Uwem ye Utom Jesus

Ke Ubọk Nnasia Abasi

EDIN̄WAN̄A edisana spirit nduọk ke Pentecost edi uyarade nte ke Jesus omosịm heaven. N̄kukụt oro ẹnọde owo mbet oro, Stephen, ibio ini ke oro ebede ọnọ uyarade n̄ko nte ke Enye omosịm do. Mbemiso ẹkam ẹtọn̄ọde enye ke itiat ẹwot ke ntak edinọ ikọ ntiense esie ye mbuọtidem, Stephen ofiori ete: “Sese, mmokụt heaven nte anade in̄wan̄, mmonyụn̄ n̄kụt Eyen Owo nte adade ke ubọk nnasia Abasi.”

Ke adan̄aemi odude ke ubọk nnasia Abasi, Jesus etie ebet uyo otode Ete esie: “Da ubọn̄ ke otu mme asua fo.” Edi idahaemi kan̄a, tutu enye anam n̄kpọ aban̄a mme asua esie, nso ke Jesus anam? Enye akara, m̀mê ada ubọn̄, ke otu mme mbet esie oro ẹyetde aran, ọnọde mmọ ndausụn̄ ke utom ukwọrọikọ mmọ onyụn̄ otịmde mmọ idem ndikabade ndi nsan̄a ndidem ye enye ke Obio Ubọn̄ Ete esie, ke ẹsetde ke n̄kpa.

Ke uwụtn̄kpọ, Jesus emek Saul (ke ukperedem ẹtịmde ẹdiọn̄ọ ke enyịn̄ mbon Rome esie, Paul) ndida iso ke utom unam mbet ke mme idụt eken. Saul enyene ifiopesịt ọnọ Ibet Abasi, edi mme adaiso ido ukpono mme Jew ẹtụn enye usụn̄. Nte utịp, idịghe n̄kukụre Saul ndinyịme ẹwot Stephen edi enye aka Damascus ke ọbọde odudu oto akwa oku oro, Caiaphas, ndimụm iren ye iban ekededi emi enye okụtde do, ẹmi ẹdide mme anditiene Jesus nda mfiak ndi Jerusalem. Nte ededi, ke adan̄aemi Saul akade ke usụn̄, nnyayama un̄wana inikiet inikiet ayama akanade enye okụk ndien enye ọduọ ke isọn̄.

Uyo otode ebiet oro enyịn mîkwe obụp ete, “Saul, Saul, nsinam afo ọkọbọde Mi?” Saul obụp ete “Afo edi anie, Ọbọn̄?”

Ibọrọ edi, “Ndi Jesus emi afo ọkọbọde.”

Jesus ọdọhọ Saul, emi utịbe utịbe un̄wana okịmde enyịn mi, ete odụk Damascus onyụn̄ etie do ebet mme ntọt. Ekem Jesus ọbiọn̄ọde Ananias, kiet ke otu mbet esie ke n̄kukụt. Kaban̄a Saul, Jesus ọdọhọ Ananias ete: “Enye edi anamutom eke mmekde, nte akama enyịn̄ Mi aka ke iso mme Gentile ye mbọn̄, ye nditọ Israel.”

Ke akpanikọ, ye ibetedem Jesus, Saul (ẹdiọn̄ọde idahaemi nte Paul) ye mme ọkwọrọikọ eken ẹnyene unen akamba akamba ke utom ukwọrọikọ ye edinọ ukpep mmọ. Ke akpanikọ, n̄kpọ nte isua 25 ẹbede nte Jesus okowụt enye idem ke usụn̄ akade Damascus, Paul ewet ete ke ‘ẹkwọrọ eti mbụk emi ẹnọ kpukpru owo ke idak ikpaenyọn̄.’

Ke ediwak isua efen efen ẹbede, Jesus ọnọ apostle oro, John, emi enye amade udịm udịm n̄kukụt. Ebede ke mme n̄kukụt ẹmi John obụkde ke n̄wed Ediyarade eke Bible, enye, ke akpanikọ, odu uwem okụt edifiak ndi Jesus ke odudu Obio Ubọn̄. John ọdọhọ ete ke ẹkemen imọ “ke spirit” ẹka ke “usen Ọbọn̄.” Nso idi “usen” emi?

