Jehovah Owụt ke Imọ Idi Ata Abasi

Ediwak ndidem ke esien Israel duop ẹma ẹdiọk etieti. Ahab ekesịne ke otu mbon emi ẹkediọkde ẹkan. Enye ama ọdọ ibak mma kiet emi okokponode Baal, enye ekekere Jezebel. Ahab ye Jezebel ẹma ẹnam ata ediwak owo ẹkpono Baal ẹnyụn̄ ẹwot mme prọfet Jehovah. Ntre Jehovah ama ọdọn̄ prọfet Elijah utom ọnọ Ahab.

Elijah ama ọdọhọ Edidem Ahab ke edịm ididepke ke Israel ke ntak idiọkn̄kpọ esie. Ofụri isua ita ama ebe, n̄kpọ-in̄wan̄ itịbeke; udia ikonyụn̄ idụhe. Ekem Jehovah ama ọdọhọ Elijah afiak aka ebịne Ahab. Ahab ama ọdọhọ enye ete: ‘Afo edi owo mfịna! Afo esịn se inade emi.’ Elijah ama ọdọhọ ete: ‘Idịghe ami. Afo anam edịm okûdep ke ntak emi atuakde ibuot ọnọ Baal. Imọn̄ idiọn̄ọ m̀mê anie idi ata Abasi. Nam nditọ Israel ye mme prọfet Baal ẹsop idem ke Obot Carmel.’

Elijah ama ọdọhọ mbon emi ẹkesopde idem do ete: ‘Ẹmek enye emi ẹdidade inọ. Edieke Jehovah edide ata Abasi, ẹtiene enye. Edieke edide Baal, ẹtiene Baal. Edi ẹyak ise m̀mê anie idi ata Abasi. Yak mme prọfet Baal 450 ẹdiọn̄ uwa emi ẹdiwade inọ abasi mmọ ẹnyụn̄ ẹkot abasi mmọ. Ami n̄ko nyọdiọn̄ uwa emi ndiwade nnọ Jehovah, nnyụn̄ n̄kot Jehovah. Ndien Abasi emi edinamde ikan̄ edita uwa edi ata Abasi.’ Kpukpru mmọ ẹma ẹnyịme.

Mme prọfet Baal ẹma ẹdiọn̄ uwa mmọ ẹnyụn̄ ẹkot abasi mmọ tọn̄ọ usenubọk tutu mbubreyo, ẹte: ‘O Baal, yere nnyịn!’ Sia Baal mîkọbọrọke mmọ, Elijah ama ọdọn̄ Baal ndọk onyụn̄ ọdọhọ mmọ ete: ‘Ẹnen̄ede ẹfiori. Etie nte enye edede, ndien ana owo edemede enye.’ Mmọ ẹma ẹfiori ẹkot Baal tutu mbubreyo. Edi Baal ikosụk iyereke.

Ekem Elijah ama emen uwa esie odori ke itieuwa, an̄wan̄a mmọn̄ ọduọk ọyọhọ uwa ye itieuwa oro, onyụn̄ ọbọn̄ akam ete: ‘O Jehovah, mbọk nam mbon emi ẹfiọk ke afo edi ata Abasi.’ Kpa idahaoro, Jehovah ama anam ikan̄ oto heaven edita uwa Elijah. Mme owo ẹma ẹfiori ẹte: ‘Jehovah edi ata Abasi!’ Elijah ama ọdọhọ ete: ‘Ẹkûyak mme prọfet Baal ẹfehe!’ Ẹma ẹwot mme prọfet Baal 450 usen oro.

Ke ẹma ẹkekụt ekpri obubịt enyọn̄ ke enyọn̄ inyan̄, Elijah ama ọdọhọ Ahab ete: ‘Ọkpọsọn̄ edịm ọmọn̄ edep. Tịm chariot fo sọsọp wat nyọn̄ ufọk.’ Enyọn̄ ama ekịm, ofụm efịme, ọkpọsọn̄ edịm onyụn̄ ọtọn̄ọ ndidep. Edịm ama afiak edep ndien ke Israel. Ahab ama awat chariot esie n̄kpa n̄kpa. Edi Jehovah ama anam Elijah efehe ekebe chariot oro! Edi mfịna Elijah ikokụreke.