Emem Ererimbot​—Nso ke Enye Edinen̄ede Ọwọrọ?

EMEM ererimbot oro Abasi enyenede ke ekikere eyebuana se ikponde ikan editre ndin̄wana ekọn̄ ke ofụri ekondo m̀mê unana edida n̄kpọekọn̄ nuclear nnam n̄kpọ. Emi an̄wan̄a oto ke usụn̄ nte Bible adade ikọ oro “emem.” Ke uwụtn̄kpọ, ke N̄wed Abasi usem Hebrew (“Akani Testament”) ikọ adade ọnọ emem edi sha·lohmʹ. Ẹda orụk ikọ emi ke Genesis 37:14, ke ebiet ete-ekpụk oro, Jacob, asiande eyen esie Joseph ete: “Mbọk ka kese m̀mê nditọ-usọ etie nte ọfọnde, m̀mê ufene onyụn̄ etie nte ọfọnde; ndien fiak didọhọ mi.”a Ẹfiak ẹda Sha·lohmʹ ke Genesis 41:16, ke ebiet ẹsịnde enye “emem.”

Ntre, ke usụn̄ifiọk eke Bible, ata emem ibuanake sụk ikpîkpu editre mme edinam usua ke ibio ini edi abuana n̄ko nsọn̄idem, edinyene ifụre, ye mfọnọn̄kpọ. Nsiondi nnyịn emi ekebemde iso ama owụt nte ke mme owo ikemeke ndisio eyịghe oro odude mfep ke nte ẹkemede ndida emem ndi. Edi Jesus Christ ikpọn̄îkpọn̄, kpa “Ọbọn̄ Emem,” editan̄ se isuanade emi ọdọn̄ ọtọkiet onyụn̄ ada ata emem ọsọk isọn̄. (Isaiah 9:6, 7) Ke uwụtn̄kpọ, kere mban̄a se Bible etịn̄de ke Psalm 72:7, 8 ke se iban̄ade ukara owo oro ete: “Edinen owo eyefiari ke eyo esie; ye ediwak emem n̄ko tutu ọfiọn̄ okụre. Ndien enye eyeda ubọn̄ ọtọn̄ọde ke inyan̄ kiet tutu osịm eken, onyụn̄ ọtọn̄ọde ke akpa tutu osịm ke utịt isọn̄.” Kamse​—nsọn̄idem, ifụre, mfọnọn̄kpọ ke ofụri ererimbot! Idụhe ediomi ukaraidem ndomokiet oro ekpekemede ndinam oro tutu amama. Edi Obio Ubọn̄ Abasi ikpọn̄îkpọn̄ ekeme ndinam oro, ndien enye eyenam se ikam ikande oro. Bible ọnọ nnyịn ekese inem inem prọfesi oro esịnde un̄wana ke emem ererimbot eke ini iso emi. Yak nnyịn ineme iban̄a ndusụk mmọ.

Uduọn̄ọ N̄kpọekọn̄ ke Ofụri Ekondo—Usụn̄ Abasi!

Psalm 46:8, 9 ọdọhọ ete: “Mbufo ẹdi ẹdise se Jehovah anamde, emi esịnde n̄wụre ke ererimbot. Enye anam ekọn̄ etre tutu osịm ke utịt ekondo; eyebụn̄ utịgha, onyụn̄ osịbe eduat: eyenyụn̄ ọfọp mme chariot ke ikan̄.” Ikọ ẹmi “utịgha,” “eduat,” ye “chariot,” ẹdi idiọn̄ọ orụk n̄kpọekọn̄ m̀mê ukwak ekọn̄ ekededi. Jehovah ke ntre aka anyan akan edisụhọde ubọk ke ubot n̄kpọekọn̄ m̀mê idem ediduọn̄ọ n̄kpọekọn̄ ofụri ofụri. Enye ke ofụri ofụri eyesio n̄kpọekọn̄ nuclear efep, ọtọmbe, moto ekọn̄, ubomofụm ekọn̄, iyịrọ ekọn̄, otop-idem-ikpọn̄, ikan̄​—n̄kpọ kiet ekededi oro ekemede ndida ndịk nsọk emem ofụri ekondo!

Nte ededi, n̄kpọekọn̄ ikpọn̄ isidaha ekọn̄ idi. Nte ido edide, ekọn̄ enyene orụn̄ esie oto ido usua, idiọkitọn̄, m̀mê edu afai eke mme anana mfọnmma owo. (Men James 4:1-3 domo.) Obio Ubọn̄ Abasi ke ntre eyewot n̄kpọ oro anamde ekọn̄ odu mi ebe ke ndisio utọ mbubiam edu emi mfep ke idem mme owo. Didie? Ebe ke ndutịm unọ ukpep eke ofụri ekondo. “Ifiọk Jehovah eyeyọhọ ke ererimbot, kpa nte mmọn̄ ofụkde inyan̄.”​—Isaiah 11:9.

