“Ẹsọn̄ọ Ẹda’—Ẹkûtuak Ukot Ẹduọn̄ọ
N̄KPON n̄kan eneni oro asakde iso ese ubonowo mfịn edi enye oro aban̄ade ukara ofụri ekondo. Jehovah ọmọnọ nnyịn ikot ndida ke n̄kan̄ esie nnyụn̄ ndi se ẹbatde ẹsịn ke n̄kpọ emi ebe ke ndisụk idem nnọ Edidem oro enye emekde, kpa Christ Jesus. Usọp usọp udọn̄ odu ndinam n̄kpọ mban̄a ikot esie emi, ndien ke n̄kpasịp isua ition ẹmi ẹkebede, se iwakde ikan million owo kiet ẹma ẹnam ntre. Edi mmọemi ẹma ẹkụt ẹte ke ekese n̄kpọ amabuana ke ndida ke n̄kan̄ esie akan ikpîkpu ubiere oro ẹnamde inikiet ndinam n̄kpọ Jehovah. Ana emi abuana ediyak idem nnọ ke ofụri eyouwem. Nte nnyịn iyesọn̄ọ imụm idaha nnyịn ikama ke ini n̄kpọ ọsọn̄de? Mîdịghe nte nnyịn nsịt nsịt iyetọn̄ọ ndimem idem, ke ima ‘ikọsọn̄ọ ida’ ke akpa?—1 Corinth 16:13; Mme Hebrew 2:1.
Edieke mûkwe nte usụn̄ uwem Christian ememde, bọ ndọn̄esịt to ifiọk oro nte ke ukem oro ekedi akpanikọ ye Jesus Christ. Ih, idem ikpọn̄îkpọn̄ edibon Eyen Abasi ekenyene ndibọn̄ akam mben̄e ukeme man otodo ọsọn̄ọ omụm idaha esie akama, akpan akpan ke ini n̄kpon n̄kan idomo esie akasan̄ade ekpere. Kere nte enye odude ke in̄wan̄ Gethsemane, nte ọbọn̄de akam ifịk ifịk ete: “Abba, Ete, Afo emekeme ndinam kpukpru n̄kpọ: men cup ke iso Mi fep: edi okûdi nte Ami nyịmede, edi nte Afo onyịmede.” (Mark 14:36) Enye ama ọfiọk ete ke se inade imọ ke iso imemke utom. Enye akpan akpan ama ọdiọn̄ọ ete ke n̄kpọ emi eyetụk enyịn̄ Ete imọ. Ntre, n̄kukụre mfọnmma owo ke isọn̄ ikokopke bụt ndiben̄e Abasi un̄wam.
Ke ini n̄kpọ ọsọn̄de ye nnyịn, nnyịn imenyene ukem ebiet odudu oro Jesus ekenyenede. Nnyịn imekeme ndibọn̄ akam nnọ Jehovah nyom un̄wam man otodo nnyịn idituak ukot iduọ. Edi nso orụk n̄kpọ idomo ikeme ndidaha nda nnam nnyịn ituak ikot iduọ? Ndidiọn̄ọ emi nnyụn̄ ntịm idem ke anyanini ekeme ndin̄wam nnyịn nditre ndituak ukot nduọ.
Ukọbọ Ekeme Ndinam Nnyịn Ituak Ukot Iduọ
Bible odụri owo utọn̄ ete: “Kpukpru owo eke ẹyomde ndidu eti uwem ke Christ Jesus ẹnyene ndibiom isịnenyịn.” (2 Timothy 3:12) Ukọbọ ekeme ndinam nnyịn ituak ukot iduọ, ndien enye esidi ke nsio nsio uduot. (Mark 4:17) Enye ekeme ndidi ukpan oro ukara odoride—adade ndịghe edisịn ke ufọk-n̄kpọkọbi ye idem n̄kpa edi—afai afai edinam, ubiọn̄ọ eke usen-ke-usen oro otode nsan̄a ndọ emi ọbiọn̄ọde, emi anamde mbuọtidem emem, m̀mê uyịre uyịre nsahi oro otode mme nsan̄a ufọkn̄wed.
Ukọbọ edi n̄kpọ oro ọsọn̄de owo ndiyọ, edi ẹdụri nnyịn utọn̄ ẹte ke enye eyeda itie ke usụn̄ kiet m̀mê eken. Ntre, nnyịn imekeme ndinam mbuọtidem nnyịn ọsọn̄ idem idahaemi inyụn̄ ikpep ndiberi edem ke odudu Jehovah man otodo ini ama ekem, nnyịn ikpọyọ ke odudu oro. (1 Peter 4:13, 14; 5:6-11) Nte ededi, mme n̄kpọ iduọ ẹsiwak nditie n̄kari n̄kari n̄kan ibak ibak esuene oro otodo ata ukọbọ.
