Ufọn Jehovah Ofori Mi
Nte Elsie Meynberg obụkde
“UFỌN Jehovah ofori owo, enye inyụn̄ i d i a n k e afanikọn̄ ke esịt.” (Mme N̄ke 10:22) Ami ke idemmi mmokụt nte n̄ke Bible emi edide akpanikọ. Yak ntịn̄ nnọ fi nte edide.
Ke ini n̄kedide isua itiokiet kpọt, mma nsikpan̄ utọn̄ ke nneme oro eka mi ekesinemede ye ekpep a-Bible kiet oro ekesiwahade etiene nnyịn, mma nnyụn̄ n̄kụt nte eka mi okokopde inem ke se enye ekekpepde. Okoneyo kiet ke ini ọkpọsọn̄ etuep, mma nsụhọde n̄ka ufọkisọn̄ man n̄kada akrasi mmọn̄ kiet ndien mma n̄kụt Eka mi etiede ekpere ana-in̄wan̄ usụn̄ itie utem bred ke okot n̄wed. Utu ke ndiduari mi nte n̄kodoride enyịn, enye ama awan̄ mi ubọk onyụn̄ anam an̄wan̄a ete ke enyịn̄ Abasi edi Jehovah. Ufiop okodude ke ikọ esie ama asian mi ete ke se enye ekekpepde ekedi ata akpan n̄kpọ ọnọ enye.
Ke nneme ifan̄ efen ye ekpep a-Bible oro ebede, Eka mi ama ọtọn̄ọ isan̄ ndibuana eti mbụk emi enye ekekpepde ye mme mbọhọidụn̄. Nte ededi, idịghe kpukpru ini ke ekesidara enye mfọn mfọn. Nnyịn ikodụn̄ ke obio-in̄wan̄ ekperede Beatty, Saskatchewan, Canada, ndien ata ediwak mbọhọidụn̄ nnyịn ẹkedi mme iman nnyịn, mme ọsọn̄idem mbon Lutheran m̀mê Evangelist. Edi, Eka mi ama akaiso ke ndiwaha ntiene mmọ.
Ami mma nsitop enyịn ke mbịtmbịt window nse nte Eka mi an̄wanade ndision̄o enan̄-mbakara ke aba, ndiọn̄ọde nte ke ikemeheke enye nditịm mmọ idem. Ke mme ini en̄wen, enye eyeka ukpepn̄kpọ m̀mê an̄wautom kpa ye mme n̄kụni Ete mi. Enye ikonyịmeke obufa ido ukpono Eka mi, edi eka mi ama anam ubiere. Enye kpukpru ini ama esinyọn̄ edi ye ntotụn̄ọ inemesịt oro kpukpru owo ẹkediọn̄ọde ẹban̄a. Enye eyedọhọ ete, “Ufọn Jehovah ofori owo.” Ami mma nsiyịk se ikọ esie ọwọrọde. Okposụkedi n̄kedide n̄kpasịp isua itiokiet, ami n̄ ko n̄koyom ndinam n̄kpọ Jehovah.
Usen kiet ami n̄kodu ke enyọn̄ ọkọm ye ete mi, ke ebiet emi enye ekesịride ndudu ọkọmufọk. Eka mi ye eyeneka mi an̄wan, Eileen, ẹma ẹsan̄a ye otuowo ke orụk moto ẹkotde T Ford ẹwọrọ ndikabuana ke “isan̄ unọ ntọt.” Mmọ ẹkeka ndikama kad ntọt nnam isan̄ n̄kanade obio man ẹtọt utịn̄ikọ Bible oro ẹdinọde.
Ete mi ama obụp mi ete, “N̄kọm afo tutu amama udusịmeke utọ ndisịme oro?” Edi idem okposụkedi n̄kedide eyenan̄wan oro akam amade udọk enyọn̄, ami mma mma ndidu ke isan̄ unọ ntọt oro akan ndidoro ke enyọn̄ ekọm. Nte edide, mmọ ẹkedọhọ ke ami mma mmụhọ n̄kaha ndikama kad ntọt.
Ndikan N̄kpọ-Ata eke Ukpan
Ke akpatre, akpa ifet ami ndibuana ke ukwọrọikọ Obio Ubọn̄ ama eberede ke November 1940. Nso n̄kpọ nduaidem! Sia ẹma ẹkekpan utom ukwọrọikọ Mme Ntiense Jehovah ke Canada ke ini oro, nnyịn ima isiwọrọ ke ufọt okoneyo ika ikobon ekpri n̄wed oro End of Nazism (Utịt Ukara Nazi) ke enyịnusụn̄ kpukpru ufọk.
