Edinyan̄a Ekpere Ọnọ Mbon Uten̄e Abasi!
“[Ọbọn̄) Jehovah ọmọfiọk ndinyan̄a mmọemi ẹten̄ede Enye nsio ke idomo, ndinyụn̄ mmụm mme idiọkowo nnịm ke itie ufen, tutu osịm usen ikpe.”—2 PETER 2:9.
1. (a) Nso mme mfụhọ mfụhọ idaha ẹsak iso ẹse ubonowo ke eyo nnyịn? (b) Ke ikerede iban̄a emi, mme mbụme ewe ke nnyịn iyom ndikere mban̄a?
MME mfịna uwem ke ẹkọkọri ẹnọ ofụri ubonowo. Emi edi ntre edide owo odụn̄ ke ebiet oro n̄kpọ udu-uwem ẹdide barasuene m̀mê ke ebiet oro n̄kpọ udu-uwem mîwakke. Unana ifụre odu ke kpukpru ebiet. Nte n̄kpọ eke idiọk ndutịm uforo mîkemke, ikpọ mfịna n̄kann̄kụk ke ẹbiat isọn̄ ererimbot, ẹsịnde kpukpru uwem ẹmi ẹdude ke enye ke itie ndịk. Udọn̄ọ ke atara asuana. Udọn̄ọ oro ẹsibede owo, udọn̄ọ esịt, ye udọn̄ọ cancer amada ekese uwem owo. Oburobụt ido uwem amada nditaha ọsọk mme ntụk owo onyụn̄ ada ọsọk uwem ubon. Ke ẹsiode kpukpru ẹmi ẹfep, ererimbot ọyọhọ ye afai. Ke ikerede iban̄a se n̄kaowo asakde iso ese, nnyịn ke esịt akpanikọ ibụp ite: Nte eti ntak odu ndidori enyịn ke edinyan̄a eke mîbịghike? Edieke edide ntre, enye edisan̄a didie edi, edinyụn̄ enyene mmanie?—Men Habakkuk 1:2; 2:1-3 domo.
2, 3. (a) Ntak emi nnyịn mfịn ikụtde se ẹtịn̄de ke 2 Peter 2:9 nte se ifiakde isọn̄ọ mbuọtidem-e? (b) Mme akpan edinam edinyan̄a ewe ke Bible owụt nte isọn̄ ntak kaban̄a nsịnudọn̄?
2 Se idade itie ke eyo nnyịn anam nnyịn iti ndusụk n̄wọrọnda ini eken ke mbụk owo. Apostle Peter odụri ntịn̄enyịn owụt mme n̄kpọntịbe edinyan̄a oro Abasi akanamde ke mme ini oro, ndien enye n̄ko anyan ubọk owụt akpatre ikọ ẹmi ọsọn̄ọde mbuọtidem mi ete: “Ọbọn̄ [Jehovah] ọmọfiọk ndinyan̄a mmọemi ẹten̄ede Enye nsio ke idomo.” (2 Peter 2:9) Nọ ntịn̄enyịn ke utịn̄ikọ eke udọn̄ọikọ emi, ke 2 Peter 2:4-10:
3 “Koro edieke Abasi mîkayakke mme angel ẹmi ẹkeduede ẹbọhọ, edi otopde mmọ ọduọk ke itie ufen, onyụn̄ esịnde mmọ ke n̄kịm n̄kịm ukpe, ete, ẹnịm mmọ ẹtie do ẹbet ikpe; edieke Enye mîkonyụn̄ iyakke akani ererimbot ọbọhọ, edi ekpemede Noah, ọkwọrọ edinen ido, ye owo en̄wen itiaba, ke ini Enye anamde ukwọ ọtọ ofụk ekondo eke mîbakke Abasi; edieke Enye onyụn̄ ọfọpde mme obio Sodom ye Gomorrah ẹkabade ntọn̄, ke ini Enye adade nsobo obiom mmọ ikpe, onyụn̄ anamde mmọ ẹdi uwụtn̄kpọ ọnọ mmọ eke mîbakke Abasi; onyụn̄ anyan̄ade Lot, edinen owo oro, emi ofụhọde aban̄a mbukpo ido mme anamidiọk koro ke adan̄aemi edinen owo oro odụn̄de ke otu mmọ, se enye okụtde onyụn̄ okopde anam eti esịt esie okụt ndutụhọ ke usen ke usen ye otịme otịme edinam mmọ: Ọbọn̄ [Jehovah] ọmọfiọk ndinyan̄a mmọemi ẹten̄ede Enye nsio ke idomo, ndinyụn̄ mmụm mme idiọkowo nnịm ke itie ufen, tutu osịm usen ikpe; akpan akpan mmọ eke ẹsan̄ade ke ndek ndek idiọkitọn̄ obụkidem ẹdu uwem ẹnyụn̄ ẹsịnde mme andikara.” Nte itien̄wed Abasi oro owụtde, se ikadade itie ke eyo Noah ye ke eyo Lot enyene se ọwọrọde ọnọ nnyịn.
