Josiah Ama Ama Ibet Abasi

Josiah ekedi isua itiaita ini enye ọkọtọn̄ọde ndikara Judah. Mbon Judah ẹkesibre mfọni ẹnyụn̄ ẹkpono nsunsu abasi ini oro. Ini Josiah ekedide isua 16, enye ama odomo ndikpono Jehovah ke ata nnennen usụn̄. Ini enye ekedide isua 20, enye ama ọtọn̄ọ ndisio mme nsunsu abasi mfep ke Judah onyụn̄ abiat mme itieuwa mmọ. Ndien ke enye ama ekesịm isua 26, enye ama anam ẹdiọn̄ temple Jehovah.

Hilkiah emi ekedide Akwa Oku ama okụt n̄wed Ibet Jehovah ke temple; etie nte ekedi enye emi Moses ekewetde. Shaphan emi ekesiwetde n̄kpọ ọnọ edidem ama emen n̄wed oro okokot ọnọ Josiah. Se Edidem Josiah okokopde ama anam enye ọdiọn̄ọ ke mbon Judah ẹsọn̄ ibuot ye Jehovah ke ediwak isua. Ntre enye ama ọdọhọ Hilkiah ete: ‘Jehovah ayat esịt ata etieti ye nnyịn. Ka kobụp Jehovah se ikpanamde. Enye eyeteme nnyịn se idinamde.’ Jehovah ama ọdọn̄ Huldah emi ekedide prọfet an̄wan ọdọhọ mmọ ete: ‘Mbon Judah ẹma ẹkpọn̄ mi. Nyọnọ mmọ ufen, edi ididịghe ke eyouwem Josiah, koro enye osụhọde idem.’

Ke ini Edidem Josiah okopde oro, enye ama ọwọrọ aka temple okokot kpukpru mbon Judah obon, onyụn̄ okot Ibet Jehovah ọnọ mmọ. Josiah ye mbon Judah ẹma ẹn̄wọn̄ọ ke iyanam se Jehovah etịn̄de ke ofụri esịt.

Mbon Judah ẹma ẹtre ndinịm Passover ke ata ediwak isua. Edi ke ini Josiah okụtde ke ibet ọkọdọhọ yak ẹsinịm Passover kpukpru isua, enye ama ọdọhọ mmọ ete: ‘Imọn̄ inịm Passover inọ Jehovah.’ Ntre enye ama anam ndutịm man awa ata ediwak uwa, onyụn̄ anam mme ọkwọikwọ ẹdu ke temple. Ofụri Judah ẹma ẹnịm Passover ẹnyụn̄ ẹnịm Usọrọ Uyo Eke Leaven Mîdụhe ke usen itiaba. Akanam owo inịmke utọ Passover oro tọn̄ọ Samuel akakpa. Josiah ama ama Ibet Abasi ata etieti. Ndi esinem fi ndikpep n̄kpọ mban̄a Jehovah?