Ẹmedio Ke Mbono District “Mme Ama Ubọhọ-Ufụn”!
UBỌHỌ-UFỤN! Nso inem inem uyo ke ikọ oro enyene ntem! Idụhe owo oro adarade ndidu ke ufụn m̀mê ntan̄mfep. Mme isua ndondo ẹmi ẹma ẹkụt edinam efen efen kaban̄a ubọhọ-ufụn ukaraidem oro ẹkedoride enyịn ẹban̄a ẹkan mmọ en̄wen ekededi oro odude ke ibuot-uti-n̄kpọ.
Nte ededi, ye adan̄a udọn̄ oro ẹnyenede ẹban̄a ubọhọ-ufụn ukaraidem, odu ubọhọ-ufụn oro otịmde edi akpan n̄kpọ ẹnyụn̄ ẹnyenede udọn̄ ẹban̄a ẹkan. Enye edi ubọhọ-ufụn oro Jesus Christ, kpa Eyen Abasi, eketịn̄de aban̄a ke ini enye ọkọdọhọde mme mbet esie ete: “Edieke mbufo ẹsọn̄ọde ẹda ke mme ikọ Mi, mbufo ẹdi mbet Mi ke akpanikọ: ndien mbufo ẹyefiọk akpanikọ, akpanikọ eyenyụn̄ anam mbufo ẹwọrọ ufụn.” (John 8:31, 32) Emi edi ubọhọ-ufụn mme edinịm ke akpanikọ eke nsunsu ido ukpono, ubọhọ-ufụn ndịk owo, ubọhọ-ufụn mbumehe idiọkn̄kpọ, ye ediwak eken.
Ubọhọ-ufụn emi edi ibuotikọ Mbono District “Mme Ama Ubọhọ-ufụn” Mme Ntiense Jehovah oro ẹdinịmde ke ofụri ererimbot ọtọn̄ọde ke ndaeyo eke 1991. Toto ke isua 1919, emi edimen oro ukara ekemende mme ukpan oro okodoride mme adaiso ke otu mmọ ẹfep okonịmde idiọn̄ọ, ikọt Abasi ke ẹnyene n̄kọri ubọhọ-ufụn kaban̄a edisana utuakibuot mmọ.
Otịm odot nte ke ẹma ẹsọn̄ọ ẹtịn̄ ẹban̄a ibuotikọ ubọhọ-ufụn ke mme mbono ukara Abasi ke ediwak isua ẹmi ẹkebede, ke mme utọ ibuotikọ nte “Mbono Ukara Abasi ‘Idụt Ifụre’” ye “Mme Mbono District ‘Ubọhọ-ufụn Nditọ Abasi.’” Ẹneme ubọhọ-ufụn n̄ko ntatara ntatara ke mme utọ n̄wed nte The Truth Shall Make You Free ye Uwem Nsinsi—ke Uböhö Nditö Abasi.
Ubọhọ-ufụn oro Abasi ọnọde emi mme asan̄autom Jehovah ẹnyenede idịghe n̄kukụre kaban̄a mfọnọn̄kpọ ye idara mmọ ikpọn̄îkpọn̄. Nte nnyịn ikotde ke Galatia 5:13 ite: “Nditọete, ẹkekot mbufo ẹte edidi nditọisọn̄ [“ẹdinyene ubọhọ-ufụn,” NW]; edi ẹkûda itie eyenisọn̄ mbufo ẹyom ufan̄ ẹnọ obụkidem, ẹdi ẹsan̄a utom ẹnọ kiet eken ke ima.” Mbono District “Mme Ama Ubọhọ-ufụn” eyen̄wam nnyịn ndiwụt esịtekọm nnọ uduak ubọhọ-ufụn nnyịn, eyen̄wam nnyịn ndimụm ọsọn̄urua ubọhọ-ufụn nnyịn n̄kama, onyụn̄ owụt nnyịn nte ikemede ndida enye nnam n̄kpọ ke mfọnn̄kan usụn̄.