Edu oro Okodude ke Eyo Noah
4. Ke eyo Noah, ntak emi Abasi ekesede isọn̄ nte ebiet oro abiarade-e? (Psalm 11:5)
4 Mbụk oro odude ke Genesis ibuot 6 asian nnyịn ete ke isọn̄ ama abiara ke enyịn Abasi akpanikọ ke eyo Noah. Ntak-a? Ke ntak afai. Emi ikedịghe n̄kpọ ẹdọhọde ke ibat ibat afai ubiatibet kpọt ẹkeda itie. Genesis 6:11 ọtọt ete ke “afai [ama] onyụn̄ ọyọhọ ke ererimbot.”
5. (a) Nso edu ke n̄kan̄ mme owo okotịp n̄kpọ esịn ke afai eke eyo Noah? (b) Nso ke Enoch okodụri owo utọn̄ ke se iban̄ade edu unana uten̄e Abasi?
5 Nso ikedi ntak? Itien̄wed Abasi oro nnyịn ikotde ito 2 Peter etịn̄ otụk mbon oro mîbakke Abasi. Ih, edu unana uten̄e Abasi ọkọyọhọ mbubehe owo. Emi ikedịghe sụk unana edikere mban̄a ibet Abasi oro akpaimọ owo ẹkewụtde, edi ekedi edu nsọn̄ibuot ye Abasi ke idemesie.a Ndien ke ini mme owo ẹsọn̄de ibuot ye Abasi, didie ke ẹkeme ndidori enyịn nte ke mmọ ẹyenam n̄kpọ mfọnido mfọnido ye ekemmọ owo? Mi kan̄a, mbemiso Noah akamanade, unana uten̄e Abasi ama atara etieti tutu eyedi se Jehovah anamde Enoch etịn̄ prọfesi aban̄a se ididide utịp. (Jude 14, 15) Nsọn̄ibuot mmọ ye Abasi ke akpan ekenyene ndida ubiomikpe Abasi ndi.
6, 7. Ewe idaha oro abuanade mme angel ekedi akpan ntak ke ndiọi idaha oro okodude mbemiso Ukwọ?
6 Odudu efen ama odu n̄ko oro okotịpde n̄kpọ esịn ke afai eke eyo oro. Genesis 6:1, 2 odụri ntịn̄enyịn owụt emi ke ini enye ọdọhọde ete: “Edikem, ke ini owo ẹtọn̄ọde ndiwak ke iso isọn̄, nditọiban ẹnyụn̄ ẹmanade ẹnọ mmọ, ndien nditọiren Abasi ẹkụt nditọiban owo nte ẹyede, ndien mmọ ẹda iban kpukpru eke mmọ ẹmekde ẹdọ.” Mmanie ẹkedi nditọiren Abasi oro? Ikedịghe mme ikpîkpu owo. Irenowo ke ediwak isua ikie ẹma ẹkokụt ndiye iban ẹnyụn̄ ẹdọ mmọ. Nditọiren Abasi ẹmi ẹkedi mme angel ẹmi ẹkemende obụkidem owo ẹsịne. Ke Jude ufan̄ikọ 6, ẹdọhọ ke mmọ ẹdi “mme angel . . . ẹmi mîkomụmke itie-odudu eke mmọ ikama, edi ẹkpọn̄de ebietidụn̄ idemmọ.”—Men 1 Peter 3:19, 20 domo.