Ke ini ami n̄kedide isua usụkkiet ke emana, ami mma mbiere ndiyak uwem mi nnọ Jehovah nnyụn̄ nna baptism. Ke ntak ukọbọ, owo iketịn̄ke inọ nnyịn ebiet oro idisopde idem, edi ẹma ẹda nnyịn ẹdụk akai ke ebiet emi akwa otu Mme Ntiense ẹkekade “isan̄ ubọ ofụm.” Do ami ye udun̄wan eka mi, Eleanor, ima idu ke otu ediwak owo oro ẹkenịmde baptism ke mbịtmbịt n̄kpọdiọhọ mmọn̄ oro okodude ekpere.
Ufọkn̄wed ke ini oro ẹkesitọn̄ọ ye mbon ubet ukpepn̄kpọ ẹkọmde ọfọn̄ etakubom ẹnyụn̄ ẹkwọde ikwọ ufreidụt. Okposụkedi mme nsan̄a ubet ukpepn̄kpọ nnyịn ẹkesisede nnyịn ke idiọkenyịn, nnyịn ke usụn̄ oro owụtde ukpono iyesịn ndibuana ke ntak ukpepn̄kpọ Bible oro aban̄ade ukpono ndem. (Daniel, ibuot 3) Eyen eyeneka mi an̄wan, Elaine Young, emi n̄ko ekedide Ntiense, ekesinyene ndisan̄a itiat inan̄ n̄ka ufọkn̄wed, edi kpukpru usen eyebịn enye ẹte ọnyọn̄ ke ntak mîkọmke ọfọn̄ etakubom. Do enye eyefiak asan̄a ọnyọn̄ ufọk. Enye ama anam emi ke mbahade iba isua ufọkn̄wed man owo okûsịn idiọn̄ọ ọdọhọ ke enye isikaha n̄wed emi edinamde enye okûbe udomo.
Ke n̄kụrede ufọkn̄wed, mma nnam utom ke itie unịmokụk. Edi idomo ama edi ke ini ẹkesịnde ndinyịme eben̄e mi ndika n̄kodụk mbono ofụri ererimbot eke Mme Ntiense Jehovah ke New York ke 1950. Mma nnyene ekpri okụk mma nnyụn̄ mbiere ndikpọn̄ utom nnyụn̄ ntọn̄ọ utom uyọhọ-ini. Ntre ami ye Elaine ima iwọrọ ika obio Regina. Ndusụk owo ẹma esisụn̄i mi ete, “Enye edidi eben̄e eben̄e etisịm ini utọ.” Nte ededi, ami mma n̄keme ndinyene se nyomde ke ndinam utom ibio ini nte ekpeme ufọk. Ufọn Jehovah amanam mi ndu ke utom uyọhọ-ini esie ọtọn̄ọde ke inioro.
Ndisịm Utịt Mbuba Nnyịn
Ke 1955 ami ye Elaine ima ikop nduaidem ke ẹkotde nnyịn ẹte ididụk ufọkn̄wed Gilead ọyọhọ otu 26 ndien ke ukperedem ibọde itieutom ke Bolivia, South America. N̄kpọ nte Mme Ntiense 160 kpọt ẹkedu ke ofụri obio oro ke ini oro. Ke akpatre, nnyịn ima isio ika Tarija ndikadiana ye isụn̄utom iba en̄wen ke akpa itieutom nnyịn.
Tarija ekedi ediye obio. Ekedi ata inem n̄kpọ ndikụt iban oro ẹsịnede ọfọn ke ido obio mmọ ẹbiomde mbiomo ke ibuot mmọ. Mme owo do ẹma ẹnem itie ndien akananam idọhọke nnyịn ke mmimọ inyeneke udọn̄. Mmọ nte an̄wan̄ade ẹkekere ke otịm owụt eti ido ndidọhọ nnyịn ifiak idi ke ini mmọ ẹfiọkde ẹte ke mmimọ ididụhe ke ufọk. Ama ada ini ndimehe ye oro.
