Ewe Abasi ke Afo Akpatuak Ibuot Ọnọ?
AKPA, anie edi Abasi kierakiet emi akpanade ẹtuak ibuot ẹnọ enye ikpọn̄îkpọn̄? Bible ọbọrọ ke ata nnennen usụn̄. N̄wed Ediyarade ọdọhọ ete: “Ọbọn̄ [Jehovah], ye Abasi nnyịn, Afo omodot ndibọ ubọn̄ ye ukpono ye odudu, koro Afo okobotde kpukpru n̄kpọ; ndien oto uduak Fo ke mmọ ẹdu, ẹkenyụn̄ ẹboro.” (Ediyarade 4:10b) Ih, Jehovah, kpa Andibot, edi n̄kukụre Abasi oro odotde ndibọ utuakibuot nnyịn. Ntak-a? Nnyịn iyewọn̄ọde ibịne mbụme oro ke esisịt ini. Edi akpa, ẹyak nnyịn itịn̄ iban̄a mme abasi eken oro ubonowo ẹtuakde ibuot ẹnọ.
Ke Edem Kpukpru Nsunsu Abasi
Okposụkedi mme owo ẹnamde n̄kpọ ẹnọ ediwak abasi, akpanikọ edi nte ke ofụri utuakibuot oro ẹtuakde ẹnọ kpukpru mme abasi ke ofụri idụt—ke ẹsiode utuakibuot oro ẹnọde Jehovah, kpa Andibot ẹfep—ẹnam sụk uduak abasi kiet kpọt. Ke ewe usụn̄? Kot ikọ oro apostle Paul ekewetde ọnọ ẹsọk mme Christian ke Corinth. Ẹma ẹtuak ibuot ẹnọ ediwak abasi ke obio oro, ọtọn̄ọde ke oburobụt Aphrodite osịm Aesculapius, abasi ukọkudọn̄ọ mmọ. Paul ama owụt, nte ededi, ete ke ama enen̄ede odu idiọk odudu kiet oro akakam odude ke edem kpukpru mme abasi oro. Enye ekewet ete: “Se mme Gentile ẹwade, ke ẹwa ẹnọ mme demon, iwaha inọ Abasi.” (1 Corinth 10:20) Ih, mme okpono ndem mbon Corinth ẹketuak ibuot ẹnọ mme demon.
Mme demon ẹnyene ntọn̄ọ mmọ ẹto nsọn̄ibuot. Akpa ye n̄kponn̄kan ke otu mmọ ekedi edibotn̄kpọ edide angel emi akabian̄ade Eve esịn ke edibiat ibet Abasi ko ke in̄wan̄ Eden. (Genesis 3:1-6; John 8:44) Ke ndinam ntre, edibotn̄kpọ emi ama ọsọn̄ ibuot ye itie edikara eke Andibot. Ke oro ebede, ekedikot enye Satan, emi ọwọrọde “Andibiọn̄ọ.” Ke ukperedem, mme edibotn̄kpọ eke spirit eken ẹma ẹdiana ye enye ke nsọn̄ibuot. Mmọ n̄ko ẹma ẹkabade ẹdi mme demon, ndien ẹdiọn̄ọ Satan nte “ọbọn̄ mme demon.” (Matthew 12:24, 26) Ke n̄wed Ediyarade, ẹkot mme demon ẹmi “mme angel” Satan. (Ediyarade 12:7) Ntem ndituak ibuot nnọ mme demon edi ukem ye ndituak ibuot nnọ Satan.
Satan enyene akwa odudu. Apostle John ọkọdọhọ ete ke “ofụri ererimbot” esịne ke ubọk esie, Paul okonyụn̄ okot enye “abasi eyo emi.” (1 John 5:19; 2 Corinth 4:4) Ntre, utuakibuot nnọ abasi ekededi ke ẹsiode Jehovah ẹfep enen̄ede edi utuakibuot nnọ Satan. Ke nsụhọde n̄kaha, enye anam uduak Satan koro utịtmbuba esie edi ndibian̄a nditọ Adam ye Eve ẹsọn̄ ibuot ye Jehovah. Sia Satan ‘abian̄ade ofụri ererimbot,’ enye nte an̄wan̄ade omokụt unen ke ata ediwak idaha. (Ediyarade 12:9) Edi idịghe ke kpukpru. Ediwak million owo oro ẹsịnde ukeme ndituak ibuot nnọ Jehovah ẹsụk ẹdodu. Ntak-a?