7 Ke ini mme akakan owo ẹdide edibotn̄kpọ mi, oro ẹkemende obụkidem ẹsịne nte irenowo ẹkenyenede ebuana idan̄ ye nditọiban owo, nso ikedi utịp? “Ata ikpọ owo [Nephilim] ẹkedu ke isọn̄ ke ini oro; ndien ke nditọiren Abasi ẹma ẹketiene nditọiban owo n̄ko, mmọ ẹnyụn̄ ẹmande nditọ ẹnọ mmọ, mmọ ẹdi ata n̄kpọsọn̄ owo uko, ẹmi ẹdude ke eyo oko, mbon etop.” Ih, nditọ oro ẹkemanade oto ebuana idan̄ oro mîsan̄ake nte ido edide mi ẹkedi ata ikpọ owo, n̄kpọsọn̄ owo ẹmi ẹkedade akwa odudu mmọ ẹkan mbon eken ubọk.—Genesis 6:4.
8. Didie ke Jehovah akanam n̄kpọ aban̄a ndiọi idaha oro ẹkedude ke isọn̄?
8 Idaha okodude akakam ọdiọk didie? Enye ama okosịm udomo oro “Jehovah okụt[de] idiọkn̄kpọ owo nte okponde ke isọn̄, kpukpru n̄kpọ ke ekikere esịt esie ẹnyụn̄ ẹsụk ẹdi idiọk kpukpru ini.” Didie ke Abasi akanam n̄kpọ aban̄a idaha emi? “Jehovah atua n̄kpọfiọk koro enye akanamde owo ke isọn̄, esịt onyụn̄ ayat enye.” Emi iwọrọke ite ke Abasi ekekere ete ke imọ ima inam ndudue ke ini ikobotde ubonowo. Utu ke oro, enye akatua n̄kpọfiọk nte ke imọ ima ikobot mme owo, edu-uwem mmọ ama ọdiọk etieti tutu eyedi se obiomode imọ ndisobo mmọ.—Genesis 6:5-7.
Edinam oro Akadade Osịm Edinyan̄a
9. (a) Ntak emi Abasi akanamde n̄kpọ mfọnido mfọnido ye Noah? (b) Nso mbemiso ntọt ke Abasi ọkọnọ Noah?
9 Amaedi Noah, enye ama “okụt mfọn ke iso Jehovah. . . . Noah enen onyụn̄ ọfọn ama ke eyo esie, Noah asan̄a ye Abasi.” (Genesis 6:8, 9) Ntre Jehovah ama ebemiso ọnọ Noah ntọt ete ke Imọ imọn̄ ida ukwọ ofụri ererimbot idi onyụn̄ eteme enye ete ọkọn̄ ubom. Ẹyesọhi ofụri ubonowo ke iso isọn̄ ẹfep, ke mîbọhọke Noah ye ubon esie. Idem edibotn̄kpọ ẹdide unam ẹdi se ẹdisobode, ke mîbọhọke ibat ibat ke otu mme akpan orụk unam kiet kiet oro Noah ekenyenede ndida ndụk ubom.—Genesis 6:13, 14, 17.
10. (a) Nso ntịmidem ke ẹkenyene ndinam ye ekikere edinyan̄a uwem, ndien utom oro okokpon adan̄a didie? (b) Nso idi n̄wọrọnda ke usụn̄ nte’ Noah ekesede enyịn aban̄a utom esie?
10 Edibemiso mfiọk se iditịbede emi ama odori Noah ndodobi mbiomo ke idem. Ana ẹbọp ubom oro. Ẹkenyene ndinam enye ke mbiet akamba ekebe, enyenede ufan̄ ubonn̄kpọ oro okponde ke n̄kpọ nte ikpat 1,400,000. Noah ekenyene ndidọn̄ udia nyọhọ enye nnyụn̄ mmụm mme unam ye inuen ndọn̄—”kpukpru obụkidem,” man ẹbọhọ. Emi ekedi utom ubọpn̄kpọ oro akadade ediwak isua. Noah akanam n̄kpọ didie? Enye ama “anam kpukpru se Abasi eketemede enye, ntem ke enye anam.”—Genesis 6:14-16, 19-22; Mme Hebrew 11:7.