Usen kiet nnyịn ke ikenyene nneme ye eren kiet ke enyịnusụn̄ esie edi itise moto oro ẹkotde jeep ama atuak ada ndien ayatesịt, adat-iso oku kiet ama ọfrọ ọwọrọ ada ke isọn̄. Enye ama ofiori eren oro ete, “Edieke afo mûtreke ndineme nneme ye nditọiban oro, ẹyenọ fi iduọ!” Ke ọwọn̄ọrede iso ese nnyịn, enye ama esịn nnyịn ndịk ete: “Mbufo inyeneke unen ndomokiet ndikwọrọ ikọ mi. Edieke mbufo mîtreke, ami nyenam n̄kpọ mban̄a oro.” Etisịm ini emi ediwak mbọhọidụn̄ ẹma ẹwọrọ ẹdi ndise. Ntre nnyịn ima isụk ikaiso ye utom nnyịn, inịmde ediwak n̄wed ye Bible inọ mme andida nse oro ẹkeyomde ndifiọk se itịbede.
Ke ima ikabiat isua iba ke ediye unaisọn̄ emi peach, mbansan̄, ye grape ẹdude barasuene, nnyịn ke akpa ikokopke inemesịt ndibọ itieutom efen ke Potosí, kpa ata mbịtmbịt obio udọk aranisọn̄ emi odude ke obot obot ebiet okon̄de ebe ikpat 13,000. Mbịtmbịt etuep Canada ama emehe nnyịn, edi ukpụhọde ekedi nte ke Potosí mme ufọk ikenyeneke n̄kpọ unam ufọk ofiop. Nte ededi, ke Potosí ufiop ufiop ebuana esop Christian ama odu, ke adan̄aemi owo mîkasiakke esop ndomokiet kan̄a ke Tarija.
Ndisiak Obufa Efakutom
Ekem, ẹma ẹnọ mi ye Elaine ika Villamontes man ikọtọn̄ọ utom ukwọrọikọ do. Moto mbiomo oro nnyịn ikodụkde ọkọyọhọ ye sugar oro ekedide n̄kpọmbet, ntre man ẹkûnyene mfịna ye mme borisi ke mme itie usịnusụn̄, awat o-moto oro ikọtọn̄ọke isan̄ ibọhọke ke eyo ama okokụt. Ubaha ekpedide nnyịn ima ikama torch isan̄a, koro inikiet inikiet n̄kpọ ama emenede idem ke n̄kan̄ nnyịn ke idak ọfọn̄ itai! Enye ekedi andin̄wam awat o-moto oro.
Ke n̄kanika ition usenubọk, nnyịn ima ituak ida. Nnyịn ima inyọni iwọrọ, idọn̄ọde ke ntak nsụn̄ikan̄, ntọn̄ onyụn̄ ọyọhọde nnyịn idem. Ntan ama ọduọ esịri usụn̄. Ke akpatre, ke ọkpọsọn̄ utom hour inan̄ okụrede, enyene moto oro ama ọdọhọ andin̄wam enye awat moto oro ebe ke ekpri afan̄usụn̄ oro ẹkesiakde. Enye ikakam isehe nte moto oro akasan̄ade ebe n̄kan̄ eken ye ọyọhọ n̄kpọnọ iba oyụtde ke ofụm ke enyọn̄ udem oro etiede nte inyeneke utịt ke mben usụn̄ oro. Ami ye Elaine ima isan̄a ke ukot ibe. Nte nnyịn ikade iso inam isan̄ ika Villamontes ke moto oro, nyoyụrọde usụn̄ obot oro ama afaha akaha tutu esinyịk awat o-moto oro ndien ndien ndifiak edem man ekeme ndiwat n̄wọn̄ọde mmọ. Ke akpatre, ke ima ikakpa mba ke hour 35, nnyịn ima ikebehe.
Ekedi obufa ifiọk n̄kpọntịbe ọnọ mi ye Elaine ndidu ofụri ofụri ke idem nnyịn. N̄kpri unam obio ufiop ekedi n̄ko obufa n̄kpọ ọnọ nnyịn. Ikpọ ọsọn̄edem ntifọt ẹyeduọ ẹdoro nnyịn ke idem ke ẹma ẹkefrọ ẹto ikan̄ oro odude ke enyọn̄. N̄kpri nsụn̄ ẹyedom nnyịn uyat uyat, ẹtịbide mfat oro ẹwọrọde mmọn̄. Ke akpa okoneyo ke obufa ufọk nnyịn, mma n̄wọrọ ndika ikọt ke ufọk ukaikọt oro odude ke an̄wa. Edi ke ini n̄kemịn̄de torch mi, ofụri isọn̄ oro ọkọyọhọ ye mfem. Ekpọk ẹma ẹfen̄e ẹwọrọ, ikpọ ikwọt ke mme inụkufọk oro ke ẹse mi. Ami mma mbiere ndibet tutu usenubọk.