Edikụt Edikpu Ekeme Ndinam Mbuọtidem Emem
Anie mîtịghi ubiak ubiak ntụk oro enye ekenyenede ke ini nnyịn ikedide nditọn̄wọn̄ inyụn̄ ikere ke ẹnam ikụt edikpu? Nte afo emeti ini emi Ete fo ọkọn̄wọn̄ọde ete ke ubon ẹyenam akpan uwọrọan̄wa edi ekem ke ndusụk ntak enye okpụhọ ekikere esie? M̀mê ini oro enye okoyomde ndida mbufo n̄ka itie ubọkunam edi ke ini ama ekekem ama enye abiat ndutịm oro efep? Didie ke afo okokụt edikpu ntem!
Ẹkeme ndinam mme Christian ẹmi ẹdide ikpọ owo ẹkụt edikpu n̄ko, ndien emi ke ndusụk idaha esida okosụn̄ọ ke afanikọn̄ ke n̄kan̄ eke spirit. Ndusụk owo ẹkekọn̄ idotenyịn mmọ ke usenọfiọn̄ emi mmọ ẹkenịmde ke akpanikọ ẹte ke Armageddon eyedi. Ke ini n̄kpọ ndomokiet mîkotịbeke ke usen oro, mmọ ẹkekere ke ẹkpu mmimọ. Mbon en̄wen ẹma ẹkụt edikpu ke ini mmọ mîkenyeneke ifetutom oro mmọ ẹkedoride enyịn ndinyene. Akande oro, mme owo ẹkeme ndikụt edikpu. Eyenan̄wan isua-18 ama asian ete ye eka esie ete ke imọ ima inen̄ede ikụt edikpu ke edu-uwem oro ndusụk n̄kparawa iren ẹnyenede ke esịt esop—ye unana mme ete ye eka mmọ nditụnọ mmọ—tutu eyedi se eyenan̄wan emi ọdọhọde ke imọ inyeneke n̄kpọ ndomokiet ndinam aba ye akpanikọ.
Ke adan̄aemi edikụt edikpu ke idak kpukpru idaha ẹmi an̄wan̄ade, ndi akpana mbon oro ẹkụtde edikpu mi ẹtuak ukot ẹduọn̄ọ ẹkpọn̄ itie ebuana oro mmọ ẹnyenede ye Jehovah? Kere ban̄a edikpu oro Jesus okokụtde ke ini mme apostle esie ẹkesọn̄ọde ẹyịre ke ndifan̄a mban̄a enyeemi ekedide n̄kpon n̄kan ke otu mmọ, ke ntre ẹwụtde edu unyene udọn̄ mban̄a ikpọ n̄kpọ. (Luke 9:46; 22:24) Kere, n̄ko, ban̄a edikpu oro Job okokụtde ke ini mme ufan esie mbita ẹmi akpakanade ẹdu do ndin̄wam enye, ẹkewọn̄ọrede ẹtịbe ikọ ye enye ẹnyụn̄ ẹtọn̄ọde ndineni mban̄a ẹdinam akpanikọ esie! (Job 22:5-10) Kpa ye oro, Jesus ye Job ikatuakke ukot iduọn̄ọ.
Kpukpru owo ẹdi mbon mmemme, ntre idiwụtke eti ibuot ndiyak idiọkn̄kpọ mbon en̄wen abiat itie ebuana nnyịn ye Jehovah. (Psalm 51:5) Unana mfọnmma ndusụk owo ikpenyeneke ndikịm nnyịn enyịn mbak idikụt mme utịbe utom oro Jehovah anamde nte enye ‘afiakde atan̄ kpukpru n̄kpọ ọdọn̄ ke Christ.’ (Ephesus 1:9, 10) Ti ete ke edi mme anana mfọnmma, mme anam-ndudue nte nnyịn ke Jehovah atan̄ obok emi, mbon ẹmi ẹyomde ntụnọ ye edinam asana man otodo ẹsọn̄ idem. (Psalm 130:3) Asua nnyịn idịghe anana mfọnmma eyenete Christian nnyịn edi edi Satan, emi oyomde ndita nnyịn edieke enye ekemede. Enye idikemeke edieke nnyịn ‘isọn̄ọde ida ke mbuọtidem in̄wana ye enye.’ (1 Peter 5:8, 9) Edieke nnyịn inyenede utọ mbuọtidem oro, nnyịn ke usụn̄ ekededi “idinyụn̄ ikwe bụt.”—Rome 9:33.
