Bible Edi Ikọ Abasi—Ẹkewet Enye Ẹnọ Nnyịn

Jehovah ọnọ nnyịn ata eti enọ; ẹkot enye Bible. Nsio nsio n̄wed 66 odu ke Bible. Emekeme ndikere: ‘Bible akanam didie edidu? Enye edi n̄wed anie?’ Yak ineme nte Bible akasan̄ade esịm nnyịn ubọk man an̄wam fi okụt ibọrọ mbụme oro.

1. Bible anam didie edi N̄wed Abasi ke ini edide mme owo ẹkewet?

N̄kpọ nte owo 40 ẹkewet Bible; ẹkeda n̄kpọ nte isua 1,600 ẹwet enye. Ẹketọn̄ọ ke ọyọhọ isua 1513 B.C.E., ẹnyụn̄ ẹwet ẹma ke n̄kpọ nte ọyọhọ isua 98 C.E. Mbon emi ẹkewetde Bible ikotoho obio kiet; mme ọkọiyak, mme ekpemerọn̄, ye ndidem ẹma ẹsịne ke otu mbon oro ẹkewetde Bible. Edi kpukpru se mmọ ẹwetde asan̄a kiet. Nso inam edi ntre? Abasi ọkọnọ mmọ se mmọ ẹkewetde. (Kot 1 Thessalonica 2:13.) Mmọ ikewetke ekikere idemmọ, edi ẹketịn̄ “ikọ eke otode Abasi nte edisana spirit adade mmọ usụn̄.”a (2 Peter 1:21) Abasi akada edisana spirit esie ọnọ mmọ se mmọ ẹdiwetde.—2 Timothy 3:16.

2. Anie ye anie ke Bible ekeme ndin̄wam?

Mme owo ke ‘kpukpru idụt ye esien ye usem ye obio’ ẹkeme ndidia ufọn eti mbụk emi odude ke Bible. (Kot Ediyarade 14:6.) Abasi anam Bible odu ke ata ediwak usem akan n̄wed ekededi. Ekpere ndidi kpukpru owo ke ererimbot emi ẹkeme ndikot Bible. M̀mê owo oto m̀mọ̀n̄, m̀mê esisem nso utọ usem, Bible do ke usem enye ọdiọn̄ọde.

3. Jehovah akanam didie yak Bible ọbọhọ odu tutu mfịn?

Ẹkewet Bible ke n̄kpọ emi esisọpde ataha, utọ nte ke ikpa ye ke papyrus. Edi iren emi ẹkemade Bible ẹma ẹsitịn̄ enyịn ẹsion̄o enye ẹwet. Ndusụk mme andikara ye ikpọ owo ufọkabasi ẹma ẹdomo ndinam Bible okûdu aba, edi mme owo ẹma ẹnyịme ndikpa utu ke Bible etre ndidu. Jehovah ikayakke owo m̀mê n̄kpọ ndomokiet anam Ikọ esie okûsịm nnyịn. Bible ọdọhọ ke ‘ikọ Abasi eyebịghi ke nsinsi.’—Isaiah 40:8.

SỊN IDEM KPEP

4. Bible etịn̄ n̄wed owo emi imọ idide

Se VIDIO emi. Ekem kot 2 Timothy 3:16, ndien ekem ẹbọrọ mbụme oro ẹtienede ẹnyụn̄ ẹneme ẹban̄a mmọ.

VIDIO: Anie Enyene Bible?—Ekpri Esie (2:48)

• Nso inam ẹkot Bible N̄wed Abasi ke ini edide mme owo ẹkewet?

• Ndi emekere ke Abasi ekeme nditie ke heaven nnam mme owo ẹwet se enye oyomde?

5. Mme asua ikekemeke ndinam Bible okûdu aba

VIDIO: Mmọ Ẹma Ẹnen̄ede Ẹma Bible—Ekpri Esie (William Tyndale) (6:17)

• Ke ama okokop se mme owo ẹkenyịmede ndinam man inyene Bible, ndi ọdọn̄ fi ndikot se idude ke Bible? Nso inam ọdọn̄ fi?

Kot Psalm 119:97, ekem ẹbọrọ mbụme emi ẹnyụn̄ ẹneme ẹban̄a enye.

• Nso ikanam ediwak owo ẹnyịme ndikpa man ẹkabade Bible ẹnyụn̄ ẹnam mme owo ẹnyene enye?

6. N̄wed ofụri owo

Bible ke ẹkabade ẹkan; enye ke mme owo ẹnyụn̄ ẹnyene awak akan. Kot Utom 10:34, 35, ekem ẹbọrọ mbụme emi ẹnyụn̄ ẹneme ẹban̄a mmọ:

• Nso inam Abasi anam ẹkabade Ikọ esie ke ata ediwak usem onyụn̄ anam ediwak owo ẹnyene enye?

• Nso inam ama Bible?

SE IKPEPDE

Bible edi Ikọ Abasi; Abasi anam enye esịm mme owo ubọk.

Se M̀mê Emeti

• Ama esikop ke Abasi akada spirit esie anam ewet Bible, esin̄wan̄a fi didie?

• Nso ye nso ke enen̄ede ama ke otu mme n̄kpọ emi ekpepde aban̄a Bible ke ukpepn̄kpọ emi?

• Ndidiọn̄ọ ofụri se Abasi akanamde man afo enyene Ikọ esie anam fi ada Abasi didie?

KPEP N̄KPỌ EN̄WEN

Kot n̄kpọ ban̄a Bible—ọtọn̄ọde ke enye emi ẹkesiwetde ke ikpan̄wed esịm mbon emi odude idahaemi.

“Nte Isan̄ade Inyene Bible” (g-E 11/07)

Se n̄kpọ ita emi mîkekemeke ndinam Bible etre ndidu.

“Nte Bible Asan̄ade Edisịm Mfịn” (Enyọn̄-Ukpeme No. 4 2016)

Se se nsio nsio owo ẹkenyịmede ndinam man Bible aka iso odu.

Mmọ Ẹma Ẹnen̄ede Ẹma Bible (14:26)

Ẹma ẹsion̄o Bible ẹwet ẹnyụn̄ ẹkabade enye ediwak ini. Edi edinam didie idiọn̄ọ ke owo ikokpụhọke n̄kpọ ke Bible?

“Ndi Ẹkpụhọ N̄kpọ ke Bible?” (Odu ke jw.org)