Edidụn̄ọde mme prọfesi Bible ye ntịn̄enyịn, esịnede prọfesi Jesus ke idemesie aban̄ade mme akpatre usen, ayarade nte ke “usen Obọn̄” ọkọtọn̄ọ ke onịm-mbụk isua 1914, ih, ke esịt emana emi! Ntre ke ekedi ke 1914 nte ke Jesus ama afiak edi ke usụn̄ oro enyịn mîkwe, ye unana an̄wan̄wa usọrọ n̄ko ye mme anam-akpanikọ asan̄autom esie ikpọn̄îkpọn̄ ẹdiọn̄ọde ẹban̄a edifiak ndi esie. Ke isua oro Jehovah ama ọnọ Jesus uyo ndida ubọn̄ ke otu mme asua esie!

Ke anamde ewụhọ Ete esie, Jesus ama anam heaven asana ọbọhọ Satan ye mme demon esie, osion̄ode mmọ ọduọn̄ọ ke isọn̄. Ke okụtde emi nte otịbede ke n̄kukụt, John okop uyo otode heaven nte ọdọhọde ete: “Kemi edinyan̄a ye edikara emedi, ye Ubọn̄ Abasi nnyịn ye odudu Christ Esie.” Ih, ke 1914 Christ ama ọtọn̄ọ ndikara nte Edidem!

Nso eti mbụk ke emi edi ntem ọnọ mme andituak ibuot nnọ Jehovah ke heaven! Ẹkpak mmọ ẹte: “Ẹdara, O mme heaven, ye mbufo ẹmi ẹdụn̄ọde ke esịt.” Edi idaha etie didie ye mbon oro ẹdude ke isọn̄? Uyo oro otode heaven mi akaiso ete, “Mbọm isọn̄ ye inyan̄, koro andidori ikọt Abasi ikọ ama osụhọde etiene mbufo; enye asan̄a ye akwa ifụtesịt, sia enye ọdiọn̄ọde ete ini imọ edi ibio.”

Nnyịn idu ke ibio ini oro idem idahaemi. Ke ẹbahade mme owo idahaemi ndidụk obufa ererimbot Abasi m̀mê ndibọ nsobo. Akpanikọ edi-o, ẹbiere se iditịbede inọ fi kemi ke nte afo anamde n̄kpọ aban̄a eti mbụk Obio Ubọn̄ Abasi oro ẹkwọrọde ke ofụri ererimbot ke idak ndausụn̄ Christ.

Ke ini ẹkụrede edibahade mme owo, Jesus Christ eyenam n̄kpọ nte Isụn̄utom Abasi ndisio ofụri editịm n̄kpọ Satan mfep ke isọn̄ ye kpukpru mbon oro ẹnọde enye un̄wam. Jesus eyekụre edisio kpukpru ukwan̄ido ẹmi mfep ke ekọn̄ oro ẹkotde ke Bible Har–Magedon, m̀mê Armageddon. Ke oro ebede, Jesus, akakan Owo ke ekondo oro edide udiana ọnọ Jehovah Abasi ke idemesie, eyemụm Satan ye mme demon esie onyụn̄ ọkọbi mmọ ke tọsịn isua ke “editụn̄ọ ukpe,” oro edi, idaha unana edinam ebietde n̄kpa. Utom 7:55-60; 8:1-3; 9:1-19; 16:6-10; Psalm 110:1, 2; Mme Hebrew 10:12, 13; 1 Peter 3:22; Luke 22:28-30; Colossae 1:13, 23; Ediyarade 1:1, 10; 12:7-12; 16:14-16; 20:1-3; Matthew 24:14; 25:31-33.

◆ Ke Jesus ọdọkde ke heaven, m̀mọ̀n̄ ke enye odu, ndien nso ke enye etie ebet?

◆ Mmanie ke Jesus akara ke enye ọdọkde ke heaven, ndien didie ke ukara esie ayarade?

◆ Ini ewe ke “usen Ọbọn̄” ọkọtọn̄ọ, ndien nso ikotịbe ke ntọn̄ọ esie?

◆ Ewe utom edibahade emi akade iso mfịn otụk kpukpru nnyịn owo kiet kiet, ndien edibahade emi ọkọn̄ọ ke nso?

◆ Ke ẹkụrede utom edibahade emi, mme n̄kpọntịbe ewe ẹditiene?