Nịm Abasi Akpa ke Uwem Ubon Fo!

BOB YE JEAN—n̄wan ye ebe oro ẹkesiakde ke ibuotikọ oro ekebemde iso—ikosion̄oke ndọ. Utu ke oro, mmọ ẹma ẹneme mme mfịna mmọ ye asan̄autom Christian. Ibịghike enye ama edifiọk ete ke mfịna mmọ ẹkenen̄ede osụn̄ọ oto mme ukpụhọde idaha mmọ.

Ke uwụtn̄kpọ, sia Bob okotode ubon mme anamutom ubọk ye utom odudu onyụn̄ esinamde utom odudu ke idemesie, enye ekesiyom ndodobi udia kpukpru usenubọk. Jean, emi okotode ubon mme anamutom mbakara, ekesinọ enye coffee ye uyo kpọt. Ntre ke ekedi nte ke utọk kaban̄a udia usenubọk ama ọkọri akabade ata akamba en̄wan!

Ama oyom Bob ye Jean ẹnam usụn̄ uneme nneme mmọ ẹfọn ẹkan. Nte ededi, ata ntak mfụhọ mmọ ama otịm otụn̄ọ. Asan̄autom oro okobụp ete, “Nte mbufo ẹsise kiet eken ke un̄wana 1 N̄wed Corinth 13:4?” Udọn̄ikọ Bible oro okot ete: “Ima enyenyene anyanime, onyụn̄ ọfọn ido; ima ifụbeke ufụp; ima inamke inua, ikohokede idem.” Udiana ufan̄ikọ 1Co 13:5 ọdọhọ nte ke ima “inamke ido eke mîdotke, iyomke ufọn esiemmọ, isọpke iyatesịt, ikamake udu.” Jean ye Bob ẹma ẹnyịme ndida ikọ ẹmi nsịn ke edinam ke itie ebuana mmọ.

Mme mfịna n̄wan ye ebe ẹmi okoyom usọbọ eke n̄kan̄ spirit akpan akpan. Sia Bob ye Jean ẹkeyomde ndimụm eti itie ebuana ye Abasi n̄kama, ke akande kpukpru n̄kpọ, mmọ ẹkenyene ndida mme edumbet Bible nsịn ke edinam nnyụn̄ ndiọn̄ọ nte “ke mîbọhọke Jehovah ọbọp ufọk, mmọ eke ẹbọpde ẹkpa utom ikpîkpu ke esịt.” (Psalm 127:1) Ps 127 Ufan̄ikọ 3 osịm 5 ẹnyene ebuana ye edibọp ubon. Ndien n̄kpon n̄kan edikụt unen ke edimenede inemesịt ubon oto edinịm Abasi akpa ke uwem ufọk.—Ephesus 3:14, 15.

Se Edinịm Abasi Akpa Abuanade

Edinịm Abasi akpa ke uwem ubon fo aka anyan akan ikọ oro, “Ubon oro esibọn̄de akam ọtọkiet esitie ọtọkiet.” Nte ekemde ye n̄wedmbụk oro, Family Relations, ekese owo ẹnịm ke akpanikọ ẹte ke “ido ukpono anam edi mmemmem ndinyene eti ye ọsọn̄idem ebuana ke ubon onyụn̄ anam uwem inemesịt eke mme andibuana ke enye ẹkọri.” Edi ndikam nnyene ido ukpono idịghe ukem ye edinịm Abasi akpa. Ekese owo ẹsisọn̄ọ ẹyịre an̄wan̄wa ye ido ukpono n̄kukụre ke ntak edu, ido edinam ubon, m̀mê ufọn eke n̄kaowo. Abasi enyene ekpri odudu ke uwem eke usen-ke-usen mmọ. Edide akpan n̄kpọ akan, idịghe kpukpru ido ukpono ẹnyene “ido Abasi eke asanade, mînyụn̄ ideheke ke iso Abasi Ete nnyịn.”—James 1:27.