Mme Mfri Idiọk Utuakibuot
N̄kpọ kiet edi, mmọ ẹfiọk ẹte ke utuakibuot nnọ abasi efen ke ebede Jehovah atak mmọ n̄kpọ akan se mmọ ẹyomde ndikpe. Ẹma ẹfụhọde udi nditọn̄wọn̄ ke Carthage eset ke Edem Edere Africa ke ini udọk isọn̄ nyom n̄kpọ eset. Ọkpọ n̄kpri nditọ ẹmi ẹkewade ẹnọ Baal, abasi mbon Phoenicia ẹma ẹdu ke esịt. Uwa nditọ ekedi enyene-ndịk ekọmurua emi mbon Carthage ẹkekpede ke utuakibuot nnọ Baal. Ido ukpono Catholic ke ufọt ufọt mme isua unana ntatenyịn ama ekpe utịp n̄ko ke ini enye akamiade mme owo akpakịp ufen ke ekọn̄ uduọkiyịp oro ẹkotde Crusade ye ibak ibak Ukara Ufịk. Utuakibuot nnọ mme abasi Inca ke America mbemiso Columbus akakade do ama esịne edinam uwot ediwak tọsịn owo.
Ke ata ndondo emi, nsio nsio orụk utuakibuot ẹsịne akpakịp uwotowo ke India, mmọ ẹma ẹnyụn̄ ẹtịp n̄kpọ ẹsịn ke enyene-ndịk mfịna ukara ukaraidem ke Middle East ye Edem Edere Ireland. Unana ifiọk, nsunsu ekikere, ye ndịk ẹkpenyene n̄ko ndidi ubak ekọmurua emi owo ekpede ke ntak utuakibuot nnọ ediwak abasi esie.
Ntak Emi Afo Akpanamde N̄kpọ Jehovah Abasi-e?
Ke n̄kan̄ eken, ndituak ibuot nnọ Jehovah ada mme ufọn kpọt ẹdi. Koro, enye edi “Enyeemi odude ke nsinsi, emi okobotde enyọn̄ ye se ididu ke esịt, ye isọn̄ ye se idude ke esịt, ye inyan̄ ye se idude ke esịt.” (Ediyarade 10:6) Ntre, nnyịn ikpenyene ndituak ibuot nnọ enye koro enye edide Andibot nnyịn.
Ke akande oro, nnyịn ikpenyene ndituak ibuot nnọ Jehovah Abasi koro mme edu esie ẹnọ nnyịn ikot ndituak ibuot nnọ enye. Apostle John ọkọdọhọ ete ke “Abasi edi ima.” (1 John 4:8) Anam-akpanikọ eren oro, Job, ọkọdọhọ ete, “enye [Abasi] edi ọfiọkn̄kpọ ke esịt, onyụn̄ ọsọn̄ ke odudu.” (Job 9:3b) Moses ama ọkwọ aban̄a enye ete: “Akwa itiat, utom esie ọfọn ama: koro kpukpru usụn̄ esie ẹnende: Abasi akpanikọ emi mînamke ukwan̄ n̄kpọ, enye edi eti ye edinen.” (Deuteronomy 32:4) Anie ekpemen̄e ndituak ibuot nnọ utọ Abasi oro?
Adianade do, Bible ọdọhọ ete: “Uten̄e Abasi ọwọrọ udori ke kpukpru usụn̄, koro un̄wọn̄ọ uwem emi odude kemi ye eke uwem emi edidide asan̄ade ye enye.” (1 Timothy 4:8) Didie ke emi edi akpanikọ ntem! Jehovah oyom se ifọnde ye ubonowo. Enye ama ọnọ edibotn̄kpọ esie isọn̄ nte ediye ebietidụn̄, enye ama onyụn̄ anam ekese ndutịm man ẹkpekop inem uwem. Kpa ye nsọn̄ibuot owo, Abasi osụk akakaiso ndinịm uwem ke isọn̄ emi, ọnọde kpukpru n̄kpọ oro ubonowo oyomde nte “enye anamde utịn Esie asiaha ọnọ mme idiọkowo ye nti owo, onyụn̄ anamde edịm edep ọnọ ndinen owo ye mme anam ukwan̄ ido.”—Matthew 5:45.