11. Kaban̄a ikọtufọk esie, nso akpan mbiomo ikodoro Noah ke idem?
11 Ke adan̄aemi akanamde utom oro, Noah n̄ko ekenyene ndisio ini nnịm man ọbọk ikọtufọk esie ke n̄kpọ eke spirit. Ama oyom ẹkpeme mmọ mbak mmọ ẹditiene mme afai afai usụn̄ ye edu nsọn̄ibuot mbon ẹmi ẹkekanarede mmọ ẹkụk. Ekedi akpan n̄kpọ nte ke inaha mmọ ẹsịn idem ẹbe ubọk ke mme mbubehe uwem ofụri usen. Abasi ama enyene utom ọnọ mmọ ndinam, ndien ekedi akpan n̄kpọ nte mmọ ẹbọp uwem mmọ ẹdian ke utom oro. Nnyịn imọfiọk ite ke ubon Noah ẹma ẹnam item esie ẹnyụn̄ ẹbuana mbuọtidem esie, koro Noah, n̄wan esie, nditọiren mmọ mbita, ye iban nditọ mmọ—kpukpru ẹdide owo itiaita—ẹdi se N̄wed Abasi etịn̄de unyịme unyịme aban̄a.—Genesis 6:18; 1 Peter 3:20.
12. Nte ẹwụtde ke 2 Peter 2:5, nso mbiomo ke Noah okobiom ye mbuọtidem?
12 Noah n̄ko ama enyene mbiomo en̄wen—ndidụri mme owo utọn̄ mban̄a Ukwọ oro ekedide ndinyụn̄ nnam ẹfiọk ntak emi akanade enye edi. Uyarade odu nte ke enye ke edinam akpanikọ ama obiom mbiomo oro, koro ẹtịn̄ ẹban̄a enye ke Ikọ Abasi nte “ọkwọrọ edinen ido.”—2 Peter 2:5.
13. Nso mme idaha ke Noah akasak iso ese nte enye akanamde utom oro Abasi ọkọnọde enye?
13 Idahaemi kam kere mban̄a mme idaha oro Noah okodude anam utom oro ẹkedọn̄de enye! Men idemfo nịm ke itie esie. Edieke afo ekpekedide Noah m̀mê owo ufọk esie, afai oro ata n̄kpọsọn̄ owo ye mbon oro mîkabakke Abasi ẹkenamde akpakakanade fi okụk. Odudu mme ọsọn̄ibuot angel oro okpokotụk fi nnennen nnennen. Nte afo akpanamde utom ke ubom oro, afo akpakakabade edi n̄kpọ nsahi. Ndien ke isua ke isua nte afo odụride owo utọn̄ aban̄a Ukwọ oro ekedide, afo okpokụt ete ke mme owo ẹma ẹnen̄ede ẹkọmọ idemmọ ke mbubehe uwem ofụri usen tutu eyedi se mmọ “mînyụn̄ ifiọkke”—oro edi, “tutu ukwọ edi edimen mmọ kpukpru efep.”—Matthew 24:39; Luke 17:26, 27.
Nso ke Ifiọk N̄kpọntịbe Noah Ọwọrọ Ọnọ Fi
14. Ntak emi mîsọn̄ke nnyịn idem mfịn ndidiọn̄ọ idaha oro Noah ye ubon esie ẹkesobode-e?
14 Utọ idaha ntre idịghe n̄kpọ ọsọn̄de ndomo esisịt inọ ekese mme andikot n̄wed nnyịn ndikụt. Ntak mîsọn̄ke-e? Koro mme idaha ẹdude ke eyo nnyịn ẹnen̄ede ẹbiet mmọ oro ẹkedude ke eyo Noah. Jesus Christ ọkọdọhọ ke emi edi se ẹdoride enyịn ndikụt. Ke akwa prọfesi esie oro aban̄ade ini edidu esie ke utịt editịm n̄kpọ emi, Jesus ama ebemiso etịn̄ ete: “Koro nte mme usen Noah ẹkedide, kpasụk ntre ke edid[u] Eyen Owo eyenyụn̄ edi.”—Matthew 24:37,
15, 16. (a) Nte ekedide ke eyo Noah, didie ke edi akpanikọ nte ke isọn̄ mfịn ọyọhọ ye afai? (b) Nso afai akpan akpan ke ikọt Jehovah ẹsobo?
