Mme Mbụme Ẹtode Mme Andikot

◼ Job 33:24 etịn̄ aban̄a edikụt n̄kpọ “usio-isop [“ufak,” NW] nnọ Job,” anamde enye etre ndikpa. Anie ekenyene ndidi ufak oro nnọ Job?

Ikodụhe owo ndomokiet oro ekedide uwa ufak ẹmi ẹkewade ẹnọ Job ini oro, edi Abasi ama ofụk, m̀mê efen, ndudue Job.

Satan ama anam Job okụt ediwak mfịna, ẹsịnede “idiọk oyo . . . ọtọn̄ọde ke ikpatukot esie, tutu osịm ke etịn̄ibuot esie.” Itie Job ama otịm ọdiọk tutu eyedi se n̄wan esie enyịkde enye ete “kpọn̄ [“sụn̄i,” NW] Abasi, ndien kpa n̄kpa.” Job ama akam ekere m̀mê n̄kpa ọkpọfọn akan utọ ndutụhọ oro.—Job 2:7-9; 3:11.

Ke ini eketiede nte ke Job ekeme ndikpa, Elihu ama odụn̄ọ idiọk itie Job ndien ọnọ ntak ndinyene idotenyịn, ọdọhọde ete: “Obụkidem esie eyemede tutu owo ikwe enye; . . . Ukpọn̄ esie onyụn̄ ekpere udi; uwem esie onyụn̄ ekpere mmọ eke ẹwotde owo. Edieke isụn̄utom odude ye enye, andisịne ke ufọt, kiet ke otu tọsịn, eke owụtde owo eti ido esiemọ: ndien Enye atua eye mbọm, onyụn̄ ọdọhọ ete, Fak enye mbak edisụhọde ke udi: mmokụt n̄kpọ usio-isop [“ufak,” NW]. Obụkidem esie akabade nsek akan eke eyenọwọn̄.”—Job 33:21-25.

Nnyịn imọfiọk ite ke Jesus Christ ama ọnọ mfọnmma uwem eke owo esie nte n̄kem n̄kem ufak ke ibuot mme anana mfọnmma owo. Uwa esie ama ekem ye se Adam ọkọduọkde, ekpede ekọmurua oro ẹkeyomde man ada ubọhọ-ufụn idiọkn̄kpọ edi. (Rome 5:12-19; 1 Timothy 2:5, 6) Nte ededi, emi idịghe n̄kukụre nte ẹdade “ufak” ke Bible. Ikọ Hebrew oro ẹkụtde ke Job 33:24 enen̄ede ọwọrọ “fụk.” (Exodus 25:17) Ke ini Abasi akanamde n̄kpọ ye Israel eset, enye ama anam ndutịm ndifụk, m̀mê ndisio isop, mme idiọkn̄kpọ—mme uwa oro ẹkefụkde idiọkn̄kpọ, ẹnen̄erede mme n̄kpọ ẹnịm ke ufọt mme owo ye Abasi.—Exodus 29:36; Leviticus 16:11, 15, 16; 17:11.

Mbemiso, okposụkedi, Abasi ama esinyịme ndibọ mme uwa nte mme idiọn̄ọ uwụt esịtekọm m̀mê mme eben̄e aban̄ade edifen nnọ ye edinyene unyịme. (Genesis 4:3, 4; 8:20, 21; 12:7; 31:54) Job ama ọdiọn̄ọ ufọn mme utọ uwa oro. Nnyịn ikot ite: “Ndien ke eyo esierede, enye adaha ke enyọn̄ awa edifọp uwa ke adan̄a ibat kpukpru [nditọiren esie]: koro Job ọdọhọde, ete, M̀mê nditọ mi ẹkenam idiọk ẹnyụn̄ ẹkpọn̄ Abasi ke esịt mmọ. Ntem ke Job akam esinam kpukpru ini.” (Job 1:5) Sia enye okodomode ndinem Abasi esịt ndien nte an̄wan̄ade ekenyenede edu utua n̄kpọfiọk, uwa esie ama enyene ufọn ke enyịn Abasi.—Psalm 32:1, 2; 51:17.

Edi Job ke ukperedem ama ọduọ udọn̄ọ oro eketiede nte edịghe uwem esie. Enye n̄ko ama enyene ukwan̄ ekikere aban̄a edinen ido esie, ntre enye ama oyom edinen̄ede, oro Elihu ọkọnọde adan̄aoro. (Job 32:6; 33:8-12; 35:2-4) Elihu ọkọdọhọ ete ke iyomke Job akaiso ke mfụhọ mfụhọ itie esie tutu ke n̄kpa ye udi (Sheol, m̀mê udi ofụri owo). Edieke Job akpatuade n̄kpọfiọk, ẹkpekụt “ufak.”—Job 33:24-28.

Nnyịn ikpekereke ite ke ndidọhọ “ufak” Elihu eketịn̄ aban̄a owo ke ini oro, emi akpakpade ke ibuot Job. Ke ikerede iban̄a mme uwa oro mme ata andituak ibuot ẹkemehede ndiwa, utọ ufak oro Elihu eketịn̄de aban̄a ke n̄kan̄ Job ekpekekeme ndidi uwa unam. Nte enemde, Abasi ke ukperedem ama ọdọhọ ndiọi ufan Job ita ete: “Ẹkewa edifọp uwa ẹban̄a idem mbufo; ndien owo mi Job edinam n̄kpeubọk ọnọ mbufo.” (Job 42:8) Sededi orụk ufak, akpan n̄kpọ oro Elihu okowụtde ekedi nte ke ẹkpefụk ndudue Job ndien enye ekpenyene mme ufọn ẹtode oro.

Oro edi se ikotịbede. Job etie ‘ke obu ye ntọn̄ atua n̄kpọfiọk.’ Ndien nso? “Jehovah osio Job ke itie mbuotekọn̄ afiak edi . . . Ndien Jehovah ọdiọn̄ Job ke ukperedem akan eke mbemiso . . . Ndien ke n̄kpọ emi ebede, Job odu uwem isua ikie ye aba, onyụn̄ okụt nditọ esie ye nditọ nditọ esie ke ọyọhọ emana inan̄.” Nte ẹnyịmede, ufak oro ikosioho Job ifep ke idiọkn̄kpọ, ntre nte ini akade enye ama akpa. Edi, uwem esie ndibịghi owụt ete, ke akpan, ‘obụkidem esie ama akabade nsek akan eke eyenọwọn̄, ndien enye ama afiak ke mme usen uyen esie.’—Job 33:25; 42:6, 10-17.

Mme edidiọn̄ oro okotode edida ufak oro enyenede-nyene adan̄a nsịn ke edinam ke ufọn Job anam n̄kpọ nte edibemiso n̄wụt uwak edidiọn̄ oro ẹdidide ẹbịne ubonowo oro onịmde ke akpanikọ ke obufa ererimbot. Adan̄aoro, ọyọhọ ọyọhọ ufọn uwa ufak Jesus eyedu, osiode akama-nsobo utịp otode idiọkn̄kpọ ye unana mfọnmma efep ke nsinsi. Nso ntak ke nnyịn idinyene ntem ‘ndisio n̄kpo idara’ nte Elihu eketịn̄de!—Job 33:26.