Edi “un̄wọn̄ọ uwem emi odude kemi” ke akaiso. Ndinam n̄kpọ Abasi akama uyụhọ ye uduak. Emi edi se ẹkenamde nnyịn ẹnọ ndinam. Ndien Abasi an̄wam mbon oro ẹnamde n̄kpọ ẹnọ enye ke akpanikọ ndikụt unen ke uwem. Ebede ke Bible, enye ọmọnọ mbon oro mîdọhọ ndọ, mme ọdọ ndọ, nditọn̄wọn̄—mme owo me kpukpru idaha ke uwem ndausụn̄. Enye ọnọ eti ibuot emi ekemede ndiberi edem man ọnọ un̄wam ke kpukpru idaha man ikeme ndikọk mme mfịna uwem nte mme anana mfọnmma owo ke ererimbot emi odude ke idak odudu Satan. Edieke ituakde ibuot inọ Abasi ke usụn̄ oro enemde enye esịt, nnyịn iyekeme ndidara “emem Abasi, emi ayan̄ade ifiọk owo.”—Philippi 4:7.
Se itịmde idot, n̄ko, edi “un̄wọn̄ọ uwem emi edidide.” Jesus ọkọdọhọ Nicodemus, owo Pharisee oro ete: “Koro Abasi akamama ererimbot ntem, tutu Enye osio ikpọn̄îkpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem.” (John 3:16) Nsinsi uwem? Ewe abasi ke ẹsiode Jehovah ẹfep ekeme ndin̄wọn̄ọ ndinọ utọ n̄kpọ ntre ndien ekem osu un̄wọn̄ọ esie? Ẹnam akpatre idaha mmọ oro ẹbọde akwa ẹnọ oro an̄wan̄a ke Ediyarade ẹte: “Enye [Abasi] eyekwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba: eseme ye ntuan̄a ye ubiak idinyụn̄ idụhe aba; koro ebeiso n̄kpọ ẹma ẹbe ẹfep.” (Ediyarade 21:4, 5) Ke akpanikọ, idotenyịn uwem emi edide ekpenyene ndinam nnyịn iyom ndinam n̄kpọ Jehovah!
Ewe Abasi, ndien, ke nnyịn ikpatuak ibuot inọ? Jehovah kpọt, kpa Andibot. Ke otu kpukpru abasi, enye ikpọn̄ ke ikọ ẹmi etịn̄ aban̄a ete: “Mme utom Fo ẹkponi ẹnyụn̄ ẹnyene ndyọ, O Ọbọn̄ Abasi, Andikara kpukpru n̄kpọ; mme usụn̄ Fo ẹnen ẹnyụn̄ ẹdi akpanikọ, O Edidem mme obio. Anie editre nditen̄e Fi, O Ọbọn̄, ndinyụn̄ nnọ enyịn̄ Fo ubọn̄? Koro Afo ikpọn̄ edi edisana; kpukpru mme idụt ẹyenyụn̄ ẹdi edituak ibuot ke iso Fo; koro ndinen ikpe Fo ẹma ẹyarade ẹwụt idem.” (Ediyarade 15:3, 4) Mbon oro ẹnamde item andiwet Psalm ẹnyene eti ibuot didie ntem: “Mbufo ẹdi, nnyịn ituak ibuot inyụn̄ inụhọ: inyụn̄ itọn̄ọ edọn̄ ke iso Jehovah andinam nnyịn.”—Psalm 95:6.
[Ndise ke page 6]
Ndusụk abasi ẹmi Satan anamde ubonowo ẹtuak ibuot ẹnọ
[Ndise ke page 7]
Idotenyịn uwem emi edide ekpenyene ndinam nnyịn iyom ndinam n̄kpọ Jehovah