Ukpep Oro Obio Ubọn̄ Ọnọde—Ẹnọ Ikọt Edidem Ukpep

AFO amatuak inua imam ke ini etịn̄ikọ adade ke mbot utịn̄ikọ ọnọ utịn̄ikọ. Enye odu ke esop mbufo, onyụn̄ ọnọ akpa utịn̄ikọ esie ke mbono. Nte osụk okopde utịn̄ikọ esie, idem akpa fi aban̄a utọ ukpep emi ikọt Abasi ẹbọde. Afo emeti akpa utịn̄ikọ esie ke esop, omonyụn̄ okụt nte enye anamde n̄kọri! Enye ama aka Ufọkn̄wed Mme Asiakusụn̄, ndien ufọkn̄wed emi ama enen̄ede an̄wam enye. Ekem enye ye n̄wan esie ẹka Ufọkn̄wed Mme Ọkwọrọ Obio Ubọn̄ ke ndondo emi. Nte osụk akwakde ubọk ke edinem utịn̄ikọ eyenete oro, afo ọwọn̄ọde enyịn ese otuowo onyụn̄ ekere aban̄a kpukpru ukpep emi ikọt Abasi ẹbọde.

Bible ama ebem iso etịn̄ aban̄a ini emi Jehovah ‘edinọde kpukpru ikọt esie ukpep.’ (Isa. 54:13) Ini oro ke nnyịn idu emi. Idịghe mme n̄wed nnyịn kpọt ke ẹda ẹnọ nnyịn ukpep, edi ẹda n̄ko mme mbono esop, n̄kpri ye ikpọ mbono, ye mme ufọkn̄wed emi ẹnịmde man ẹn̄wam nnyịn inam nsio nsio utom ke esop Jehovah. Imọn̄ ida ikpehe emi ineme nte kpukpru ukpep emi enen̄erede owụt ke Obio Ubọn̄ Abasi akara mfịn.