Edibiom Idem Ikpe Ekeme Ndiwot Owo
Ndusụk owo ẹmetaba itie ebuana oro mmọ ẹkenyenede ye Jehovah Abasi koro mmọ ẹkerede ẹte ke mmimọ idotke. Ke ẹkerede ẹban̄a mme mmemme ye ndudue mmọ, mmọ ẹsisịm ubiere nte ke Jehovah ikemeke-keme ndinyịme utom mmimọ. Mmọ ẹsikere ẹte ke owo nte mmimọ ndidọhọ ke kiet ke otu Mme Ntiense Jehovah akam edi mbubịk ido. Nte akanam afo amanam n̄kpọ ntre nsọn̄ido nsọn̄ido ye idemfo? Edieke edide ntre, afo ekpenyene ndin̄wana mbiọn̄ọ utọ ekikere ntre.
Nte afo ekere ke imọ idotke ndinam n̄kpọ Jehovah? Do bụp idemfo, ‘Anie odot ndikama akwa ifetutom emi?’ Kpukpru mme Christian ẹsin̄wana en̄wan kpukpru ini man ẹbiọn̄ọ mme unana mfọnmma mmọ. Idem apostle Paul ama eseme ete: “Idiọkn̄kpọ osụk ododu ye ami emi nyomde ndinam nti n̄kpọ.” (Rome 7:21) Ndi Paul ekedi owo mbubịk koro enye ke ndusụk ini ekesinamde se idiọkde? Baba. Owo mbubịk edi kiet oro ke abian̄a odomode ndidi se enye mîdịghe. Edieke nnyịn in̄wanade ndinam se inende edi ifiọnọrede iduọ ke ini ke ini ke ntak se nnyịn idide, nte oro edi edinam abian̄a mban̄a n̄kpọ? Ke akpanikọ idịghe.
Bible ọnọ nnyịn item ete “ẹmen obufa owo ẹsịne.” (Ephesus 4:24) Nte ededi, nte oro ọwọrọ ete ke nnyịn imọduọn̄ọ kpukpru n̄kani edu? Baba. Ke leta oro enye ọkọnọde ẹsọk mbon Colossae, Paul ọkọdọhọ ete ke ẹnam obufa edu “edi obufa” ebe ke nnennen ifiọk. (Colossae 3:9, 10) Ikọ oro ‘ẹnam edi obufa’ ada aban̄a edinam oro akade-ka iso. Ntre ndikpụhọde eduuwem nnyịn edi n̄kpọ oro akade-ka iso. Idịghe n̄kpọ n̄kpaidem, ndien, nte ke ini ke ini nnyịn imesikụt ndo ke idem nnyịn.
Nte ededi, emi idịghe ndidọhọ ke unam idiọkn̄kpọ ọfọn, m̀mê enye ndiwọrọ nte ke nnyịn imekeme ndiyak idem nnọ idiọkn̄kpọ ye unana edin̄wana mbiọn̄ọ, ikerede ite ke Jehovah eyedahade do ọnọ nnyịn inikiet inikiet. Edi enye aman̄wam nnyịn nditre ndikụt ndudue nte mîdotke nnọ idem nnyịn. Enye onyụn̄ anam nnyịn itotịm ima Jehovah ikan koro enye ọkọnọde uwa ufak Christ man nnyịn ikpekeme ndinam n̄kpọ nnọ Enye kpa ye idiọkn̄kpọ oro ikadade-da imana.
Apostle John ama ọnọ ekikere oro adade ukem ukem ke n̄kpọ emi ke ini enye ọkọdọhọde ete: “Mmewet n̄kpọ emi nnọ mbufo, man mbufo ẹkûnam idiọkn̄kpọ.” Edi enye ndien ke ọfiọkde se idụde ama adian do ete: “Ndien edieke owo anamde idiọkn̄kpọ [ke ntak unana mfọnmma eke owo], nnyịn imenyene Ekpe-emem ke ufọt nnyịn ye Ete, kpa Jesus Christ.” (1 John 2:1) Utu ke ndibiom idem ikpe mbe ubọk, ikike oro nnyịn inyenede iban̄a idaha nnyịn ye un̄wam oro Jehovah ọnọde ekeme ndida nnyịn usụn̄ nditiene ntịn̄ ikọ Paul emi: “Mmọkọm Abasi ke Jesus Christ Ọbọn̄ nnyịn.”—Rome 7:25.
Kûtak ke Itie Iduọ
Jesus ama ọnọ ọkpọsọn̄ ntọt aban̄a owo ekededi emi edinamde owo efen atuak ukot ọduọ ete: “Edi owo ekededi eke edisịnde kiet ke otu n̄kpri nditọn̄wọn̄ ẹmi ẹbuọtde idem ye Ami ọduọ, ọfọn akan ye enye nte ẹkpedade akamba itiat ukọk-n̄kpọ ẹkọn̄ọ enye ke itọn̄, ẹnyụn̄ ẹduọk enye ke udem inyan̄.” (Matthew 18:6) Edi nso kaban̄a owo oro ẹnamde atuak ukot ọduọ? Edieke owo m̀mê ndusụk idaha ẹnamde nnyịn ituak ukot iduọ, nte nnyịn ikpoyom ntak inọ idem nnyịn inyụn̄ idọhọ ite, “Ọfọn, oro idịghe ndudue mi, ntre ami ndinamke n̄kpọ Jehovah aba”?
