Ntak Emi Nnyịn Isiode Edikabade Eke Obufa Ererimbot?

Mme Ntiense Jehovah ẹma ẹsikama, ẹmịn̄, ẹnyụn̄ ẹsuan nsio nsio edikabade Bible ke ata ediwak isua. Edi ekem ima idikụt ke oyom isio obufa Bible emi edinen̄erede in̄wam mme owo ẹkpep “nnennen ifiọk akpanikọ,” emi Abasi oyomde kpukpru owo ẹnyene. (1 Timothy 2:3, 4) Ntre ke 1950, ima itọn̄ọ ndisio ndusụk ikpehe Bible nnyịn ke usem eyomfịn, kpa Edikabade Eke Obufa Ererimbot. Ẹkabade Bible emi ata nnennen nnennen ẹsịn ke se iwakde ibe usem 130.

Ẹma ẹyom Bible oro etịmde an̄wan̄a owo. Nte ini akade, mme usem ẹsikpụhọde ndien ediwak edikabade Bible ẹsịne mme ikọ oro mîtịmke in̄wan̄a owo m̀mê oro owo mîtịn̄ke aba. N̄ko, ẹkụt n̄kani uwetn̄kpọ oro ẹnende ẹkan, emi ẹkperede ndidi ukem ye mme akpasarade uwetn̄kpọ. Emi anam usem Hebrew, Aramaic, ye Greek, oro ẹkedade ẹwet Bible ẹnen̄ede ẹn̄wan̄a owo.

Ẹma ẹyom edikabade oro akabarede ikọ Abasi nnennen nnennen. Mme andikabade Bible ẹkpenyene ndikabade se idude ke akpasarade uwetn̄kpọ nnennen nnennen utu ke ndikpụhọ se Abasi ọkọnọde odudu spirit ete ẹwet. Edi ke ata ediwak nsiondi, owo isịnke enyịn̄ Abasi, Jehovah, ke Edisana N̄wed Abasi.

Ẹma ẹyom Bible emi anamde ẹfiọk Andiwet. (2 Samuel 23:2) Nte ẹwụtde mi ke idak, ke Edikabade Eke Obufa Ererimbot, ẹfiak esịn enyịn̄ Jehovah ke n̄kpọ nte itie 7,000 emi enye odude ke mbịghi-n̄kan uwetn̄kpọ Bible. (Psalm 83:18) Ke ẹma ẹkeda ediwak isua ẹtịn̄ enyịn ẹnam ndụn̄ọde, Bible emi enem ndikot koro enye owụt ekikere Abasi in̄wan̄-in̄wan̄. Edide emenyene Edikabade Eke Obufa Ererimbot ke usem fo m̀mê unyeneke, imesịn udọn̄ inọ fi ite esikot Ikọ Jehovah kpukpru usen.—Joshua 1:8; Psalm 1:2, 3.

• Ntak emi ikebierede ke ama oyom inyene obufa edikabade Bible?

• Nso ke ọkpọfọn owo emi oyomde ndifiọk uduak Abasi anam kpukpru usen?