Ntre, sia ‘Jehovah ọnọde ukpep,’ ubonowo idisehe aba ukpụhọde eke orụk nte ntak un̄wana en̄wan, uwụt usua, m̀mê useri iseri. (John 6:45) “Abasi iten̄eke owo enyịn,” ndien mme andidụn̄ isọn̄ ẹyewụt edu unana editen̄e owo enyịn esie. (Utom 10:35) Obio Ubọn̄ oro n̄ko eyesio n̄kpọ ekededi oro akpanamde en̄wan idụt ye idụt odu efep ke ndimen mme adan̄a idụt mfep. ‘Tọ ke inyan̄ kiet sịm eken tutu osịm ke utịt isọn̄,’ kpukpru owo ẹyewụt nte mmọ ẹnyịmede ẹnyụn̄ ẹdarade ndisụk ibuot nnọ ukara Christ.​—Psalm 72:8.

Man otodo utọ emem ntre odu ebịghi, Obio Ubọn̄ oro n̄kọ eyesio n̄kpọ oro ọtọde ubahade ke mbụk owo efep: kpa nsunsu ido ukpono. (Zephaniah 2:11) Ubonowo ẹyediana kiet ke utuakibuot oro mmọ ẹtuakde ẹnọ n̄kukụre Abasi akpanikọ. (Isaiah 2:2, 3) Itie nditọete eke ofụri ererimbot eyedu ke kpukpru ebiet!

Emem ke Ntuaha Ubon

Nte ededi, nso ufọn ke emem ererimbot ekpenyene edieke mme ufọkidụn̄ ẹkpekabarede ẹdi an̄waekọn̄ emi isụn̄i, uyat uyat ikọ, ye n̄kpọndịk ẹtode ẹwọn̄ọ kpukpru ini. Oro edi nte ediwak ubon ẹtiede mfịn. Ubon eken ẹsidịp n̄kpọsọn̄ udu oro mmọ ẹnyenede ke ntak ọkpọsọn̄ ndopuyo.

Ana ata emem ke ntre esịne ifụre eke ubon. Ke idak ndutịm unọ ukpep Obio Ubọn̄ oro, ẹyekpep mme ebe ye ibanndọ nte ẹnamde n̄kpọ ye kiet eken ke ima ye ukpono. (Colossae 3:18, 19) Ẹyekpep nditọn̄wọn̄ ‘ndikpono mme ete ye eka mmọ ke kpukpru n̄kpọ.’ (Colossae 3:20) Nditọ nsọn̄ibuot ididụhe nditịmede nnyụn̄ mfịna mme ete ye eka mmọ. Nsụkibuot edidi ido unam n̄kpọ, edidianakiet edidi ewụhọ. Edidi n̄kpọ inemesịt ndinyene nditọn̄wọn̄, edinyụn̄ edi n̄kpọ idara ndidu ye mmọ.

Mfịn, mme mfịghe ndutịm uforo amanam mme mfịna ubon ẹtotịm ẹsọn̄ ubọk ẹkan, sia emi esiwakde ndidori mme ete ye eka ndodobi mbiomo ndinam utom idịbi udia. Edi ke idak ukara Christ, ẹyebiomode mme ubon ndodobi mbiomo okụk ẹfep​—nsọn̄urua okụk ufọk, akwa udori ke okụk oro ẹkebuọtde, okụk tax oro ọdọkde-dọk, unana utom. Utom ata oro oyụhọde udọn̄ owo edidi barasuene. Ndien owo ndomokiet idinanake ufọkidụn̄. Tịmfiọk nte prọfesi ke Isaiah 65:21-23 osiode mme akpan n̄kpọ’ ẹmi owụt ete: “Ndien mmọ ẹyebọp ufọk ẹnyụn̄ ẹdụn̄ ke esịt . . . Mmọ idibọpke, ndien owo en̄wen odụn̄; iditọhọ, ndien owo efen adia: . . . ndien edimek ikọt mi ẹyedia se ubọk mmọ ẹnamde. Mmọ idinamke utom ke ikpîkpu, idinyụn̄ imanke nditọ inọ n̄kpọndịk: koro mmọ ye ubon mmọ n̄ko ẹdide nditọ mmọ eke Jehovah ọdiọn̄de.”