Man inịm Abasi akpa ke uwem ubon nnyịn, ana nnyịn ye mbonima nnyịn ituak ibuot inọ Jehovah, kpa “Ata Edikon̄ ke ofụri ererimbot,” nte ekemde ye mme n̄kpọ oro enye oyomde. (Psalm 83:18) Eyen Abasi, Jesus Christ, ọkọdọhọ ete: “Ini ke edi, omonyụn̄ ededi ama, eke ata mme andituak ibuot edituakde ibuot ẹnọ Ete ke spirit ye ke akpanikọ: koro ẹdi mmọ eke ẹtiede ntem ke Ete oyom ete ẹtuak ibuot ẹnọ Imọ. Abasi edi Spirit: ndien mme andituak ibuot nnọ Enye ẹnyene ndituak ibuot ke spirit ye ke akpanikọ.” (John 4:23, 24) Man ituak ibuot inọ Jehovah Abasi “ke spirit,” ana edisana utom oro inamde inọ enye oto esịt oro ọyọhọde ye ima ye mbuọtidem. (Mark 12:28-31; Galatia 2:16) Ndituak ibuot nnọ Jehovah ke “akpanikọ” oyom ete nnyịn isịn mme nsu ido ukpono inyụn̄ inam uduak esie ọyọhọ ọyọhọ nte ẹyararede ẹwụt ke Bible. Nnyịn ikemeke ndinịm Jehovah Abasi akpa ibọhọke ido ukpono nnyịn ada ekekem ye mme edumbet esie.a Nso idi ndusụk ke otu mmọemi? Ndien didie ke edida mmọ nsịn ke edinam ekeme ndida ufọn nsọk ubon fo.

Ndinịm Abasi Akpa Nte Ebendọ

Ke 1 N̄wed Corinth 11:3, Bible ọdọhọ ete: “Christ edi Ibuot ọnọ kpukpru irenowo; erenowo onyụn̄ edi ibuot ọnọ n̄wan; Abasi onyụn̄ edi Ibuot ọnọ Christ.” Edieke afo edide ebendọ, afo emenyene mbiomo oro Abasi ọnọde ndidi akpan anam-ubiere ke ubon fo. Edi emi inọhọ ebendọ ekededi odudu ndisọn̄ ido m̀mê ndidi akara ukara ufịk.

Bible esịn udọn̄ ọnọ mme ebendọ ndikere mban̄a mme ntụk ibanndọ mmọ ke ini ẹnamde mme ubiere oro ẹtụkde mmọ. (Men Genesis 21:9-14 domo.) Ke akpanikọ, N̄wed Abasi akpak kpukpru nnyịn ete ‘ikûse n̄kpọ eke idem nnyịn ikpọn̄, edi n̄ko ikam ise n̄kpọ owo en̄wen.’ (Philippi 2:2-4) Ke ebiet oro edumbet Bible ndomokiet mîbuanake, ebendọ edide Christian eyewak ndinyịme mme ekikere n̄wan esie. Ke enyenede ọkpọ ọkpọ udọn̄ ke enye, enye eyekụt n̄ko ete ke mme mbiomo ifịgheke enye ikaha. Ke uwụtn̄kpọ, enye ekeme ndin̄wam enye ke mme utom ufọk, akpan akpan edieke enye anamde utom idịbi udia.

Apostle Paul ekewet ete: “Mme ebe ẹkpama iban mmọ nte idemmọ. Owo eke amade n̄wan esie ama idemesie: koro akananam baba owo kiet isuaha obụkidem esie, edi ọbọbọk enye, onyụn̄ otịm ekpeme enye, kpa nte Christ anamde ye ufọk Abasi.” (Ephesus 5:28, 29) Jesus Christ anam n̄kpọ ke ima ima usụn̄ ye mme andibuana ke esop.