Mbono emi editọn̄ọ ke n̄kanika 10:20 ke usenubọk Friday ye ndutịm ikwọukwak oro edinamde nnyịn idu ke nnennen idaha ekikere iban̄a udia eke spirit oro editienede. Ibuotikọ akpa usen edi “Ndidiọn̄ọ Akpanikọ Oro Anamde Nnyịn Iwọrọ Ufụn,” ọkọn̄ọde ke John 8:32. Usenubọk eyekama ikọ ekọm etieibuot okpokoro ye ibuotikọ mbono, “Uduak ye Nte Ẹdade Ubọhọ-ufụn Emi Abasi Ọnọde Ẹnam N̄kpọ.” Utịn̄ikọ emi eyewụt ukpụhọde odude ke ọyọhọ ọyọhọ ubọhọ-ufụn Jehovah ye uke uke ubọhọ-ufụn oro Abasi ọnọde nnyịn. Enye n̄ko eyesịn udọn̄ ọnọ nnyịn ndida ubọhọ-ufụn oro nnyịn inyenede nnam n̄kpọ ke mfọnn̄kan usụn̄ nte ikekeme. Ndutịm uwemeyo eyeneme aban̄a nsio nsio ikpehe ubọhọ-ufụn nnyịn ye utom ukwọrọikọ nnyịn ndien eyesịm utịt ye drama, Ẹsio ke Ufụn Man Ẹmenede Utuakibuot Akpanikọ ke Enyọn̄.
Ibuotikọ ọyọhọ usen iba edi “Ndisọn̄ọ Nda ke Ubọhọ-ufụn Oro Abasi Ọnọde,” ọkọn̄ọde ke Galatia 5:1. Ndutịm usenubọk eyekama nneme owụtde nte owo kiet kiet ke ubon ekemede ndidara ubọhọ-ufụn oro Abasi ọnọde ke ekpụk ubon. Mbon oro ẹben̄ede idem ndina baptism akpan akapn ẹyewụt esịtekọm ke utịn̄ikọ aban̄ade nte ẹkemede ndinyene ubọhọ-ufụn ebe ke uyakidem ye baptism. Esịnede ke ndutịm uwemeyo edidi inem inem nneme oro m̀mê ndọ edi ukpọhọde inemesịt m̀mê idịghe. Nneme eyedu n̄ko ke nsio nsio ikpehe ubọhọ-ufụn ndien ekem akpatre utịn̄ikọ oro owụkde ntịn̄enyịn ke Akwa Asan̄autom Abasi ndinọ ubọhọ-ufụn ye nsinsi uwem.
Sunday enyene ibuotikọ oro “Ndida Ubọhọ-ufụn Nnyịn Nnam N̄kpọ ke N̄kemuyo ye Spirit Abasi,” ọkọn̄ọde ke 2 Corinth 3:17. Ndutịm emi eyewụt nneme oro edemerede udọn̄ akan ke n̄ke Jesus oro ẹwetde ke Matthew 13:47-50, owụtde nte Mme Ntiense Jehovah ẹnamde utom nte mme ọkọ owo. Utịn̄ikọ an̄wa ke uwemeyo oro edi “Nditoro Obufa Ererimbot Ubọhọ-Ufụn Abasi!” Obufa ikpehe ke mbono district eyetiene: kpa ibio ibio ukpepn̄kpọ Enyọn̄-Ukpeme urua oro. Ndien ndutịm eyetre ye item N̄wed Abasi oro ẹnọde kpukpru nnyịn ndikaiso nnam n̄kọri ke ndida ubọhọ-ufụn oro Abasi ọnọde nnyịn nnam n̄kpọ ke eti usụn̄ ke edu nnyịn ye ke unọ ikọ ntiense nnyịn.
Ye kpukpru mme ama ubọhọ-ufụn, nnyịn ida ikọ David, andiwet psalm idọhọ ite: “Ẹtabi, ẹnyụn̄ ẹse nte Jehovah ọfọnde.” (Psalm 34:8) Sịn ofụri ukeme fo man odu ke mbono emi. Nam edi mbubehe fo ndidu ọtọn̄ọde ke akpa ikpehe ke usenubọk Friday tutu ke akpatre utịn̄ikọ ke uwemeyo Sunday. Edieke afo edide ye ọkpọsọn̄ udọn̄ udia eke spirit, enyenede ọyọhọ udọn̄ ke n̄kpọ eke spirit fo, afo eyekop inemesịt ke akpanikọ! (Matthew 5:3) Ndien ẹyak nnyịn ikûdedei ise edumbet emi ke usụhọde, “Owo eke ọtọde ke ntarubọk, uwak uwak ke enye eyenyụn̄ ọdọk.” Emi n̄ko abuana adan̄a nte nnyịn ibemde iso itịm idem ke ofụri esịt ndidụk, adan̄a nte nnyịn itịmde ikpan̄ utọn̄ ke ndutịm nte ẹnọde enye, ye nte nnyịn inamde ifetutom unyịmesịt ekededi oro ebederede idara idara ke ebuana ye Mbono District “Mme Ama Ubọhọ-Ufụn” nnyịn.—2 Corinth 9:6.