Kere nte odụn̄de ke n̄kann̄kụk oro mme n̄kpọ oro enyịn okụtde, uyom, ye mbumbu utebe obio mîfịnake fi! Kere nte odụn̄de ke isọn̄ oro etiede awawa awawa​—isọn̄ fo​—oro ẹdiọn̄de ediye ediye ẹnyụn̄ ẹtọde ke mfọnmma usụn̄. Kere nte en̄wekde nsasana ofụm; okopde n̄kpọ, idịghe ọkpọsọn̄ uyom n̄kpọ ntatenyịn eyomfịn, edi inem inem uyom oro otode obot. Edi akpanikọ, ndusụk owo ẹmi ẹnyenede mfọniso ẹma ẹtọtọn̄ọ ndikop inem ndusụk n̄kpọ ẹmi. Edi ke idak Obio Ubọn̄ Abasi, kpukpru owo ẹyekop inem edidụn̄ ke emem emem idaha. Ubuene, owo ọ-biọn̄, owo unana ididụhe.​—Psalm 72:14, 16.

Bible akaiso ọn̄wọn̄ọ ete “edi ẹyesobo mme idiọkowo ke isọn̄ ẹfep.” (Mme N̄ke 2:22) Oro ọwọrọ edisio ubiatibet mfep. Edieke ata ekpri eyen fo akade mbre ke an̄wa, afo udufịnake idem uban̄a mbon oro ẹsiyomde nditọn̄wọn̄ ikọ m̀mê mbon oro ẹsiyịpde nditọn̄wọn̄, m̀mê moto ẹmi mme andiwat ẹfụmde iso ye enyịn mmịn, m̀mê mme uyen oro ẹkpọrọrede ẹsan̄a ye inam n̄kpọsọn̄ ibọk. Nditọ fo ẹyebre mbre ke ata ifụre ye emem.

Emem ye Ọkpọ Ọkpọ Mfọnọn̄kpọ Fo

Ke akpatre, n̄kpọ aban̄ade ọkpọ ọkpọ mfọnọn̄kpọ odu. Idem mme idaha Paradise isụhọkede ubiak cancer m̀mê ubiak ke mme ikpekek idem. Ana ata emem ke ntre esịne edisio udọn̄ọ, ye n̄kpa mfep. Ndi utọ n̄kpọ ntre emem utom? Ke adan̄aemi okodude ke isọn̄, Jesus Christ ndien ndien ama owụt nte enye akande udọn̄ọ oro mme owo ẹdọn̄ọde, ubọk. (Matthew 8:14-17) Ke ediye ebiet oro enye odude ke heaven, Christ eyekeme ndinam mme utịben̄kpọ ke ofụri isọn̄! Bible ọn̄wọn̄ọ ete, “Ndien enyịn eyen̄wan̄a mme nnan, utọn̄ eyenyụn̄ esịrede mbon inan. Ndien mbụn̄ọ eyenek nte edop, edeme imụm eyenyụn̄ ọkwọ.”​—Isaiah 33:24; 35:5, 6.

Nte ededi, ubịnikọt oro Christ edidade etiene mme n̄kpọ nnanenyịn oro ẹsịmde owo iditreke do. Apostle Paul anam emi an̄wan̄a ke se iban̄ade ukara Christ ete: “Koro Enye enyene ndida ubọn̄ tutu Enye [Abasi] onụk kpukpru mme asua Esie ke idak ikpat. Akpatre usua emi Enye edisobode edi n̄kpa.” (1 Corinth 15:25, 26) Emi ọwọrọ ndisio kpukpru n̄kpọ mmọn̄eyet oro n̄kpa akadade ọsọk ubonowo toto ke editọn̄ọ mfep. Nte Jesus Christ ke idemesie akanamde an̄wan̄a ete: “Ini ke edi eke kpukpru mme andidu ke udi ẹdikopde [Christ] uyo ẹwọn̄ọ ẹdi.” (John 5:28, 29) Ediwak million owo ẹmi owo mîkemeke ndibat, ẹmi ẹkedude uwem ẹnyụn̄ ẹkpan̄ade ke nnanenyịn ẹyenyene ifet ke ntre ndibuana ke emem ererimbot oro edide.

Nte afo eyebuana ke enye? Mme Ntiense Jehovah ẹkpak fi ndikpep n̄kpọ efen efen mban̄a se Bible ekpepde ke n̄kpọ emi.b Idotenyịn oro aban̄ade emem ererimbot akama inemesịt akaha, edi ata idem n̄kpọ akaha, ndidi se ẹfụmide. Nịm ke akpanikọ ete ke edieke afo esịn̄erede idemfo ke ndikpep n̄kpọ nnyụn̄ nda Ikọ Abasi nsịn ke edinam, “Abasi emem eyedu ye mbufo”​—ke nsinsi!​—Philippi 4:9.

[Mme Ikọ Idakisọn̄]

[Ndise ke page 5]

Jehovah eyenam ekọn̄ etre “tutu osịm ke utịt ekondo”

[Ebiet Ẹdade N̄kpọ Ẹto]

Ndise Ukara USAF

[Ndise ke page 6]

Ẹyenọ mme ebe ye ibanndọ ukpep ndinam n̄kpọ ye kiet eken ke emem