Nte Abasi Esibọrọ Akam Fo?
“A KANANAM itiehe mi ke idem nte ẹsibọrọ akam mi,” ntre ke n̄wan kiet oro odụn̄de ke Hokkaido, Japan, ọkọdọhọ. Idịghe enye ikpọn̄ odu ke utọ idaha emi. Ediwak owo ẹkere ẹte ke akananam owo ibọrọke akam mmimọ. Ke akpanikọ, afo emekeme ndiyịk m̀mê Abasi esibọrọ akam fo.
Ediwak miliọn owo ẹsibọn̄ anana-ibat akam ẹnọ anana-ibat ndem. Ntak etiede nte ke owo isibọrọke ata ediwak akam-a? Man ifiọk, ẹyak nnyịn ibemiso idụn̄ọde mme orụk akam oro ẹsibọn̄de?
Ndusụk Owo Ẹsibọn̄ Akam Ẹban̄a Nso?
Ke ini Obufa Isua, mbahade iba ke itie ita, m̀mê n̄kpọ nte owo miliọn 80, ke otu mme andidụn̄ Japan ẹsibọn̄ akam ke itieuwa Shinto m̀mê ke mme temple mbon Buddha. Mmọ ẹsinọ okụk nte uwa ẹnyụn̄ ẹbọn̄ akam ẹben̄e mfọniso ye ifụre ubon.
Ke January ye February—mbemiso ẹkam ẹtiede udomo ube ndụk ikpọ ufọkn̄wed—nditọ ufọkn̄wed ẹyebụn̄ọ ẹka itieuwa utọ nte kiet emi odude ke Tokyo emi ọwọrọde etop ke ntak abasi ifiọkn̄wed esie. Mmọ ẹsiwet mme uduak mmọ ke mme obukpọk akam ẹnyụn̄ ẹkọn̄ mmọ ke eto ẹkan itieuwa oro ẹkụk. Ke nsụhọde n̄kaha, obukpọk emi 100,000 ẹma ẹbana n̄kann̄kụk ọwọrọetop itieuwa kiet ke Tokyo ke ini udomo eke 1990.
Ediwak akam ẹbuana nsọn̄idem. Ke itieuwa ke Kawasaki, Japan, mme owo ẹsibọn̄ akam ẹyom ukpeme mbak AIDS. “Ufọn edibọn̄ akam mbak AIDS,” nte oku itieuwa oro akanamde an̄wan̄a, “edi nte ke enye eyenam mme owo ẹnyene mbufiọk ke edu-uwem mmọ.” Edi ndi ukụre se idude ke akam edi oro?
Ke temple en̄wen, akanian̄wan kiet ama ọbọn̄ akam oyom “mbabuat n̄kpa.” Ntak-a? Koro enye okoyom ndibọhọ ndutụhọ udọn̄ọ anyanini ikonyụn̄ iyomke ndikabade ndi mbiomo nnọ ubon esie.
Ke inua-okot idụt Christian kiet, etubom n̄ka mbre bọl kiet ama ọbọn̄ akam eben̄e edikan ye ukpeme mbọhọ unan ọnọ n̄ka mbre esie. Mbon Catholic ke Poland ẹsibọn̄ akam ẹyom ọkpọkpọ mfọnọn̄kpọ mmọ ẹnyụn̄ ẹbana Edisana Mary mmọ ye n̄kpọmbana ke ini mmọ ẹnịmde ke akpanikọ ẹte ke ẹbọrọ akam mmimọ. Ediwak owo ẹsibụn̄ọ ẹka ufọkederi utọ nte ọwọrọetop Guadalupe ke Obio Mexico, ye Lourdes, France, ẹben̄ede utịbe utịbe ukọkudọn̄ọ.
Ke Edem Usiahautịn m̀mê Edem Usoputịn, mme owo ẹsibọn̄ akam ke ntak ediwak ye nsio nsio ọkpọkpọ ntak. Nte an̄wan̄ade, mmọ ẹyom ẹkop ẹnyụn̄ ẹbọrọ akam mmimọ. Nte ededi, nte owụt ifiọk ndidot enyịn nte ke ẹyekop kpukpru akam nte ọfọnde? Nso kaban̄a akam fo? Nte ẹsibọrọ mmọ? Ke akpanikọ, nte Abasi esibọrọ akam ndomokiet?