15 Nte n̄kpọ otịbe ke usụn̄ oro? Nte ererimbot mfịn ọyọhọ ye afai? Ih! Mme owo ẹwakde ẹbe million ikie kiet ẹmekpan̄a ke ekọn̄ eke isua ikie emi. Utịp otode emi ama otụk ndusụk mme andikot n̄wed nnyịn nnennen nnennen. Mme abiatibet ẹmi ẹkeyomde ndibọ ediwak mmọ okụk m̀mê mme ọsọn̄urua inyene eken ẹma ẹsịn ediwak mmọ ndịk ke idem. Ndien ẹmesio mme uyen ẹnyan ẹnọ afai ke ufọkn̄wed.
16 Nte ededi, ikọt Jehovah ke ofụri ofụri ẹkụt se ikande nsobo oro otode ekọn̄ ye afai ubiatibet. Mmọ n̄ko ẹsisobo afai ke ntak mmọ mîdịghe ubak ererimbot ẹdi ẹn̄wanade ndidi mbon uten̄e Abasi. (2 Timothy 3:10-12) Ndusụk ini afai oro esidi ke uduot ediberi owo m̀mê edimia owo ufia; ke mme ini eken enye esidi edibiat inyene, ibak ibat imia, ye idem ediwowot.—Matthew 24:9.
17. Ndi ido unana uten̄e Abasi odu ke kpukpru ebiet mfịn? Nam an̄wan̄a.
17 Ke adan̄aemi ẹsịnde idem ke utọ afai ntre, mbon unana uten̄e Abasi ke ndusụk ini, ye uko uko usọn̄enyịn ẹsiwowụt emiom oro mmọ ẹmiomde Abasi. Ke obio kiet ke Africa, mme borisi ẹkedọhọ ete: “Ukara edi eke nnyịn. Mbufo ẹka ẹkedọhọ Abasi-e, edieke edide Abasi odu, ẹte enye edi edin̄wam mbufo.” Ke mme ufọk-n̄kpọkọbi ye mme itienna ekikere, Mme Ntiense Jehovah ẹma ẹsobo mme owo utọ nte Baranowsky, ke Sachsenhausen, Germany, emi ke isụn̄i ọkọdọhọde ete: “Ami mmotịbi en̄wan ye Jehovah. Nnyịn iyese m̀mê anie enyene odudu akan, ami m̀mê Jehovah.” Esisịt ini ke oro ebede, Baranowsky ama ọduọ udọn̄ọ onyụn̄ akpa; edi mbon eken ẹma ẹkaiso ndiwụt mbiet edu oro. Mbon ukara ẹmi ẹsịnde idem ke nditịbi ekọn̄ ukọbọ idịghe n̄kukụre mbon oro ẹn̄wanade ye Abasi. Ke ofụri ererimbot, ikọt Abasi ẹmekop ikọ ẹnyụn̄ ẹkụt n̄kpọ ẹmi ẹnọde uyarade nte ke mbon oro ẹsịnde idem ke mmọ isinyeneke ndịk Abasi ndomokiet ke esịt mmọ.
18. Ke mme usụn̄ ewe ke ndiọi spirit ẹtịp n̄kpọ ẹsịn ke idaha ndutịme oro omụmde ubonowo? |
18 Ke usen mfịn oro otịmde ebiet eyo Noah, nnyịn n̄ko imokụt ubiọn̄ọ ito ndiọi spirit. (Ediyarade 12:7-9) Mme demon ẹmi ẹdi kpa mme angel oro ẹkemende obụkidem owo ẹsịne ẹnyụn̄ ẹdọde iban ke eyo Noah. Ke ini Ukwọ ekedide, ẹma ẹsobo iban ye nditọ mmọ, edi ẹma ẹnyịk mme ọsọn̄ibuot angel oro ndifiak nnyọn̄ obio mme spirit. Mmọ ikenyeneke itie aba ke edisana esop Jehovah edi ẹma ẹkụk mmọ ẹsịn ke Tartarus, kpa n̄kịm n̄kịm itie, oro ẹsịbede mmọ ẹkpọn̄ un̄wana Abasi. (2 Peter 2:4, 5) Sia ẹnamde n̄kpọ ke ndausụn̄ Satan, mmọ ke ẹkaiso ndinyene n̄kpet n̄kpet ebuana ye mme owo ndien, okposụkedi mîkemeke ndimen obụkidem owo nsịne aba, mmọ ẹmedomo ndikara irenowo, iban, ye idem nditọn̄wọn̄. Ndusụk ẹmi edi se ẹnamde ebe ke mme edinam ubụp-ekpo. Mmọ n̄ko ẹsida ubonowo usụn̄ ndiwot kiet eken oro abiatde-biat ukeme ukeren̄kpọ owo. Edi ikụreke ke oro.
