Mme Uwụtn̄kpọ—Ukpọhọde Ndisịm Esịt

DAVID ke ekefehe ke ntak uwem esie. Asua esie edi Saul, edidem Israel oro ẹyetde aran. Nte ededi, Saul edi owo oro ọyọhọde ye idiọkesịt aban̄a David, ufụp adiade enye idem. Ke isan̄ uwotowo esie, edidem kemi amada mbonekọn̄ 3,000 adian idem. Ke ẹtịmde ẹwak ẹkan, David ye irenowo esie ẹkedịbe ke ntotụn̄ọ abaitiat kiet ke wilderness.

Nte David ye irenowo esie ẹsopde ibuot ọtọkiet ke ekịm, n̄kpọntịbe oro akpade owo idem ada itie. Edidem Saul odụk ke esịt abaitiat emi ndifụk ukot esie. David ke ndopuyo aka ebịne asua esie oro mînyeneke un̄wam mi, ye n̄kpọekọn̄ ke ubọk. Edi ke n̄kpaidem ikọt David, enye iwotke edidem. Enye n̄kukụre osịbe utọn̄ ekụra Saul. Idem ke esịt ọduọde enye aban̄a emi, David ọdọhọ ete: “Nsa mi, ma Jehovah, ndinamke n̄kpọ emi ye ete mi emi Jehovah ekeyetde aran; ndinyanke ubọk mi ntụk enye: koro enye edide se Jehovah ekeyetde aran.”—1 Samuel 24:1-6.

Mbụk Bible emi ekpep akwa ukpepn̄kpọ aban̄a ediwụt ukpono nnọ odudu oro Abasi emekde. Enye n̄ko omosịm esịt, iso-ọfọn, idem ke usụn̄ okụtde unen akan nnennen item. Utọ oro edi odudu mbụk oro ẹwetde ke Ikọ Abasi ndinọ nnyịn item.—Rome 15:4.

Nte ekemde, Mme Ntiense Jehovah ẹdomo ndinam se ikponde ikan editịn̄ mme akpan n̄kpọ ke ini ẹkwọrọde eti mbụk, ẹnịmde ukpepn̄kpọ Bible, ẹnọde mme utịn̄ikọ N̄wed Abasi, m̀mê ikọ ntiense ido nneme. Mmọ ẹdomo ndisịm esịt ke ndibụk mme ifiọkutom nnyụn̄ n̄kama mme uwụtn̄kpọ. Ñwed-item Ufökñwed Utom Ukara-Abasi mmọ anam an̄wan̄a ete: “Mme uwụtn̄kpọ ẹdemede udọn̄ ẹnyụn̄ ẹsọn̄ọ ẹwụt mme akpan ekikere. Mmọ ẹdemede ekikere owo ẹnyụn̄ ẹnam edi mmemmem akan ndimụm mbufa ekikere. Mme uwụtn̄kpọ ẹtịmde ẹmek ẹdian ikike ke ekikere ndidemede kaban̄a n̄kpọ. . . . Ke ndusụk ini, ẹkeme ndida uwụtn̄kpọ ndikan udu m̀mê idiọkesịt.”a—Page 170.

Ke n̄wed esie oro Essentials of Public Speaking, Warren DuBois ewet ete: “Yak ewetn̄wed m̀mê etịn̄ikọ etịn̄ ekikere esie ke mme edinam m̀mê mme ikọ owo, ndien ata mbembe ibuotikọ eyenyene uwem ye uduot.” Ntem, ndidian uwem ye uduot ke etop oro ama ekenyenyene odudu onyụn̄ ọnọ uwem ekeme ndin̄wam mme Christian asan̄autom ndisịm esịt.

