David ye Goliath

Jehovah ama ọdọhọ Samuel ete: ‘Ka ufọk Jesse. Eyen esie kiet edidi ọyọhọ edidem iba ke Israel.’ Ntre Samuel ama adaha aka ufọk Jesse. Ke ini enye okụtde akpan Jesse, enye ekekere ete: ‘Anaedi enye emi ke Jehovah emek.’ Edi Jehovah ama ọdọhọ Samuel ke idịghe enye oro ke imọ imek, ke imọ isise esịt owo, isehe nte owo etiede.

Jesse ama osio nditọ esie itiokiet en̄wen edi. Edi Samuel ama ọdọhọ enye ete: ‘Jehovah imekke owo mmọ ndomokiet. Ndi emenyene eyen erenowo en̄wen?’ Jesse ama ọbọrọ enye ete: ‘Ekperedem eyen mi osụhọ, ekere David. Enye akaka ndikpeme erọn̄.’ Ke ini David ekedide edisịm, Jehovah ama ọdọhọ Samuel ete: ‘Enye emi ke mmek!’ Samuel ama eyet David aran man enye ekpedi edidem Israel ini ama ekem.

Nte ini akakade, mbon Philistia ẹma ẹdi en̄wan ye Israel. Mmọ ẹma ẹnyene ata anyan okopidem owoekọn̄ kiet emi ekekerede Goliath. Enye ama esisụn̄i nditọ Israel kpukpru usen onyụn̄ esifiori ete: ‘Ẹsio owo yak edin̄wana ye ami. Edieke enye akande mi, iyedi ifịn mbufo. Edi edieke n̄kande enye, mbufo ẹyedi ifịn nnyịn.’

Nditọeka David ẹma ẹtiene ẹsịne ke otu mbonekọn̄ Israel. Ke ini David ekemende udia ọsọk mmọ ke an̄waekọn̄, enye ama okop se Goliath etịn̄de onyụn̄ ọdọhọ ete: ‘Mmọn̄ n̄kan̄wana ye enye!’ Edidem Saul ama ọdọhọ ke enye edi eyenọwọn̄. Edi David ama ọdọhọ ete: ‘Jehovah ayan̄wam mi.’

Saul ama emen ọfọn̄ekọn̄ esie esịne David, edi David ama ọdọhọ ete: ‘Ndikemeke ndisịne ọfọn̄ emi n̄n̄wana ekọn̄.’ David ama emen utopitiat aka idịm akasat ndọnọ itiat ition ọdọn̄ ke ekpri ekpat efehe ebịne Goliath. Goliath ama ofiori ete: ‘San̄a di mi, afo ekpri eyenọwọn̄ oro. Mmọn̄ mmen fi nnọ inuen enyọn̄ ye unam ikọt ẹta.’ Ndịk ikanamke David. David ama ofiori n̄ko ete: ‘Afo ada akan̄kan̄ ye eduat ebịne mi, edi ami nda enyịn̄ Jehovah mbịne fi. Afo edi en̄wan ye Abasi, udịghe ye nnyịn. Kpukpru owo mi ẹmọn̄ ẹkụt ke Jehovah enyene odudu akan akan̄kan̄ ye eduat. Enye ọmọn̄ emen kpukpru mbufo esịn nnyịn ke ubọk.’

David ama osio itiat kiet esịn ke utopitiat esie onyụn̄ ada ofụri odudu esie ofụn̄. Jehovah ama anam itiat oro ọkọtọ Goliath onyụn̄ ebe odụk enye ọkpọiso. Anyan okopidem owoekọn̄ oro ama ọduọ ke isọn̄ akpa. Mbon Philistia ẹma ẹfen̄e. Ndi afo ọmọbuọt idem ke Jehovah nte David?