19. (a) Mmanie akpan akpan ke mme demon ẹda usua mmọ ẹtiene? (b) Nso ke edinam mme demon ọwọrọ ọnọ nnyịn?
19 Bible ayarade nte ke mme demon ke ẹn̄wana ekọn̄ ye mbon “ẹmi ẹnịmde mme item Abasi, ẹnyụn̄ eyịrede emụm ikọ ntiense Jesus ẹkama.” (Ediyarade 12:12, 17) Ndiọi spirit oro ẹdi mme ata andisịn nsọk nnọ ukọbọ oro ẹkọbọde ikọt Jehovah. (Ephesus 6:10-13) Mmọ ẹsida usụn̄ kiet ekededi oro mmọ ẹkemede ndinyịk m̀mê ndikpek mme owo oro ẹnamde akpanikọ man ẹbiat nsọn̄ọnda mmọ ye Jehovah ẹnyụn̄ ẹtre nditan̄a Obio Ubọn̄ Jehovah ye Jesus nte Edidem Messiah.
20. Didie ke mme demon ẹdomo ndibiọn̄ọ mme owo mbak ẹkûkịbe ẹbọhọ odudu mmọ? (James 4:7)
20 Mme demon ẹsidomo ndibiọn̄ọ mbon oro ẹyomde ndikịbe mbọhọ idiọk odudu mmọ. Akani obụp-ekpo kiet ke Brazil ọtọt ete ke ini Mme Ntiense ẹkewahade ufọk imọ, uyo demon ẹma ẹwụk imọ ẹte ikụberede usụn̄; edi n̄wan emi ama eberede usụn̄ onyụn̄ ekpep akpanikọ. Ke ediwak ebiet, mme demon ẹsida mme ebre-ifọt usụn̄ ndidomo nditre utom Mme Ntiense Jehovah. Ke uwụtn̄kpọ, ke obio-in̄wan̄ kiet ke Suriname, mme andibiọn̄ọ Mme Ntiense Jehovah ẹma ẹsobo ye enyene-nsan̄a-ekpo emi ẹketịmde ẹdiọn̄ọ nte enyeemi ekemede ndiwot mme owo ke ebe oro ke ndikam nsosio eto magic esie nnyan mmọ ke iso. Ke asan̄ade ye mbon unek esie ye mme amia ekọmọ, enyene-nsan̄a-ekpo emi, sia ọkọyọhọde ye demon, ama osobo ye Mme Ntiense Jehovah. Enye ama atan̄a ibọk esie onyụn̄ osio eto esie anyan mmọ ke iso. Mbio obio oro ẹma ẹdori enyịn ndikụt nte Mme Ntiense oro ẹduọn̄ọde ke isọn̄ ẹkpan̄a, edi akakam edi enyene-nsan̄a-ekpo emi okosụhọ onyụn̄ edi se ikọt esie oro ẹkediade bụt ẹmende ẹsio usọp usọp.