Se idotde ẹtịm ẹfiọk n̄ko edi item apostle Peter emi: “Kpasụk ntre, mbufo mme ebe ẹdu uwem ye iban mbufo nte mme ẹnyene-ibuot owo; ẹnọ iban ukpono, nte mmọemi ẹmemde ẹkan mbufo, sia mmọ ẹnyụn̄ ẹtienede mbufo ẹbuana ke ufọn uwem; mbak n̄kpọ edibiọn̄ọ akam mbufo.” (1 Peter 3:7) Nte enye inamke owo ekere n̄kpọ ke ndidiọn̄ọ nte ke owo ndinam n̄kpọ ye n̄wan esie ke usụn̄ oro mîwụtke ima ekeme ndibiọn̄ọ mme akam ebe? Ih, ana erenowo anam n̄kpọ ke ima ima usụn̄ ye n̄wan esie edieke anade Abasi okop onyụn̄ ọbọrọ mme akam esie.

Ndinịm Abasi akpa abuana n̄ko itie ebuana oro ete abuanade ye nditọ esie. Enye ekpenyene ndinyene ntotụn̄ọ udọn̄ mban̄a mfọnọn̄kpọ eke spirit mmọ. Edi, ke akpan ndụn̄ọde ẹkenamde ke U.S., mbahade iba kpọt ke otu irenowo ẹkedọhọ nte ke “ndibuana ke edikpep m̀mê ke otu unyene nneme N̄wed Abasi” ekedi ‘ata akpan n̄kpọ ke n̄kọri eke spirit ubon mmọ.’ Mbon eken ẹketịn̄ ẹtụk mme utọ n̄kpọ nte “edise m̀mê edikpan̄ utọn̄ nnọ mme edinam usuanetop ido ukpono” m̀mê ‘editie n̄kere mban̄a se uwem ọwọrọde.’

Nte ededi, Bible ọdọhọ mme ete ete: “Ẹkûfiomo nditọ mbufo; ẹdi ẹkama mmọ ke ntụnọ ye item Ọbọn̄.” (Ephesus 6:4) Ke otu Mme Ntiense Jehovah, ẹdot enyịn ndikụt mme ete ẹdade usụn̄ ke utuakibuot eke ubon. Ke ndinịm mme ukpepn̄kpọ Bible eke ubon kpukpru ini, ndidụk mme mbonoesop Christian, nnyụn̄ nnam mme n̄kpọ eken oro N̄wed Abasi oyomde, utọ irenowo oro ẹnịm Abasi akpa ke uwem ubon.

Ndinịm Abasi Akpa Nte N̄wanndọ

Edieke afo edide n̄wanndọ, afo emekeme ndinịm Abasi akpa ke ndin̄wam ebe fo ke utom esie nte ibuotufọk. Bible ọdọhọ ete: “Iban, ẹsụk idem ẹnọ mme ebe mbufo, nte odotde ke Ọbọn̄.” (Colossae 3:18) Emi ekeme ndinen̄ede ndi ọkpọsọn̄ n̄kpọ edieke ebe mîsinemeke nneme m̀mê mîsịnke akpan ukeme ndida usụn̄ ke utuakibuot ubon. Ke idaha ekededi, ndidụri ntịn̄enyịn n̄wụt mme ndudue esie kpukpru ini m̀mê, ke akam ọdiọkde akan, ndimiom enye edikam ananam mfụhọ ubon ọkọri.

Mme N̄ke 14:1 ọdọhọ ete: “Enyene-ibuot an̄wan ọbọp ufọk esiemmọ: edi ndisịme owụri ufọk ke ubọk esie.” Usụn̄ kiet emi enyene-ibuot an̄wanndọ ekemede ndinịm Abasi akpa nnyụn̄ ‘mbọp ufọk esiemmọ’ edi ke ndisụk ibuot nnọ ebe esie. (1 Corinth 11:3) Ye ‘ewụhọ ima odorode enye ke edeme,’ enye efep ndikụt ndudue nnọ ebe esie ke usụn̄ oro mîdotke. (Mme N̄ke 31:26) Enye n̄ko anam utom ọkpọsọn̄ man anam mme ubiere esie ẹkụt unen.

