Ẹkpeme Idem Mbak Mbon Nsọn̄ibuot!
Mme Akpan N̄kpọ Ẹtode N̄wed Jude
ANA mme asan̄autom Jehovah “ẹsua se idiọkde” enyụn̄ “ẹyịre se ifọnde.” (Rome 12:9) Jude andiwet Bible ama an̄wam mbon en̄wen ndinam emi ke n̄wed esie emi [enye] okodude ke Philistine ọnọ iso-ọfọn ke n̄kpọ nte 65 C.E.
Jude okokot idemesie “owo Jesus Christ, ye eyeneka James.” James emi nte an̄wan̄ade ekedi eyeneka Jesus Christ oro ẹdiọn̄ọde mfọn mfọn. (Mark 6:3; Utom 15:13-21; Galatia 1:19) Ke ntre Jude ke idemesie ekedi eyeneka Jesus. Nte ededi, ekeme ndidi enye ekekere ke idotke ndisiak itie ebuana eke obụk emi, sia Christ adan̄aoro ekedide owo eke spirit emi ẹnọde ubọn̄ ke heaven. N̄wed Jude ekedi ata nnennen ke ndinọ item oro ẹkemede ndin̄wam nnyịn ‘iyịre se ifọnde’ inyụn̄ ikpeme idem mbak mbon nsọn̄ibuot.
“Ẹsọn̄ọ Ẹn̄wana”
Okposụkedi Jude ekekerede ndiwet mban̄a edinyan̄a oro enyenede mme Christian, enye ama okụt nte enende ndikpak mme andikot n̄wed esie “ẹsọn̄ọ ẹn̄wana kaban̄a ikọ mbuọtidem.” (Ufan̄ikọ 1-4) Ntak-a? Koro mbon unana uten̄e Abasi ẹma ẹdọn̄ ikpat ndịbe ndịbe ẹdụk ke esịt esop ndien ke ‘ẹkenyụn̄ ẹwọn̄ọde mfọn Abasi ẹsịn ke obukpo uwem.’ Mmọ ke ukwan̄ usụn̄ ẹkekere ke imekeme ndibiat ibet Abasi edi isụk idu ke otu ikọt esie. Ẹyak ikûdedei inyene utọ idiọk ekikere oro edi ibịne edinen ido kpukpru ini, iwụtde esịtekọm nte ke ebede ke iyịp Jesus, Abasi ke mbọm ama eyet mme idiọkn̄kpọ nnyịn efep.—1 Corinth 6:9-11; 1 John 1:7.
Ntọt Oro Ẹnịmde Nnyịn ke Iso
Oyom ete in̄wana ibiọn̄ọ ndusụk ido, edu, ye mme owo. (Ufan̄ikọ 5-16) Ke ntak oro ndusụk nditọ Israel oro ẹkefakde ẹsio ke Egypt ẹkenanade mbuọtidem, ẹma ẹsobo mmọ. Mme angel oro ẹkekpọn̄de nnennen itie mmọ ẹdi se ‘ẹkekọbide ke nsinsi ebuka ẹnịm ke ekịm [eke spirit], ẹte, ẹtie ẹbet ikpe Akwa Usen oro.’ Ọkpọsọn̄ oburọbụt ido ama ada “ufen nsinsi ikan̄” ọsọk mbon Sodom ye Gomorrah. Ntre, ẹyak nnyịn inem Abasi esịt kpukpru ini ikûnyụn̄ idedei ikpọn̄ “usụn̄ uwem.”—Psalm 16:11.
Ke mîbietke Michael, akwa angel, emi mîkakam ibiomke Devil ikpe ye ikọ isụn̄i, mbon unana uten̄e Abasi ẹma ẹsụn̄i “mme ẹnyene ubọn̄,” (NW) emi nte an̄wan̄ade ẹdide mbon oro ẹnyenede ndusụk ubọn̄ emi Abasi ye Christ ẹnọde mmọ nte mbiowo oro ẹyetde aran. Eyak nnyịn ikûdedei iwụt unana ukpono ke odudu oro Abasi ọnọde!
