Ifụre Ofụri Ererimbot​—Didie?

KERE nte okpodụn̄de ke isọn̄ oro n̄kpọndịk ye unana mîdụhe. Se ifụre ofụri ererimbot ọwọrọde edi oro. Nte enye edi ikpîkpu n̄kpọ ndap?

Baba. Kere ban̄a eyo Edidem Solomon eset. Kaban̄a ọniọn̄ ọniọn̄ ukara esie, Bible ọdọhọ ete: “Judah ye Israel ẹdụn̄ ke ifụre, kpukpru owo ke idak vine mmọ ye eto fig mmọ . . . ke ofụri eyo Solomon.”​—1 Ndidem 4:25.

Ukpepn̄kpọ Otode Ukara Solomon

Mme anana-mbiet mbụk Bible, nte eke enyọn̄ emi, edi se mbon eyịghe ẹdade nte n̄kpọ n̄kponinua. Ntem, owo ekeme ndibụp ete: ‘N̄keme didie ndinịm ke akpanikọ nte ke ukara Solomon idịghe sụk n̄ke?’ Ke ibuotikọ emi okụrede, ẹnọ uyarade otode udọkisọn̄ nyom n̄kpọ eset oro mîdịghe ata nnennen. Nte ededi, ẹtọt mfọn n̄kan uyarade ke nte ukara Solomon edide ata idem-n̄kpọ ke anana-ndudue Ikọ odu-uwem Abasi, Jehovah.​—John 17:17; 1 Peter 1:24, 25.

Se ikedide ntak ifụre oro ẹkenyenede ke idak ukara Solomon ọkọn̄ọ ke edida ndinen mbet Jehovah nsịn ke edinam. Mbemiso nditọ Israel ẹkedụkde Isọn̄ Un̄wọn̄ọ, Abasi ama ọdọhọ mmọ ete: ‘Edieke mbufo ẹdikade iso ẹsan̄a ke mme ewụhọ mi, ẹnyụn̄ ẹnịm mme mbet mi, isọn̄ oro eyedụk n̄kpọ ekese. Mbufo ẹyenyụn̄ ẹdụn̄ ke ifụre ke isọn̄ mbufo. Ndien ami nyesịn emem ke isọn̄ oro, mbufo ẹyenyụn̄ ẹsụhọde ẹna, ndien baba owo kiet iditịmekede mbufo.’​—Leviticus 26:3-6.

Nte n̄kpọ mfụhọ, ke Solomon ama akakpa nditọ Israel ẹma ẹtre ndinịm ibet Jehovah; mmọ ẹma ẹwọn̄ọde ẹtiene ukpono ndem ye mbubiam mbubiam utuakibuot nnọ idan̄. Nte utịp, mmọ ẹma ẹduọk ifụre mmọ, ndien Pharaoh Shishak eke Egypt ama ada ekọn̄ odụk isọn̄ oro. (1 Ndidem 14:21-26) Jehovah ama anam an̄wan̄a mme andikara oro ẹkesopde idem ke Jerusalem ete, “Mbufo ẹma ẹkpọn̄ mi, ami nde mmonyụn̄ n̄kpọn̄ mbufo ke ubọk Shishak.”​—2 Chronicles 12:5.

Owo Emi Okponde Akan Solomon

Jesus Christ ama ọsọn̄ọ mbụk akpanikọ aban̄ade Solomon ye “ofụri ubọn̄ esie.” (Matthew 6:29) Edi kaban̄a idemesie, Jesus ama ọdọhọ ete: “Sese, Enyeemi okponde akan Solomon odu mi.” (Matthew 12:42) Nso ke ikọ esie ọkọwọrọ? Ifụre oro ẹkenyenede ke idak ukara Solomon ekedi ibio ibio. Edidem oro ekedide owo mi ikekemeke ndinam mbon oro ẹkedude ke idak ukara esie ẹbọhọ udọn̄ọ, idiọkn̄kpọ, ye n̄kpa. Jesus, nte ededi, ama ekpep mme anamidiọk owo nte mmọ ẹkpenyenede mfọnmma uwem ke ifụre nsinsi.​—John 10:10; 13:34, 35; 17:3.

N̄kpa ye ediset ke n̄kpa Jesus okonịm isọn̄ edinyene utọ ọyọhọ ifụre oro. (John 3:16; 1 Corinth 15:20) Ke ubọk nnasia Abasi ke heaven, ibịghike enye ọmọn̄ ada ifụre ofụri ererimbot ọsọk kpukpru mmọemi ẹsụkde idem ẹnọ ukara esie. Ẹma ẹnọ Edidem David eke eset odudu spirit ndiwet mban̄a emi ke ikọ uto eke Psalm ọyọhọ 72. Ikọ ẹmi ẹma ẹsu ubak ubak ke ini ukara eyen David, ntem ibuot n̄wed esie edi, “Eke Solomon.” Edi, akwa edisu ebehe ukara Obio Ubọn̄ eke Akamba Solomon, Jesus Christ.