Ke ukperedem, nnyịn ikodu ke mben akpa inyụn̄ ikere ndisụhọde ntie ke ibio eto kiet oro nnyịn ikokụtde do nduọk odudu. Nte ededi, nnyịn ima ibiere ndibemiso nnam mfiakn̄ka ke n̄kann̄kụk oro. Ke ini nnyịn ikọnyọn̄de idi, ibio eto oro ikodụhe do aba. Mme andisan̄a mbe oro ẹkedude ke n̄kpaidem ẹma ẹsian nnyịn ẹte ke akamba urụkikọt akana do. Mmokop inemesịt nte nnyịn mîkodomoke nditie ke “ibio eto” oro!
Se nnyịn ikokopde inem ikan ke Villamontes ekedi ediwaha ntiene mme owo ke mbubịteyo. Nnyịn iyekụt mmọ ẹtiede ke akpakaha ọ̀bọ̀n̄ ke etehe, ẹn̄wọn̄de tea oro ẹkotde maté. Nnyịn ima isibiat ediwak inem inem hour ke ndinam mme un̄wọn̄ọ Obio Ubọn̄ an̄wan̄a ke mme utọ n̄kann̄kụk ntre. Edi ata n̄kpọsọn̄ ini ama edi ke Elaine ama ọkọdọ ndọ ndien ẹfiakde ẹnọ mi n̄ka n̄kanam utom ke Vallegrande ye obufa nsan̄autom.
Ebiet Afai Afai Edem Usoputịn
Man nsịm Vallegrande, ama oyom anyan isan̄ usen ita efen, ndien isan̄ enyeemi n̄kasan̄a ikpọn̄. N̄kpafaha ntọn̄ ntọn̄ usụn̄ emi eketie nte anana-utịt usụn̄ oro akade ntre ke wilderness. Ke akpatre mma n̄kosịm ke utịn ama okosop. Bọs oro ama otịmede ifụre obio emi enan̄-mbakara ẹkewakde ẹkan moto. Mme owo ẹma ẹtie ke mme etehe ẹmi nyereọkọm ẹketeherede ẹfụk, ẹnyụn̄ ẹdade mme adaha ẹfiọk ẹwụk enyịn ese an̄wa. Ndusụk irenowo oro ẹkeberede ke adaha ẹmi ẹma ẹbọbọ n̄kpaha emi ẹfakde n̄kpri ikan̄. Eketie nte n̄kpọ eke kpukpru owo ẹsịnede mbubịt ọfọn̄. Ami n̄kekere nte: ‘Sese emi akam ebiet afai afai Edem Usoputịn!’
Enye okonyụn̄ edi ntre, ke akpanikọ. Ẹkesida ikan̄ ẹbiere mme eneni. Idem okposụkedi ekedide obio oro n̄kpọ nte owo tọsịn duop ẹdude, uwotowo ye afai ẹkedi ọsọ n̄kpọ ke ini oro. N̄ka ntịme oro ẹkesidade ke itie usịnusụn̄ ke inuaotop obio ẹkeyọyọhọ obio oro. Mbon n̄ka oro ẹkesinyene se ẹdade ẹdu uwem ke ndimụm mme bọs nnyụn̄ mbọ n̄kpọ ke n̄kanubọk. Ẹma ẹsibọ mme ọtọin̄wan̄ n̄ko n̄kpọ ke n̄kanubọk nte mmọ ẹkedade mbun̄wụm in̄wan̄ mmọ ẹdụk obio. Ye ikan̄ ke ubọk ẹma ẹsidan̄ n̄kpri nditọiban ke n̄kanubọk ke iso mme ete ye eka mmọ. Mme eka ikesikam iyakke nditọiban mmọ ẹsan̄a ikpọn̄ ẹka ndidep n̄kpọ.
Kere se ikedide ekikere nnyịn ke ini etubom n̄ka ntịme oro okodụkde Ufọkmbono Obio Ubọn̄ usen kiet. Enye ama akpa mmịn. Iso ama okpụhọde esenyịn circuit, oro ọkọnọde utịn̄ikọ. “Ami mmonịm ke akpanikọ!” ntre ke etubom n̄ka ntịme oro okofiori nte enye ọkọn̄de edem anyan n̄kpọitie oro odudu odudu ntre tutu enye asiaha. Ekem enye ama omụm esenyịn circuit. Edi inikiet inikiet enye ama osụhọde esịt, ndien akani ufan ufọkn̄wed esie ke otuowo oro ama ekeme ndida enye n̄wọrọ.
