Du ke Mben̄eidem Nọ Usen Jehovah!

Mme Akpan N̄kpọ Ẹtode Akpa N̄wed Thessalonica

USEN Jehovah! Mme Christian ke Thessalonica eset ẹkekere ke enye ekpere. Ndi mmọ ẹma ẹnen? Ini ewe ke enye edidi? Oro ekedi akpan n̄kpọ emi apostle Paul ekewetde ke akpa n̄wed oro enye ọkọnọde ẹsọk mbon Thessalonica, ọnọde oto Corinth ke n̄kpọ nte isua 50 eke Eyo Nnyịn.

Paul ye Silas ẹketọn̄ọ esop ke Thessalonica, kpa ifụm ukara eke mbahade obio ukara Macedonia mbon Rome. (Utom 17:1-4) Ke ukperedem, ke akpa n̄wed oro enye ekewetde ọnọ ẹsọk mbon Thessalonica, Paul ama ọnọ itoro, ọnọ item, onyụn̄ eneme aban̄a usen Jehovah. Nnyịn n̄ko imekeme ndibọ ufọn nto n̄wed emi, akpan akpan nte usen Jehovah otịmde ekpere idahaemi.

Otoro Onyụn̄ Esịn Udọn̄ Ọnọ

Paul ama ebemiso otoro mbon Thessalonica. (1Th 1:1-10) Itoro ama odot ke ntak utom mbuọtidem mmọ ye ime. Ẹkedi n̄kpọ itoro, n̄ko, nte ke mmọ ẹma “ẹbọ ikọ Abasi ye idatesịt edisana spirit ke ufọt ọkpọsọn ukụt.” Nte afo emesitoro mmọ efen, nte Paul akanamde?

Apostle oro ama onịm eti uwụtn̄kpọ. (2:1-12) Kpa ye esuene esuene unam n̄kpọ ke Philippi, enye ama ‘ada uko ke Abasi ọkwọrọ eti mbụk’ ọnọ mbon Thessalonica. Enye ama ọsọn ikọ nneminua, isịnenyịn, ye ediyom ubọn̄. Paul ikakabakede idi ọkpọsọn̄ mbiomo edi eketie sụn̄sụn̄ ye mmọ nte eka emi ọbọkde eyen etiede ye eyen esie. Nso eti uwụtn̄kpọ ke edi ntem ọnọ mbiowo mfịn!

Ikọ Paul ẹmi ẹtienede ama esịn udọn̄ ọnọ mbon Thessalonica ndisọn̄ọ nda ke ini ẹkọbọde mmọ. (2:13–3:13) Mmọ ẹma ẹyọ ukọbọ otode mbon obio mmọ, Timothy ama onyụn̄ ada eti ntọt aban̄ade idaha eke spirit mmọ ọsọk Paul. Apostle oro ama ọbọn̄ akam ete mmọ enyene ima ẹnyụn̄ ẹnam esịt mmọ ẹnyene iwụk. Ukem ntre, Mme Ntiense Jehovah kemi ẹsibọn̄ akam ẹban̄a ekemmọ mme andinịm ke akpanikọ oro ẹkọbọde, ẹsịn udọn̄ ẹnọ mmọ ke ẹkemede, ẹnyụn̄ ẹdat esịt ẹban̄a mbụkutom nsọn̄ọnda mmọ.

Du ke Edidemede ke Spirit!

Mbon Thessalonica ndien ẹma ẹbọ item. (4:1-18) Mmọ ẹkenyene ndidọdiọn̄ nsan̄a ke usụn̄ oro enemde Abasi esịt, ẹdọdiọn̄ ẹwụt ima nditọete ẹnyụn̄ ẹda ubọk mmọ ẹnam utom man ẹnyene se mmọ ẹyomde. Akande oro, mmọ ẹkenyene ndidọn̄ kiet eken esịt ye idotenyịn oro nte ke edidu Christ mme andinịm ke akpanikọ oro ẹbonde ke spirit ẹmi ẹkekpade ẹyebemiso ẹset ẹkediana ye enye. Ke oro ebede, nsụhọ mbon oro ẹyetde aran ke ẹkpade ẹnyụn̄ ẹsetde ẹyediana ye Christ ye mmọ oro ẹma ẹkebebem iso ẹnam ẹset ẹkenyene uwem eke heaven.

Ekem Paul ama eneme aban̄a usen Jehovah onyụn̄ ọnọ item efen efen. (5:1-28) Usen Jehovah ke ekedi nte inọ, ye mbabuat nsobo adade itie ke ẹfioride mfiori oro: “Emem ye ifụre.” Ntre mbon Thessalonica ẹkenyene ndidu ke edidemede ke spirit, edide se ukwak ikpanesịt oro edide mbuọtidem ye ima ye idotenyịn edinyan̄a nte ndụn ibuot ekpemede. Mmọ ẹkenyene ndinyene ntotụn̄ọ ukpono nnọ mbon oro ẹdade usụn̄ ke esop ẹkenyụn̄ ẹnyene nditre idiọkido, nte anade nnyịn itre.

Akpa n̄wed emi Paul ekewetde ọnọ ẹsọk mbon Thessalonica ekpeneyene ndinam nnyịn itoro inyụn̄ isịn udọn̄ inọ ekemmọ mme andinịm ke akpanikọ. Enye ekpenyene n̄ko ndinụk nnyịn ndinịm eti uwụtn̄kpọ ke edu uwem ye ido edinam. Ndien ke akpanikọ enye edi item emi ekemede ndin̄wam nnyịn ndidu ke mben̄eidem nnọ usen Jehovah.

[Ekebe/Ndise ke page 22]

Ukwak Ikpanesịt ye Ndụn Ibuot: Ke akpakde edidu ke edidemede ke spirit, Paul ekewet ete: “Ẹyak nnyịn . . . imụm idem nnyịn ikama, isịne mbuọtidem ye ima nte n̄kpọ [“ukwak,” NW] ikpanesịt, inyụn̄ iyara idotenyịn edinyan̄a nte ndụn ibuot.” (1 Thessalonica 5:8) Ukwak ikpanesịt ekedi n̄kpọekọn̄ oro ekpemede ikpanesịt owoekọn̄, ẹdade ikpọk, n̄kpọkọbi, m̀mê ukwak ẹsọn̄de idem ẹnam. Ukem ntre, mbuọtidem nte ukwak ikpanesịt ẹkpeme nnyịn ke n̄kan̄ eke spirit. Ndien nso kaban̄a ndụn ibuot eset? Ẹwakde ndida ukwak nnam, enye ekedi itam ekọn̄ ẹnamde ndikpeme an̄wanaekọn̄ ke ini ekọn̄. Nte ndụn ibuot ekekpemede ibuot an̄wanaekọn̄, ntre ke idotenyịn edinyan̄a ekpeme odudu ukere n̄kpọ, ntem an̄wamde Christian ndimụm nsọnọnda n̄kama. Edi akpan n̄kpọ didie ntem nte ikọt Jehovah esịne utọ n̄kpọekọn̄ eke spirit oro!—Ephesus 6:11-17.