Nte ekemde ye Psalm 72:7, 8, ifụre ẹdinyenede ke idak ukara Christ edidi ke ofụri ererimbot ye ke nsinsi. “Edinen owo ẹyefiari ke eyo esie; ye ediwak emem n̄ko tutu ọfiọn̄ okụre. Ndien enye eyeda ubọn̄ ọtọn̄ọde ke inyan̄ kiet tutu osịm eken, onyụn̄ ọtọn̄ọde ke akpa tutu osịm ke utịt isọn̄.”​—Men Zechariah 9:9, 10 domo.

Mbon oro ẹdidude ke idak ukara Christ ẹyebọhọ unana n̄ko, koro Psalm 72:16 ọsọn̄ọ ọnọ nnyịn ete: “Uwak ibokpot ẹyedu ke isọn̄ ke nsom ikpọ obot.” Nte ido edide, ẹyebọhọ asari, ufịk, ye afai n̄ko. “Koro enye eyenyan̄a ubuene ke ini enye esemede; ye owo ukụt, ye owo eke mînyeneke andinyan̄a. Enye eyefak ukpọn̄ mi osio ke ukụt ye nnama: onyụn̄ ese iyịp mmọ ke n̄kpọuto.”​—Psalm 72:12, 14.

Nte ekedide ke eyo Edidem Solomon, ntak utọ ifụre ofụri ererimbot oro edidi koro ẹdade mme mbet Jehovah eke ofụri ekondo ẹsịn ke edinam. Emi edidi ibọrọ oro ẹbọrọde eben̄e David emi edide prọfesi: “O Abasi, nọ edidem mme ikpe fo . . . Enye eyekpe ikpe mbon eke ẹtụhọde; eyenyan̄a nditọ unana, onyụn̄ anuak owo utụk.”​—Psalm 72: 1, 4.

Nso Kaban̄a se Inanade Nnyịn Idahaemi?

Owo ekeme ndidọhọ ete, ‘Kpukpru oro ẹye etieti, edi ami nyom ifụre oro n̄kụtde ke enyịn idahaemi.’ Edi akpanikọ, mme Christian ẹsụk ẹdodu ke idak unana ifụre oro ọnọmọde ubonowo​—ubiatibet, udọn̄ọ, mme afanikọn̄ ẹtode obot, usọn̄, ye n̄kpa. Nte ededi, ifiọk n̄kpọntịbe ke ofụri ererimbot omowụt ete ye ifiọk Bible, mme Christian ẹkeme ndiyọ ọfọn akan. (Mme N̄ke 15:1; 22:3) N̄ko, mmọ ẹkop uyụhọ sia ẹnyenede idotenyịn eke ọsọn̄ọde ada. Obufa eyen ukpepn̄kpọ Bible otode ekpri obio ke Johannesburg, South Africa, oro ọyọhọde ye ubiatibet ama anam usụn̄ kiet oro N̄wed Abasi akan̄wamde enye an̄wan̄a ete: “Idahaemi ami mmọfiọk nte ke ubiatibet ididụhe ke nsinsi; enye edi sụk ke ibio ini.”

Kamse, idotenyịn akam odu ọnọ mmọemi ẹkekpan̄ade nte mbon ndiọkiso ke afai afai ubiatibet. “Ami ndi ediset ye uwem,” ntre ke Jesus ọkọn̄wọn̄ọ, ndien ekem enye ama adian do ete: “Owo eke ọbuọtde idem ye Ami, okposụkedi nte enye ama akpa, enye eyedu uwem.”​—John 11:25.

Man enyene utọ ifụre ifụre ekikere oro, oyom afo enyene ọkpọsọn̄ mbuọtidem, emi otode edikpep Ikọ Jehovah. Ke ndisio ini kpukpru usen nnịm ndikpep Bible, afo emekeme ndibọ utịbe utịbe ẹn̄wọn̄ọ eke osude mi: “Owo eke okopde uyo mi eyedụn̄ ke ifụre, eyenyụn̄ etie sụn̄ anana ndịk idiọkn̄kpọ.”​—Mme N̄ke 1:33; 2:21, 22.

[Ekebe ke page 6]

“Ke idak ukara Solomon, ifiọk n̄kpọ obụkidem nditọ Israel ama okpon ke isua edịp-ye-duop akan isua ikie iba oro ẹkebemde iso. Ke mbotufọk Solomon nnyịn imokụt utak-usụhọ n̄kpọ ubọpufọk, ikpọ obio ye ndodobi ibibene, mme ufọkidụn̄ oro ẹkesuanade usọp usọp, ye ọsọn̄idem udịm udịm ufọk mme enyene-n̄kpọ-owo, usọp usọp ukpụhọde ke ifiọk ubot n̄kpọ eke eso-mbat ye ndutịm udiọn̄ n̄kpọ esie. Nnyịn n̄ko imokụt mme utak-usụhọ ndudiọn̄ n̄kpọ ẹdide n̄kpoduoho ẹkenamde ke ata anyan ebiet, kpa idiọn̄ọ ọkpọsọn̄ unyamurua ye mbubịne.”​—The House of David, eke Jerry M. Landay.

[Ebiet Ẹdade Ndise Ẹto ke page 5]

NASA photo