Ekpri Eyen Emi Eset!

Jairus okụt nte Jesus anamde idem ọsọn̄ mma oro iyịp ọkọwọrọde. Enye enịm ke Jesus ekeme ndinyan̄a eyen imọ n̄ko kpa ye oro etiede enye nte ke ‘eyen esie oro akpa.’ (Matthew 9:18) Ndi enyene se Jesus ekemede ndisụk nnam nnọ enye?

Ke ini Jesus osụk etịn̄de ikọ ye mma emi enye akanamde idem ọsọn̄, mme owo ẹto ufọk Jairus ẹdi ẹdidọhọ enye ẹte: “Eyen fo an̄wan ama akpa!” Ekem ẹfiak ẹdọhọ enye ẹte: “Ntak emi osụk afịnade andikpep?”—Mark 5:35.

Nso utọ mbụk idedi emi? Ete emi ẹsikponode-kpono ke obio mi enyene mbọm etieti. N̄kukụre eyen emi enye enyenede akpa oro. Edi ke ini Jesus okopde se ẹdọhọde Jairus, enye etịn̄ ikọ emi ndidọn̄ enye esịt: “Kûfehe ndịk, kam nyene mbuọtidem.”—Mark 5:36.

Jesus etiene Jairus ọnyọn̄ ufọk. Ke ini mmọ ẹsịmde do, editịm ke ọsọn̄. Mme owo ke ẹtua, ke ẹseme, ke ẹnyụn̄ ẹmen idem ẹtọ. Jesus odụk esịtufọk onyụn̄ etịn̄ ikọ emi akpade owo idem ete: “Ekpri eyen emi ikpaha-kpa, edi edede.” (Mark 5:39) Ikọ emi anam mme owo ẹsak Jesus. Mmọ ẹdiọn̄ọ ke ekpri eyen oro akpa. Edi Jesus ọmọn̄ ada odudu emi Abasi ọnọde enye owụt mmọ ke ẹkeme ndinam owo emi akpade eset nte ẹdemede enye ke idap.

Jesus ọdọhọ kpukpru owo ẹwọn̄ọ ke ebede Peter, James, John, ye ete ye eka eyen oro. Jesus ada mmọ mbition asan̄a aka ebiet emi ẹkenịmde eyen oro. Enye omụm eyen oro ubọk ọdọhọ ete: “‘Talʹi·tha cuʹmi,’ emi ọwọrọde: ‘N̄kaiferi, ndọhọ fi nte, Daha ke enyọn̄!’” (Mark 5:41) Inikiet inikiet, eyen oro adaha ada ọtọn̄ọ isan̄. Kere nte esịt enemde Jairus ye n̄wan esie ke ini mmọ ẹkụtde utọ utịben̄kpọ emi. Jesus ọdọhọ mmọ ẹnọ eyen oro udia adia man mmọ ẹnen̄ede ẹnịm ke enye eset.

Jesus esidọhọ mbon emi enye an̄wamde ete ẹkûmen se imọ inamde inọ mmọ usan̄a utịn̄ unọ mme owo, se enye onyụn̄ etịn̄de ye Jairus ye n̄wan esie edi emi. Kpa ye emi, ọkpọsọn̄ inemesịt anam mmọ ye mbon en̄wen ẹtịn̄ se iketịbede emi “ke ofụri ikpehe oro.” (Matthew 9:26) Ekpedi afo ke ẹkenam owo fo eset, ndi ukpusan̄ake utịn̄ unọ mme owo? Ọyọhọ ikaba edi emi Jesus anamde owo eset.