Ẹnyene Edidianakiet Ebe ke Christ
Mme Akpan N̄kpọ Ẹtode N̄wed Mbon Ephesus
KE NTỌN̄Ọ ntọn̄ọ 52 C.E., apostle Paul ama ọkwọrọ ikọ ke Ephesus. Uforo uforo obio mbubehe emi ke Asia Minor ekedi n̄ko iwụk ebiet nsunsu ido ukpono. Edi Ido Ukpono Christ ama akara do ke ini Paul akafiakde aka Ephesus, iso-ọfọn ke ini etuep eke 52/53 C.E. Enye ama esinọ utịn̄ikọ ke usen ke usen ke ufọkn̄wed onyụn̄ ọnọ ikọ ntiense ke ufọk ke ufọk ke ini enye odude do isua ita.—Utom 19:8-10; 20:20, 21, 31.
Ke adan̄aemi odude ke ufọk-n̄kpọkọbi ke Rome ke n̄kpọ nte 60-61 C.E., Paul ama ewet n̄wed ọnọ ẹsọk mme Christian ẹtode Ephesus. Edidianakiet ebe ke Jesus Christ edi ibuotikọ n̄wed esie. Ke akpanikọ, enye ọdọn̄ọ editịn̄ oro ẹtịn̄de ẹtụk edidianakiet ‘ke Christ’ utịm ike 13, awakde akan eke n̄wed en̄wen ekededi oro Paul ekewetde. Ukem nte mbon Ephesus, nnyịn imekeme ndibọ ufọn nto ikọ Paul ẹban̄ade idaha Christ, ifepde oburobụt ido uwem, inyụn̄ ibiọn̄ọde ndiọi odudu spirit.
Edidianakiet Edi Uduak Abasi
Akpa, Paul akanam an̄wan̄a nte Abasi edidade edidianakiet edi ebe ke Christ. (1:1-23) Jehovah ama ọtọn̄ọ ntak aduak nditan̄ kpukpru n̄kpọ ke heaven ye ke isọn̄ ndian kiet ebe ke “Obio Ubọn̄” (kpa usụn̄ unam ndutịm). Ebede ke Christ, Abasi amatan̄ mmọ oro ẹmekde ẹnọ uwem eke heaven ye mmọ eken ẹmi ẹdidude uwem ke isọn̄ adian ke idemesie. Mfịn, Abasi amadian mbon oro ẹyetde aran ye “akwa otuowo” ọtọkiet, ndien ‘editan̄ kpukpru n̄kpọ ke isọn̄ ndọn̄ kiet’ eyekaiso tutu mmọ oro ẹdude ke udi editi ẹkop uyo Jesus ẹnyụn̄ ẹwọn̄ọ ẹdi. (Ediyarade 7:9; John 5:28, 29) Nnyịn ikpenyene ndiwụt esịtekọm mban̄a emi, kpa nte Paul ọkọbọn̄de akam ete mbon Ephesus ẹkpewụt esịtekọm ẹban̄a se Abasi anamde ọnọ mmọ.
Ekem ẹma ẹwọn̄ọde ntịn̄enyịn ẹnọ mme Christian ẹdide Gentile, ẹmi inikiet ẹkekpan̄ade ke idiọkn̄kpọ. (2:1–3:21) Ebede ke Christ, ẹma ẹbiat Ibet ẹfep ẹnyụn̄ ẹnịm itiat idakisọn̄ ẹnọ mme Jew ye mme Gentile ndidiana kiet nnyụn̄ ndi temple nnọ Abasi ndidụn̄ ke spirit. Itie Paul nte akama-ukpọhọde ekedi ndinam ẹfiọk ndisana ndịben̄kpọ nte ke mme Gentile ẹkeme ndidu ke edidianakiet ye Christ, emi ebede ke enye mmọ ẹkeme ndisan̄a n̄kpere Abasi ye ifụre utịn̄ikọ. Paul ama afiak ọbọn̄ akam aban̄a mbon Ephesus, isan̄ enyeemi eben̄ede Abasi ndin̄wam mmọ ẹsọn̄ọ ẹdu ke mbuọtidem ye ima
Mme N̄kpọ Ẹnamde Edidianakiet Ẹdu
Paul ama owụt ke Abasi ọnọ mme n̄kpọ ẹnamde edidianakiet ẹdu. (4:1–16) Ke otu ẹmi edi idem eke spirit kiet emi edide esop. Idem emi anam n̄kpọ ke edidianakiet ke idak itie ibuot Christ. Enye onyụn̄ ọnọ mme owo ẹnọ ke owo ndin̄wam kpukpru owo ẹdi kiet ke mbuọtidem.
Jehovah n̄ko anam ẹkeme ndiwụt edu Christian oro anamde edidianakiet odu. (4:17–6:9) Ke ẹma ẹkemen “obufa owo esịne,” mme Christian ẹtre utọ edu unana uten̄e Abasi nte oburọbụt ikọ. Mmọ ẹsan̄a ke eti ibuot, ẹwụt Christ ukpono, ẹnyụn̄ ẹwụt ata nsụkibuot.
Adianade do, Abasi anam mme Christian ẹkeme ndibiọn̄ọ mme odudu idiọk spirit oro ẹyomde ndibiat edidianakiet nnyịn. (6:10-24) N̄kpọekọn̄ eke spirit ẹtode Abasi ẹnọ utọ ukpeme oro. Ntre ẹyak nnyịn ida enye isịn ke edinam inyụn̄ ibọn̄ akam ifịk ifịk, isịnde ekemmọ mme andinịm ke akpanikọ ke n̄kpeubọk nnyịn.
Nso eti item ke Paul ọkọnọ mbon Ephesus ntem! Nnyịn ikpakam ida mmọ isịn ke edinam ke ndifep idem ke oburobụt ido uwem inyụn̄ ibiọn̄ọ ndiọi odudu spirit. Ẹnyụn̄ ẹyak nnyịn iwụt esịtekọm ntotụn̄ọ ntotụn̄ọ iban̄a edidianakiet oro nnyịn inyenede ebe ke Jesus Christ.
[Ekebe/Ndise ke page 24]
Enyịmikan̄: N̄kpọekọn̄ eke spirit esịne “mbuọtidem nte otuekọn̄” emi ẹdidade ẹnịme, m̀mê ẹsụk ide “enyịmikan̄” Satan. (Ephesus 6:16) Ndusụk enyịmikan̄ oro mbon Rome ẹkesikamade ekesidi nnyanyan̄a enyenede odudu ye ukwak odude ke idak ke ebiet emi ẹkesisịnde aran emi asakde ikan̄. Ẹkesitop mmọ ye idan̄ oro ẹmemde mbak ikan oro edinịme, ndien ndinyịni mmọ ke mmọn̄ n̄kukụre ekesinam edemeikan̄ oro ototịm ọsọn̄inua. Edi ikpọ otuekọn̄ ama ẹsikpeme mbonekọn̄ osio ke utọ idan̄ oro, ukem nte mbuọtidem ke Jehovah an̄wamde mme asan̄autom esie “ndinịme kpukpru enyịmikan̄ andidiọk.” Ih, mbuọtidem an̄wam nnyịn ndibiọn̄ọ mme utọ n̄kpọ nte en̄wan ẹtode ndiọi spirit ye mme idomo edinam idiọk, edibịne usụn̄ uwem uma-inyene, ye ediyak idem nnọ ndịk ye eyịghe.