Ntak Emi Ẹkotde Nnyịn Mme Ntiense Jehovah?

Ediwak owo ẹkere ke Mme Ntiense Jehovah edi enyịn̄ obufa ido ukpono. Edi, ke se ikande isua 2,700 emi ẹkebede, ẹkekot mme asan̄autom ata Abasi kierakiet, “mme ntiense” esie. (Isaiah 43:10-12) Mbemiso 1931, ẹkesidiọn̄ọ nnyịn nte Nditọ Ukpepn̄kpọ Bible. Ntak emi nnyịn ikadade enyịn̄ oro Mme Ntiense Jehovah ikere?

Enyịn̄ emi anam ẹdiọn̄ọ Abasi nnyịn. Nte n̄kani uwetn̄kpọ Bible ẹwụtde, enyịn̄ Abasi, Jehovah, odu ke ediwak tọsịn itie ke Bible. Ke ediwak edikabade Bible, ẹkpụhọ enyịn̄ emi ẹnyụn̄ ẹda mme udorienyịn̄ nte Ọbọn̄ m̀mê Abasi ẹsịn ke itie esie. Edi, ata Abasi ama ada ọkpọkpọ enyịn̄ esie, Jehovah, ayarade idemesie ọnọ Moses, ete: “Emi edi enyịn̄ mi ke nsinsi.” (Exodus 3:15) Emi ama anam enye okpụhọde ye kpukpru mme nsunsu abasi. Nnyịn imokop inemesịt ndikere enyịn̄ ndian edisana enyịn̄ Abasi.

Enyịn̄ emi anam ẹdiọn̄ọ utom nnyịn. Ediwak owo ke eset, ọtọn̄ọde ke Abel emi ekedide edinen owo, ẹma ẹtie ntiense ẹban̄a mbuọtidem oro mmọ ẹkenyenede ke Jehovah. Ke ediwak isua ikie emi ẹkebede, Noah, Abraham, Sarah, Moses, David, ye mbon eken ẹma ẹtiene ẹsịne ke “akwa otu ntiense” emi. (Mme Hebrew 11:4–12:1) Ukem nte owo ekemede nditie ntiense ke esopikpe nnọ owo emi mîduehe, nnyịn imebiere ndinam mme owo ẹfiọk akpanikọ oro aban̄ade Abasi nnyịn.

Nnyịn ikpebe Jesus. Bible okot enye “anam-akpanikọ ye ntiense akpanikọ.” (Ediyarade 3:14) Jesus ke idemesie ama ọdọhọ ke ima ‘inam ẹfiọk enyịn̄ Abasi’ inyụn̄ ika iso ‘itie ntiense inọ akpanikọ’ emi aban̄ade Abasi. (John 17:26; 18:37) Ntak edi oro anade ata mme anditiene Christ ẹkere enyịn̄ Jehovah ẹnyụn̄ ẹnam mme owo ẹfiọk enyịn̄ emi. Se Mme Ntiense Jehovah ẹdomode ndinam edi oro.

• Ntak emi Nditọ Ukpepn̄kpọ Bible ẹkedade enyịn̄ oro, Mme Ntiense Jehovah ẹkere?

• Ini ewe ke Jehovah ọkọtọn̄ọ ndinyene mme ntiense ke isọn̄?

• Anie edi akakan Ntiense Jehovah?