Owo Emi Ekpekpebede​—Nditọ Hebrew Ita

Hananiah, Mishael, ye Azariah ẹda ke unaisọn̄ Dura, emi odude ekpere Babylon. Mme owo ẹkan mmọ ẹkụk ẹnyụn̄ ẹnụhọ ẹnọ akwa mbiet. Okposụkedi emi mme uke mmọ ẹnyịkde mmọ, edidem onyụn̄ esịnde mmọ ndịk ke idem, mmọ inụhọke. Mmọ ẹsian Nebuchadnezzar ukpono ukpono ke idụhe se idinamde mmimọ itre ndinam n̄kpọ Jehovah.​—Daniel 1:6; 3:17, 18.

Mmọ ẹkedi uyen ke ini ẹketan̄de mmọ ẹka Babylon. Mmọ ndikanam akpanikọ ke ini mmọ ẹkedide uyen​—ndikesịn ndidia udia oro ẹtiede nte Ibet Abasi ama akpan​—ama an̄wam mmọ ẹkeme ndibe ikpọ idomo oro mmọ ẹkesobode nte ini akakade. (Daniel 1:6-20) Se iketịbede inọ mmọ ama anam mmọ ẹfiọk ke ndikop uyo Jehovah edi mfọnn̄kan n̄kpọ. Ukem nte mmọ, ndi emebiere ndisọn̄ọ nda nnịm Ibet Abasi kpa ye oro mme uke fo ẹnyịkde fi ẹte anam se mîfọnke? Edieke ekpepde ndikop uyo Jehovah ke mme n̄kpọ emi ẹtiede nte n̄kpri n̄kpọ ke ini uyen fo, eyeben̄e idem ndisọn̄ọ nda ke ini ikpọ idomo ẹsịmde fi nte ini akade.​—Mme N̄ke 3:5, 6; Luke 16:10.