Mmọ Inamke Se Ẹken̄wọn̄ọde

Jehovah ọkọdọhọ Moses ete: ‘Dọk bịne mi ke obot. Mmọn̄ n̄wet ibet mi ke itiatn̄wed nnọ fi.’ Moses ama okodu do uwemeyo 40 ye okoneyo 40, Jehovah ama onyụn̄ ewet Ibet Duop ke itiatn̄wed iba ọnọ enye.

Sia Moses mîkọsọpke isụhọde idi, nditọ Israel ẹma ẹkere ke enye efehe ọkpọn̄ mmimọ. Ntre mmọ ẹma ẹdọhọ Aaron ẹte: ‘Imoyom owo emi edidade nnyịn usụn̄. Nam abasi nọ nnyịn!’ Aaron ama ọdọhọ mmọ ete: ‘Ẹnọ mi gold mbufo.’ Enye ama anam gold oro atara onyụn̄ ada anam eyen enan̄. Mmọ ẹma ẹdọhọ ẹte: ‘Eyen enan̄ emi edi Abasi nnyịn emi akadade nnyịn ọwọrọ ke Egypt!’ Mmọ ẹma ẹtọn̄ọ ndituak ibuot nnọ eyen enan̄ oro ẹnyụn̄ ẹnam usọrọ. Se mmọ ẹkenamde oro ama ọdiọk, sia mmọ ẹma ẹn̄wọn̄wọn̄ọ ke idikpono Jehovah kpọt. Edi idahaemi mmọ inamke se mmọ ẹken̄wọn̄ọde.

Jehovah ama okụt se mmọ ẹkenamde, onyụn̄ ọdọhọ Moses ete: ‘Sụhọde bịne mmọ. Mmọ ke ẹsọn̄ ibuot ye ami, ke ẹnyụn̄ ẹkpono nsunsu abasi.’ Moses ama emen itiatn̄wed iba oro osụhọde ke obot oro.

Ini Moses ekperede ebiet emi nditọ Israel ẹdude, enye ama okop mmọ ẹkwọde ikwọ. Ekem enye ama okụt mmọ ẹnekde unek ẹnyụn̄ ẹtuakde ibuot ẹnọ eyen enan̄ oro. N̄kpọ oro ama ayat Moses etieti. Moses ama otop itiatn̄wed iba oro ọduọk ke isọn̄, mmọ ẹnyụn̄ ẹbomo mbai mbai. Enye ama aka inikiet inikiet ekemen eyen enan̄ oro ọfọp ke ikan̄. Ekem enye ama obụp Aaron ete: ‘Nso ke mbon emi ẹketịn̄ yak afo enyịme ndinam utọ mbubiam n̄kpọ emi?’ Aaron ama ọbọrọ ete: ‘Kûyat esịt. N̄kọ ọmọdiọn̄ọ nte mmọ ẹtiede. Mmọ ẹkedọhọ mbot abasi nnọ mmimọ, ntre mma ntop gold mmọ ndọn̄ ke ikan̄ ndien eyen enan̄ emi ọwọrọ edi!’ Ikpakanaha Aaron anam utọ n̄kpọ oro. Moses ama afiak ọdọk ekekpe Jehovah ubọk ete efen ọnọ mmọ.

Jehovah ama efen ọnọ mbon oro ẹkenyịmede ndikop uyo esie. Ndi omokụt ke ikpakanaha nditọ Israel ẹyom adausụn̄ en̄wen?