Usụn̄ en̄wen oro n̄wanndọ onịmde Abasi akpa edi ke ndidi enyene-ifịk an̄wanndọ. Ke akpanikọ, edieke anade enye anam utom idịbi udia, ekeme ndidi enye idinyeneke ini m̀mê odudu oro ẹyomde man akama ufọk esie nte enye oyomde. Enye ekeme ndisụk ndomo nditie nte “enyene-ido an̄wan” emi Bible ọdọhọde ete: “Enye otịm ese ido ufọk esiemmọ, inyụn̄ idiaha udia ifu.”—Mme N̄ke 31:10, 27.

Akande kpukpru, n̄wanndọ enyene ndinịm utuakibuot Abasi akpa ke uwem esie. Ekese mbon oro ẹsikade Ufọkmbono Obio Ubọn̄ eke Mme Ntiense Jehovah ke akpa ini ẹsitoro eti usịnen̄kpọ nditọn̄wọn̄. Utom an̄wanndọ ke afan̄ emi edi ata ọsọn̄urua n̄kpọ. Edi ana enye n̄ko anam n̄kpọ ndimụm eti idaha eke spirit esie n̄kama ebe ke akam, ukpepn̄kpọ, ye utom oro anamde ọnọ Abasi.

Ndinịm Abasi Akpa Nte Mme Uyen

Ibuotikọ kiet ke Adolescent Counselor ọdọhọ ete: “Etie nte nditọn̄wọn̄ ẹmekọri mme edu ye ekikere akwaifiọk oro anamde mmọ ẹkara mme ete ye eka mmọ. . . . Ke ẹsiode ẹnyan ẹnọ n̄kaowo oro esịnde udọn̄ ọnọ onyụn̄ otorode unọ idem inemesịt eke idahaemi ye inyene obụkidem, mme uyen ẹmekọri edu ‘Ami nnyom enye idahaemi.’” Edieke afo edide uyen, nte oro edi edu fo?

Colossae 3:20 ọdọhọ ete: “Nditọ, ẹsụk ibuot ẹnọ mme ete mbufo ye mme eka mbufo ke kpukpru n̄kpọ, koro emi enemde Ọbọn̄ esịt.” Akparawa owo oro esede utọ nsụkibuot oro nte n̄kpọ oro Abasi oyomde eyediana kiet ye ete ye eka esie. Ke uwụtn̄kpọ, enye idisọn̄ke ibuot ye mmọ ke ndịbe ke ndidụk nsan̄a ye nditọ ufọkn̄wed oro mmọ mînyịmeke; m̀mê enye ke n̄kari ndidomo ndikama ete m̀mê eka man enyene usụn̄ esie. (Mme N̄ke 3:32) Utu ke oro, akparawa owo ekededi eke onịmde Abasi akpa ke uwem eyesụk ibuot ọnọ ima ima ndausụn̄ eke ete ye eka.

Ẹnịm Abasi Akpa!

Inamke n̄kpọ m̀mê nso itie ke nnyịn inyene ke ekpụk ubon, nnyịn inyene ndinịm Abasi akpa ke uwem inyụn̄ ikọri n̄kpet n̄kpet itie ebuana ye enye. Nte afo ye ubon fo ke ẹnam oro?

Ke mme “ukperedem ini” ẹmi, kpukpru nnyịn isak iso ise “ndiọkeyo.” (2 Timothy 3:1-5) Edi, ẹkeme ndinam n̄kọri ke n̄kan̄ eke spirit nnyụn̄ mbọhọ utịt editịm n̄kpọ emi. (Matthew 24:3-14) Ke ndinam n̄kpọ ke n̄kemuyo ye nnennen ifiọk Bible, afo ye ubon fo ẹmekeme ndinyene idotenyịn nsinsi uwem ke paradise isọn̄. (Luke 23:43; John 17:3; Ediyarade 21:3, 4) Ih, oro ekeme ndidi ntre edieke afo onịmde Abasi akpa ke uwem ubon fo.

[Mme Ikọ idakisọn̄]

[Ndise ke page 5]

Enyene-ido an̄wan edi enyeoro ẹnen̄erede ẹma

[Ndise ke page 7]

Bible esịn udọn̄ ọnọ mme ebendọ ndida iso ke utuakibuot ubon