Mbon unana uten̄e Abasi ẹketiene ndiọi uwụtn̄kpọ Cain, Balaam, ye Korah. Mmọ ẹma ẹkama ndịk eke spirit oro ẹmende ẹdomo ye itiat ẹmi ẹdịbede ke isọn̄ mmọn̄ ẹnyụn̄ ẹtie nte idiọk enyọn̄ eke mîsion̄ọke edịm ye n̄kpa, eto ẹmi ẹwụberede ẹduọn̄ọ oro mîsion̄oke mfri. Mbon nsọn̄ibuot oro n̄ko ẹkedi mbon nsụkuyo, mbon n̄kụni, ẹnyụn̄ “ẹkpep mme owo, ẹyom mfọn ẹnọ idem.”
Ẹkaiso Ndin̄wana Mbiọn̄ọ
Ekem Jude ọnọ item ke ndin̄wana mbiọn̄ọ ndiọi odudu. (Ufan̄ikọ 17-25) Mbon nsahi ẹyedu ke “ukperedem ini,” ndien ana mme ata Christian ẹyọ mmọ ye ikọ isụn̄i mmọ mfịn. Man in̄wana ibiọn̄ọ utọ ndiọi odudu oro, nnyịn inyene ndibọp idem ke enyọn̄ “edisana mbuọtidem” nnyịn, ibọn̄ akam ye edisana spirit, inyụn̄ inyene ima Abasi, ke adan̄aemi itiede ibet mbọm Jesus ndiyarade.
Nte an̄wan̄ade ke utom mme nsunsu anditeme, mbon unana uten̄e Abasi ẹnam ndusụk owo ẹnyene eyịghe. (Men 2 Peter 2:1-3 domo.) Ndien nso ke mme ẹnyene eyịghe ẹyom? Kamse, un̄wam ke n̄kan̄ eke spirit man ẹdabade mmọ ẹsio ke “ikan̄,” kpa nsinsi nsobo! (Matthew 18:8, 9) Edi iyomke mbon uten̄e Abasi ẹkop ndịk ẹban̄a se iditịbede, koro Jehovah eyekpeme mmọ man ‘ẹdiduọ ẹdụk’ idiọkn̄kpọ ye nsobo oro anade ebet mbon nsọn̄ibuot.
[Ekebe/Ndise ke page 31]
Mme Ndedịbe Itiat: Jude ama odụri ekemmọ mme Christian utọn̄ aban̄a ‘itiat ẹmi ẹdịbede ke isọn̄ mmọn̄ ke usọrọ ima mmọ.’ (Jude 12) Ke ndinyene mbubịk mbubịk ima nnọ mme andinịm ke akpanikọ, utọ mbon nsọn̄ibuot oro ẹketie nte edet edet itiat ke isọn̄ mmọn̄ ẹmi ẹkemede ndibom nsụn̄ikan̄ m̀mê ndiwai nnyụn̄ n̄wot mme ọwọk ewọk. Ekeme ndidi usọrọ ima ẹkedi usọrọ oro mme Christian oro ẹdide imọ ẹkekotde ekemmọ mme andinịm ke akpanikọ oro ẹdide ubuene. Ewetn̄wed Ido Ukpono oro, Chrysostom, (347?-407 C.E.) ọkọdọhọ ete: “Kpukpru mmọ ẹma ẹsisop idem ke usọrọ ofụri owo: mbon imọ ẹdade n̄kpọ ẹdi, ẹnyụn̄ ẹkotde mme ubuene ye mbon oro mînyeneke n̄kpọ, kpukpru mmọ ẹdia udia ọtọkiet.” Se ededi oro ekedide uduot usọrọ ima eke eset oro, ntọt Jude ama an̄wam mbon akpanikọ ndikpeme idem ye “ndịbe ndịbe itiat” mbon nsọn̄ibuot ẹmi ẹkemede ndida n̄kpa eke spirit ndi. Okposụkedi owo mîkowụkke mme Christian ndinịm mme usọrọ ima, owo mînyụn̄ inịmke mmọ mfịn, ikọt Jehovah ẹsin̄wam kiet eken ke n̄kpọ eke obụkidem ke ini ẹdude ke unana ẹsinyụn̄ ẹnyene inem inem ebuana otu.