Abasi Odomo Abraham Ese

Abraham ama ekpep Isaac eyen esie ete ama Jehovah onyụn̄ enịm ke Jehovah ayanam kpukpru se enye ọn̄wọn̄ọde. Edi ke ini Isaac ekedide n̄kpọ nte isua 25, Jehovah ama ọdọhọ Abraham anam n̄kpọ emi mîmemke utom ndinam. Nso ikedi oro?

Abasi ọkọdọhọ Abraham ete: ‘Mbọk, men n̄kukụre eyen fo emi ka kawa nọ mi ke obot kiet emi odude ke Moriah.’ Abraham ikọdiọn̄ọke ntak emi Jehovah ọkọdọhọde enye anam utọ n̄kpọ oro. Edi enye ama anam se Jehovah ọkọdọhọde.

Edem usen oro, Abraham ama ababak emen Isaac ye asan̄autom esie iba adaha aka Moriah. Ke mmọ ẹma ẹkesan̄a usen ita, mmọ ẹma ẹda ẹkụt obot oro. Enye ama ọdọhọ mme asan̄autom esie ẹbet yak imọ ye Isaac idọk ikawa uwa. Enye ama ọnọ Isaac ifia obiom, edi enye ama emen ikwa akama. Isaac ama obụp enye ete: ‘Enye enye unam emi iyomde ndiwa?’ Abraham ama ọbọrọ ete: ‘Eyen mi, Jehovah ọyọnọ nnyịn.’

Ini mmọ ẹsịmde obot oro, mmọ ẹma ẹbọp itieuwa. Ekem Abraham ọbọp Isaac ubọk ye ukot odori ke itieuwa oro.

Ke ini Abraham emende ikwa ete iwot Isaac, angel Jehovah ama etie ke heaven ọdọhọ ete: ‘Abraham! Kûnam eyen oro n̄kpọ! Mmọfiọk ndien nte ke ọmọbuọt idem ye Abasi sia ama ekenyịme ndiwa eyen fo.’ Ekem Abraham ama okụt okukịm erọn̄ emi nnụk esie ọkọmọde ke ikọt. Enye ama ọsọsọp atat Isaac onyụn̄ emen okukịm erọn̄ oro awa ọnọ Abasi.

Usen oro ke Jehovah ọkọtọn̄ọ ndikot Abraham “ufan mi.” Ndi ọmọfiọk se ikanamde Jehovah esikot Abraham “ufan mi”? Abraham ama esinam se ededi emi Jehovah ọdọhọde, idem ke ini enye mîdiọn̄ọke se inamde Jehovah ọdọhọ enye anam n̄kpọ oro.

Jehovah ama afiak ọn̄wọn̄ọ ọnọ Abraham ete: ‘Nyọdiọn̄ fi, nyonyụn̄ nnam nditọ fo m̀mê mbonubon fo ẹwak.’ Enye ama ọn̄wọn̄ọ n̄ko ke idida ubon Abraham idiọn̄ kpukpru nti owo.