21. Nte ekedide ke eyo Noah, didie ke n̄wakn̄kan ibat owo ẹnam n̄kpọ ẹban̄a ukwọrọikọ nnyịn, ndien ntak-a?
21 Idem ke mme obio oro ubre-ifọt ye ukọk-ibọk mîdịghe se ẹnamde an̄wan̄wa, Ntiense Jehovah kiet kiet omokụt nte esitiede ke ndidomo ndikwọrọ ikọ nnọ mbon ẹmi ẹnen̄erede ẹkọmọ idemmọ ke mbubehe uwem ofụri usen tutu eyedi se mîyomke ẹfịna mmimọ aba. Nte ekedide ke eyo Noah, ata ediwak owo ‘inyụn̄ ifiọkke.’ (Matthew 24:37-39) Ndusụk owo ẹkeme ndima edidianakiet ye uforo oro nnyịn inyenede. Edi utom ubọpn̄kpọ eke spirit—oro abuanade mme hour ẹsịnde ke ọkpọ ọkpọ ukpepn̄kpọ, edidụk mbonoesop kpukpru ini, ye utom an̄wautom—kpukpru ẹmi ẹdi ndisịme n̄kpọ ọnọ mmọ. Mmọ ẹsisak mbuọtidem oro nnyịn inyenede ke mme un̄wọn̄ọ Abasi, koro uwem mmọ owụhọde ke inyene ye inemesịt obụkidem oro mmọ ẹkemede ndinyene idahaemi.
22, 23. Didie ke mme n̄kpọntịbe eke eyo Noah ẹnọ eti nsọn̄ọ nte ke Jehovah eyenyan̄a mbon uten̄e Abasi osio ke idomo?
22 Nte mme anam-akpanikọ ikọt Jehovah ke nsinsi ẹyekaiso ẹbọ esuene ke ubọk mbon oro mînyeneke ima ndomokiet inọ Abasi? N̄wan̄ansa-o! Nso ikotịbe ke eyo Noah? Ke” ndausụn̄ Abasi, Noah ye ubon esie ẹma ẹdụk ubom oro ẹkekọn̄de ẹma. Ndien, ke n̄kem n̄kem ini oro Abasi okonịmde, “kpukpru idịm inyan̄ibom [ama] asiaha, ẹnyụn̄ ẹberede window ikpaenyọn̄.” Ukwọ oro ama akaiso tutu mmọn̄ ofụk idem ikpọ obot. (Genesis 7:11, 17-20) Ẹma ẹnyịk mme angel oro ẹkekpọn̄de itie idemmọ ndifọrọde ikpọkidem owo oro mmọ ẹkemende ẹsịne nnịm nnyụn̄ mfiak nnyọn̄ obio mme spirit. Ata n̄kpọsọn̄ owo oro ye kpukpru mbon eken ẹmi mîkabakke Abasi, ẹsịnede mbon oro ẹkesọn̄de obotitọn̄ ẹkaha ndinam n̄kpọ mban̄a ntọt oro Noah ọkọnọde, ẹkedi se ẹsobode. Ke n̄kan̄ eken, Noah ye n̄wan esie ye nditọiren mmọ mbita ye iban nditọiren ẹmi ẹkedi se ẹnyan̄ade. Ntre, Jehovah ama anyan̄a Noah ye ikọtufọk esie osio ke idomo oro mmọ ke edinam akpanikọ ẹkeyọde ke ata ediwak isua.
23 Nte Jehovah eyenam ukem oro ọnọ mbon uten̄e Abasi mfịn? Ke akpanikọ mfan̄a ndomokiet idụhe iban̄a emi. Enye ọmọn̄wọn̄ọ ndinam emi, ndien enye ikemeke ndisu nsu.—Titus 1:2; 2 Peter 3:5-7.
[Mme Ikọ Idakisọn̄]
a “Anomia edi unana edikere mban̄a, m̀mê edisọn̄ ibuot ye mme ibet Abasi; asebeia [uduot ikọenyịn̄ oro adade ọnọ ‘mme owo oro mîbakke Abasi’] edi ukem edu oro ẹnyenede ẹnọ Owo Abasi.”—Vine’s Expository Dictionary of Old and New Testament Words, Volume 4, page 170.
Nte Afo Emeti?
◻ Didie ke Peter okowụt nte ke Jehovah ọmọfiọk nte anyan̄ade mbon uten̄e Abasi osio ke idomo?
◻ Nso mme n̄kpọ ikotịp n̄kpọ isịn ke afai eke eyo Noah?
◻ Ke ikerede iban̄a Ukwọ ofụri ekondo oro ekedide, nso mbiomo ke Noah ekenyene?
◻ Nso mme n̄kpọ oro ebietde eke eyo Noah ke nnyịn ikụt ke ini nnyịn?
[Ndise ke page 12]
Ndibọp ubom ama abuana ọkpọsọn̄ utom oro akadade ediwak isua
[Ndise ke page 13]
Noah ama osio ini onịm man ọbọk ubon esie ke n̄kpọ eke spirit