Jesus Ọkọk Udọn̄ọ ke Usen Sabbath

Mme Pharisee ẹma ẹsua Jesus etieti ẹnyụn̄ ẹyom se ẹdade ẹmụm enye. Mmọ ẹma ẹdọhọ enye okûkọk owo udọn̄ọ ke Sabbath. Edi ke usen Sabbath kiet, Jesus ama okụt ete kiet emi akamanade nnan nte eben̄ede n̄kpọ ke efak. Enye ama ọdọhọ mbet esie ete: ‘Ẹse nte odudu Abasi edinamde ete emi okụt usụn̄.’ Jesus ama afiari etap abuak ye mbat ada eyet nnan oro ke enyịn, onyụn̄ ọdọhọ enye ete: ‘Ka n̄kpọdiọhọ mmọn̄ Siloam keyet sio.’ Enye ama ekeyet osio onyụn̄ ọtọn̄ọ ndikụt usụn̄; akpa enye okokụtde usụn̄ ekedi oro tọn̄ọ akamamana.

Idem ama akpa mme owo tutu mmọ ẹdọhọ ẹte: ‘Ndi ete oro ekesiben̄ede n̄kpọ do edi emi m̀mê owo ebiet owo?’ Enye ama ọdọhọ ke imọ ke edi. Mmọ ẹma ẹbụp enye ẹte: ‘Akanam didie okụt usụn̄?’ Ke enye ama eketịn̄, mmọ ẹma ẹda enye ẹbịne mme Pharisee.

Enye ama ọdọhọ mme Pharisee ete: ‘Jesus akada mbat eyet mi ke enyịn onyụn̄ ọdọhọ n̄ka n̄keyet nsio. Mma n̄ka n̄keyet, oro anam n̄kụt usụn̄ idahaemi.’ Mmọ ẹma ẹdọhọ ẹte: ‘Edieke Jesus ọkọkde udọn̄ọ ke usen Sabbath, ọwọrọ idịghe Abasi ọnọ enye odudu.’ Edi mbon en̄wen ẹma ẹdọhọ ẹte: ‘Enye ikpekemeke ndikọk udọn̄ọ ndomokiet edieke mîdịghe Abasi ọnọ enye odudu.’

Mme Pharisee ẹma ẹkot ete ye eka esie ẹbụp m̀mê eyen mmọ akanam didie okụt usụn̄? Idem ama enyek ete ye eka esie sia mme Pharisee ẹma ẹbiere ndibịn owo ekededi emi ọbuọtde idem ye Jesus nsio ke synagogue. Ntre mmọ ẹma ẹdọhọ ẹte: ‘Nnyịn idiọn̄ọke-o. Ẹbụp enye.’ Mme Pharisee ẹma ẹfak owo oro mbụme tutu enye ọdọhọ ete: ‘Mmetetịn̄ kpukpru n̄kpọ nnọ mbufo. Nso inam mbufo ẹsụk ẹyịre ẹbụp?’ Mmọ ẹma ẹyat esịt ẹbịn enye.

Jesus ama oyom enye okụt onyụn̄ obụp enye ete: ‘Ndi ọmọbuọt idem ke Messiah?’ Enye ama ọbọrọ ete: ‘N̄kpọbuọt, ekpedi mmọdiọn̄ọ enye.’ Jesus ama ọdọhọ ete: ‘Ami ndi Messiah.’ Ata eti n̄kpọ ke Jesus akanam ọnọ ete oro! Jesus ama anam enye okụt usụn̄ onyụn̄ anam enye enyene mbuọtidem.