Ntọt M’ọkwọrọ Obio Ubọn̄
Ndinyịme Eti Mbụk ke Belgium
“ANIE okokụt orụk n̄kpọ nte mmọemi?” Ntre ke n̄kọk itieutom eke Mme Ntiense Jehovah ke Belgium ọdọhọ. (Men Isaiah 66:8 domo.) Ediye idụt emi ọmọtọt n̄wakn̄kan ibat mme asuanetop 24,464 ke isua utom 1989. N̄kọri ke mbahade 4 eke ikie ama odu n̄ko ke ibat mbọn oro ẹkebuanade ke utom ukwọrọikọ ke ọfiọn̄ kiet kiet ke ẹbaharede ukem ukem.
◻ Oku Catholic kiet sia ọdiọn̄ọde aban̄a eti mbụk oro Mme Ntiense Jehovah ẹtan̄ade, ke ini okonịmde Mass ke Sunday ama ọdọhọ mbọn ufọkederi esie ete: “Edieke Mme Ntiense Jehovah ẹdide ke enyịnusụn̄ fo, bere enye nnọ mmọ. Mmọ ẹmenyene akpanikọ!” Ukem oro ke n̄wan kiet akanam. Ke ini Mme Ntiense ẹkekade, enye ama eberede usụn̄ ọnọ mmọ onyụn̄ ọbọ n̄wed Life—How Did It Get Here? By Evolution or by Creation? Nte ini akade enye ama oyom n̄wed Afo Emekeme Ndidu Uwem ke Nsinsi ke Paradise ke Isọn̄. Ẹma ẹtọn̄ọ ukpepn̄kpọ Bible ye enye, edi ebe esie ikesitieneke ibuana. Ntre eyenete eren kiet ama okot enye ke urụk ukopikọ onyụn̄ obụp m̀mê enye akpama ndidu uwem ye n̄wan esie ke ererimbot oro ọfọnde akan? Nte utịp, enye ama etiene abuana ke ukpepn̄kpọ oro. Mme ọdọ ndọ emi ẹkedụn̄ ọtọkiet ye unana edisịn ndọ mmọ ke ibet, edi mmọ ẹma ẹdian ndọ mmọ nte ibet onyịme ndien ibịghike ẹma ẹna baptism.
◻ Akpanikọ ama okpụhọde uwem ekpri n̄kaiferi kiet. Ke mîkam isịmke kan̄a isua 14 ke emana, ẹma ẹyak enye odụk usụn̄ idemesie. Enye ama osobo ekpri akparawa kiet onyụn̄ odụn̄ ye ẹnye, odude uwem akpara, adade n̄kpọsọn̄ ibọk onyụn̄ owụtde edu afai. Ekem akparawa oro ama ọduọk uwem esie ke unọmọ o-moto. Emi ama anam n̄kaiferi emi okop ọkpọsọn̄ editịmede esịt, ndien enye ama ekere ndiwot idem. Enye ama eyịk ete, ‘M̀mọ̀n̄ ke ami n̄keme ndikụt usọbọ nnọ mme mfịna mi?’ Enye ama aka okosobo obụpekpo oro akanamde enye onịm ke akpanikọ ke imọ imekeme ndinyene nneme ye nsan̄a esie oro ama akakpa. Mmọ ẹma ẹdomo emi ẹse ke ndinam idap eyet ẹnye ye ke ndiyom utịbe ifiọk oro ẹbede ukeme owo. Sia mîkwe ndọn̄esịt oro ẹnye okoyomde ito emi, enye ama afiak ọduọ odụk ọkpọsọn̄ mfụhọ. Ke ediwak ọfiọn̄, enye ama adianade idemesie ọkpọn̄ mme owo ofụri ofụri. Ekem owo Ntiense Jehovah kiet ama osobo ẹnye onyụn̄ odomo ndin̄wam ẹnye ke n̄kan̄ eke spirit. Ke ndusụk ini ẹkenam emi ebe ke leta, ndien nte ini akade mme n̄kpọ ẹma ẹnen̄ede ẹbono ke enye ke idemesie ama ekesịn ekese ukeme ye ifịk. Idahaemi ẹma ẹnam enye ọbọhọ odudu mme demon, edu un̄wọn̄ sika, ye ọkpọsọn̄ ntụk ubiomikpe. Nte ini akakade, ifiọk Bible ye spirit Jehovah ẹma ẹn̄wam enye akamba akamba. N̄ko, mme mbonoesop ẹma ẹsọn̄ọ enye idem, nte ẹnye ekesịnde ifịk ke nditịm idem mben̄e mmọ. Idahaemi ẹnye ama ana baptism onyụn̄ enyene edu usiakusụn̄. Enye ke onịm ediwak ukpepn̄kpọ Bible, kiet ke otu ẹmi edi ye ẹka esie, oro idahaemi esidụkde ndusụk mbonoesop. Ke akpanikọ, Jehovah ama an̄wam enye!
◻ Mbọn oro ẹsidade mme ifet oro ẹberede ke ufọkn̄wed ẹnam n̄kpọ ẹmenyene nti utịp ke ndisuan ẹti mbụk. Ẹma ẹnọ ekpri eyenete an̄wan kiet ifet ke ufọkn̄wed ke Belgium nditịn̄ ikọ ke ibuotikọ oro enye emekde. Enye ama emek nditịn̄ mban̄a Mme Ntiense Jehovah ye se mmọ ẹnịmde ke akpanikọ, ọkọn̄de nneme esie ke ekpri n̄wed oro, Jehovah’s Witnesses in the 20th Century. Emi ama otụk andikpep oro idem. Ke enye ama okokụre nneme esie, ẹma ẹnyịme nditọ ufọkn̄wed ẹbụp mme mbụme. Ediwak nditọ ubet ukpepn̄kpọ esie ke oro ebede ẹma ẹbụp se mmimọ inyenede ndinam man ikpodu uwem ke Paradise Abasi oro enye akasiakde ke utịn̄ikọ esie. Ediwak owo, esịnede andikpep oro, ẹma ẹyom ndibọ nsio nsio n̄kpri n̄wed oro eyenete an̄wan emi ekenyenede. Mme ubet ukpepn̄kpọ eken ẹma ẹyom n̄kpri n̄wed ẹmi ye ntọt efen efen, ndien andikpep ukpepn̄kpọ ido ukpono ama odụn̄ọde n̄kpri n̄wed ẹmi onyụn̄ otoro mmọ ọnọ ubet ukpepn̄kpọ esie.
Ẹma ẹdiọn̄ uko uko edinam ekpri eyenete an̄wan nnyịn ẹmi. Ẹma ẹsuan n̄kpri n̄wed 23 ẹnọ mme andikpep iba ye ediwak nditọ ufọkn̄wed; eyen ufọkn̄wed kiet, ke ama okokop aban̄a utịn̄ikọ oro, ama oyom n̄kpọ ndida nnam utom Mme Ntiense Jehovah an̄wan̄a ke ubet ukpepn̄kpọ esie.
Ediwak owo ke ẹnyịme eti mbụk ke Belgium. Mmọ ẹmenyịme Ikọ Abasi, “idaha enye nte ikọ owo, edi ẹda enye nte ikọ Abasi—ke akpanikọ edi oro—ikọ oro onyụn̄ anam utom ke esịt mbufo ẹmi ẹnịmde ke akpanikọ.”—1 Thessalonica 2:13.