Ke akpatre, etubom ekọn̄ kiet ama okot etubom n̄ka ntịme oro en̄wan. Etubom ekọn̄ oro ama eyịri okpo ebua ke an̄waurua ye idiọn̄ọ ọdọhọde ete: “Wọrọ ke obio, mîdịghe ntre ukem n̄kpọ emi eyetịbe ọnọ fi.” Etubom n̄ka ntịme oro ama ọkpọn̄ obio ndien n̄kpọ ẹma ẹkpụhọde ke Vallegrande.
Ndusụk ini nnyịn ima isiwat hour 12 ke edem enan̄-mbakara man ikọkwọrọ ikọ ke nsannsan obio-in̄wan̄. Andikpep ke ufọkn̄wed obio-in̄wan̄ ẹmi kiet ama owụt nnyịn mfọnido ndien ke akpatre ama akabade edi kiet ke otu Mme Ntiense Jehovah. Ini kiet mma mbuọt enan̄-mbakara ndiwat n̄ka do, edi kpukpru ini oro enye ebede ufọk owo oro ekebemde iso enyene enye, enye eyewaha do, ndien eyefiak ẹda nnyịn ẹkeyak ke usụn̄.
Mme N̄kpọ-Ata—Edi Nsụk Nnyenyene Mfọn
Nte edide ye ediwak isụn̄utom eken, mma n̄kụt nte ke idịghe ufiop m̀mê n̄kpri unam, tuep m̀mê ikpọ obot, m̀mê idem udọn̄ọ ye unana edi n̄kpon n̄kan n̄kpọ-ata. Utu ke oro, enye ekeme ndidi utọk owo ye owo. ‘Ntak emi utọ mfịna ntre esidemede ke esop Jehovah?’ ntre ke n̄keyịk, mma nnyụn̄ ntọn̄ọ ndiyịk m̀mê ufọn Jehovah ofori mi. Ekem mma nti itien̄wed Abasi oro aban̄ade ufọn Jehovah ke Mme N̄ke 10:22. Udiana ubak ufan̄ikọ oro ọdọhọ ete, “Enye inyụn̄ idianke afanikọn̄ ke esịt.” Ntre nnyịn ikpọduọhọke Jehovah ke ntak mfịna ẹmi. Mma ndifiọk nte ke mmọ ẹdi ubak n̄kpọ oro Adam akayakde ọnọ nnyịn ẹmi ẹnyụn̄ ẹsịnede se Paul eketịn̄de aban̄a ke N̄wed Mbon Rome 8:22 ete: “Ofụri ekondo ke omụm mmụm, onyụn̄ odu ke ubiak uman.”
Ami mma nsiwet Walter Meynberg ke Bethel Canada, ndien ke adan̄aemi n̄kodude ke nduọkodudu ke Canada ke 1966, nnyịn ima idọ ndọ ndien ẹma ẹnọ nnyịn ika La Paz, kpa akpan obio Bolivia. Nso edidiọn̄ ke edi ntem ndikụt mme esop mi ẹkọride ẹto ke kiet kpọt ke ini nnyịn ikebehede ke Bolivia ẹsịm 24, ke kpukpru itụn̄ obio oro. Enye edi ntre ke mme obio en̄wen ke idụt emi. Ke akpanikọ, otu oro ekedide n̄kpọ nte mme asuanetop 160 oro ẹkekwọrọde eti mbụk ke Bolivia ke ini ami ke akpa n̄kebehede do ke 1955 ọmọkọri osịm n̄kpọ nte 7,000!
Ubiere uwụtn̄kpọ eka mi oro enye okonịmde ke anyanini emi ekebede omosụn̄ọ ke se iwakde ikan owo duop ke ubon nnyịn ndidu ke utom uyọhọ-ini. Ami mmokop idatesịt ndidọhọ ke ete mi ama akabade edi Ntiense oro ayakde idem ọnọ, ndien se iwakde ibe owo 30 ẹmi ami n̄kenyenede ifet ndikpep mmọ Bible ẹma ẹna baptism. Nte mmọemi idịghe uforo? Ih, mmonịm ke mmọ ẹdi. Ke akpanikọ, ‘ufọn Jehovah ofori mi.’