndinyene ibuot?

⁹ Bible ọdọhọ ete: “Owo eke asan̄ade ye mme enyene-ibuot eyenyene ibuot.” (Mme N̄ke 13:20) Edieke nnyịn iyomde ndinyene ibuot, nnyịn inyene ndisan̄a, m̀mê ndibuana, ye Mme Ntiense Jehovah. Mmọ ẹdi mbon oro ẹsan̄ade ke usụn̄ oro adade esịm uwem.—Matthew 7:14.

10. Didie ke Mme Ntiense Jehovah ẹkeme ndin̄wam fi anam n̄kpọ Abasi?

¹⁰ Mme Ntiense ẹnen̄ede ẹkere ẹban̄a mme owo. Utom mmọ edi ndin̄wam mbon esịt akpanikọ ẹfiọk mme akpanikọ Bible oro ẹdade ẹsịm nsinsi uwem. Mmọ ẹkeme ndin̄wam fi ebe ke ndikpep fi Bible, ke mfọn. Mmọ ẹyebọrọ mme mbụme fo ẹnyụn̄ ẹwụt fi nte akpadade ifiọk Bible esịn ke edinam ke uwem fo.—John 17:3.

11. Didie ke mme mbono esop Christian ẹdin̄wam fi?

¹¹ Ke mme mbono esop mmọ, oro ẹsiwakde ndinịm ke Ufọkmbono Obio Ubọn̄, afo eyekpep n̄kpọ efen efen aban̄a mme usụn̄ Jehovah. Ẹyesịn udọn̄ ẹnọ fi ndinam ido ukpono akpanikọ. Ndien afo n̄ko ọyọbọ ukpep ke nte akpan̄wamde mbon en̄wen ẹfiọk akpanikọ Bible.—Mme Hebrew 10:24, 25.

12. Didie ke akam ekeme ndin̄wam fi anam n̄kpọ Abasi?

¹² Nte afo ekpepde n̄kpọ efen efen aban̄a uduak Jehovah, eyedi afo eyenen̄ede ọfiọk mme ima ima usụn̄ esie. Udọn̄ fo ndinam se inemde enye esịt nnyụn̄ mfep se mînemke enye esịt ekpenyene n̄ko ndikọri. Ti ete ke afo emekeme ndisan̄a n̄kpere Jehovah ke akam man eben̄e enye an̄wam fi ndinam se inende ndinyụn̄ mfep se ikwan̄ade.—1 Corinth 6:9, 10; Philippi 4:6.

13. Didie ke afo ekeme ndinam esịt Jehovah adat?

¹³ Nte ini akade, nte afo anamde n̄kọri ke n̄kan̄ eke spirit, afo nte eyịghe mîdụhe oyokụt ufọn edikabade ndi Ntiense Jehovah oro ayakde idem ọnọ onyụn̄ anade baptism. Ke nditiene ndi ubak ikọt Jehovah, afo ayanam esịt Jehovah adat. (Mme N̄ke 27:11) Afo oyodu ke otu mme owo oro ẹkopde inemesịt, emi Abasi etịn̄de aban̄a mmọ ete: “Nyodụn̄, nyonyụn̄ nsan̄a ke otu mmọ, ndien nyedi Abasi mmọ, mmọ ẹyenyụn̄ ẹdi ikọt Mi.”—2 Corinth 6:16.