Kere ban̄a uwụtn̄kpọ kiet. Nte akananam afo ọmọfiọnọde ke usụn̄ oro ice ọyọhọde, mîdịghe amatuak ukot ke udịghi-ukot? Iso-ọfọn afanikọn̄ oro okosịm fi ye unana idotenyịn. Nte an̄wan̄ade, ekeme ndidi afo ama ọfiọhọ idemfo nte atian̄arede etie ke isọn̄. Edi nso n̄kpọ efen ke afo akanam? Nte afo ama ọdọhọ ete: “Oro idịghe ndudue mi ke ami nditie mi. Ana ẹduọhọ ice [m̀mê udịghi-ukot]. Ntre ami ndidahake nda aba”? Ekeme ndidi afo ama adaha ada onyụn̄ asan̄a adaha ke itie esuene oro usọp usọp nte afo ekekeme.
Nte ukem oro ikpedịghe akpanikọ ke mme n̄kpọ eke spirit? Edieke esịt ayatde nnyịn ke ntak ndusụk idaha m̀mê ke ntak ekemmọ Christian, oro edi akpan mfịna oro ẹkpenyenede ndise mban̄a. Nte ededi, edieke nnyịn itakde ke itie iduọ, isụk iduọhọde owo ekededi ke ntak mfịna nnyịn, nte idịghe akpanikọ nte ke idaha nnyịn amakabade edi ndudue eke nnyịn akan?
Ye inemesịt, edieke ẹnamde nnyịn ituak ukot iduọ, mbiowo ye mbon eken oro ẹkọride ẹsịm ọyọhọ idaha ke esop ẹnen̄ede ẹnyịme ndin̄wam nnyịn. (Galatia 6:1) Ndien Jehovah ke idemesie esinọ mbon oro ẹnyenede udọn̄ ndinam n̄kpọ nnọ enye ukeme kpa ye mme afanikọn̄. (Philippi 4:13) Ntre nnyịn ikpenyene ndidu ke mben̄eidem kpukpru ini ndiben̄e un̄wam edieke etiede, nte ke n̄kpọ ọmọn̄ atuaha ye nsọn̄ọnda nnyịn ke n̄kan̄ Jehovah ye Obio Ubọn̄ esie. Do nnyịn idinọhọ Satan edikan ebe ke ndiyak ẹnam nnyịn ituak ukot iduọ inyụn̄ ikaiso idu ke itie iduọ nnyịn.
M̀mọ̀n̄ ke Afo Ada?
Usen kiet kiet, ikọt Abasi oro ẹyakde idem ẹnọ ẹsisobo eneni oro odomode utuakibuot oro mmọ ẹtuakde ẹnọ Jehovah. Sededi oro mmọ ẹn̄wanade ndikan, ana mmọ ẹsọn̄ọ ẹda ẹnyụn̄ ẹdi se ẹbatde ẹsịn ke n̄kan̄ Edidem Messiah Jehovah. Mme okopodudu andikara isọn̄ emi ẹmedaha ẹda “ẹdụk odu ẹban̄a Jehovah ye Messiah esie.” Nso ifet ke nnyịn inyene ntem ndida nnọ enye!—Psalm 2:2.
Nte ededi, nnyịn ikemeke ndin̄wana mbiọn̄ọ odudu ofụri editịm n̄kpọ ererimbot emi ke idem nnyịn, ntre nnyịn ibọ ndọn̄esịt ito un̄wọn̄ọ Jesus nte ke imọ iyedu ye esop imọ “tutu osịm utịt ererimbot.” (Matthew 28:20) Enye eyenọ nnyịn ibetedem. Ke adianade do, nnyịn imesinyene akwa un̄wam ke ini nnyịn idianade ketket ye Jehovah inyụn̄ iyomde un̄wam ito enye. Ndiwọn̄ọde mbịne Ikọ esie ekeme ndinọ nnyịn odudu. Ke ini nnyịn ikerede ite ke nnyịn ikemeke ndiyọ, Psalm 55:22 ọnọ nnyịn ikot ete ‘itop mbiomo nnyịn inọ Jehovah, ndien enye eyekama nnyịn: enye idiyakke edinen owo esehede ke nsinsi.’ Ih, Bible amakpak kpukpru ikọt Abasi ete “ẹsọn̄ọ ẹda ke mbuọtidem”—ẹkûtuak ukot ẹduọn̄ọ.—1 Corinth 16:13.