Mme Uwụtn̄kpọ Oro Ẹnọde Ukpep

Nso orụk uwụtn̄kpọ ọfọn akan? Nte ido edide, edi enyeoro ọkọn̄ọde ke n̄kpọ oro mme andikpan̄ utọn̄ ẹkemede ndibụk mmemmem mmemmem. Jesus Christ ama onịm eti uwụtn̄kpọ ke afan̄ emi. Ke Ukwọrọikọ esie ke Obot, Jesus ama etịn̄ aban̄a mme utọ ọsọ n̄kpọ nte inụn̄, utueneikan̄, ye inuen. (Matthew 5:1–7:29) Ke uwụtn̄kpọ, kpukpru owo ẹma ẹmehe ye utueneikan̄ oro ẹsisịnde aran olive emi ẹsinyụn̄ ẹdoride ndusụk ini ke uwụk utueneikan̄. Ke ntre, anaedi mme mbet Jesus ẹma ẹfiọk nte ke mmọ ẹkpenyene ndidi mme akama un̄wana eke spirit ke ini enye akasiande mmọ ete: “Owo inyụn̄ idomoke utueneikan̄ ida aban̄ ifụk, edi owụk ke uwụk utueneikan̄; ntem ke un̄wana ayama ọnọ kpukpru owo eke ẹdude ke ufọk. Kpa ntre yak un̄wana mbufo ayama ke iso owo, man mmọ ẹkụt nti utom mbufo, ẹnyụn̄ ẹtoro Ete mbufo emi odude ke heaven.” (Matthew 5:15, 16) Mme uwụtn̄kpọ oro mîtịmekede owo ẹmi ẹdotde ye nneme ẹyen̄wam Christian asan̄autom ndinam mme ekikere ye mme ukpepn̄kpọ Bible ẹn̄wan̄a.

Iso-ọfọn mme okopodudu uwụtn̄kpọ Jesus ẹkewụhọ ke mme owo. Kere ban̄a mbon oro ẹwetde ke Luke ibuot 15 ye 16. Mme scribe ye mme Pharisee ẹma ẹsụk Jesus uyo ke ndidara mme idiọkowo ye mme ọbọ a-tax. Ke ibọrọ, enye ama etịn̄ mme mbụk oro ẹtụkde owo esịt aban̄a mme owo. Enye ama etịn̄ aban̄a ekpemerọn̄ oro okokụtde erọn̄ esie emi okosopde, n̄wan emi okokụtde okụk esie emi okosopde, idiọk udọ emi akafiakde ọnyọn̄ ufọk, ye idiọk asan̄autom.

Mme uwụtn̄kpọ ẹdide akpanikọ ye mme mbụk ẹdide ata-idem-n̄kpọ ke uwem ẹkeme ndinyene ufọn etieti ẹnọ Christian asan̄autom. Ke uwụtn̄kpọ, tịmfiọk nte Alexander H. Macmillan, emi akanamde isan̄ ntatara ntatara nte etịn̄ikọ an̄wa ke isua 60, akanamde akpanikọ Bible aban̄ade mme akpan̄kpa an̄wan̄a. Esisịt ini mbemiso n̄kpa ete esie, emi okonịmde ke akpanikọ ete ke ukpọn̄ isikpaha, Macmillan ama enyene nneme emi ye enye:

“Ete mi ama obụp mi nnennen mbụme ete: ‘Eyen, nte ami ndidu ikpọn̄ ke udi ke adan̄aemi mbetde obio ubọn̄ nditọn̄ọ utom esie ndinam isọn̄ ọyọhọ ye mfọnmma owo?’

“Oro ekedi mbụme emi akparawa owo mîkpekemeke ndibọrọ ke usụn̄ oro oyụhọde owo oro ọsọn̄de emi akananam mîkereke n̄kpọ ke afan̄ oro.

“Ke ibọrọ ami mma mbụp enye nte: ‘Ete, nte afo ama ede idap mfọn mfọn ke okoneyo oro ekebede?’

“Enye ama ọbọrọ ete, ‘Ih, eyen mi, mma nde ke dọkta ama ọkọnọ mi ibọkidap.’

“‘Nte afo okodu ikpọn̄ ke adan̄aemi ekedede idap?’

“‘Baba, ami n̄kodụhe ikpọn̄. Akpakam ami nside idap kpukpru ini, koro adan̄aoro ami ndikopke ubiak ndomokiet.’”

A. H. Macmillan ndien ama okot Job 14:13-15 ye Job 3:17-19 ọnọ ete esie onyụn̄ ọdọhọ ete: “Ntre afo omokụt, ete, mme akpan̄kpa ẹdu ke idap n̄kpa inyụn̄ ifiọkke baba n̄kpọ kiet ke adan̄aemi mmọ ẹdude ke idaha oro, ntre didie ke mmọ ẹkeme ndidu ikpọn̄?”

Nso uforo uforo ukpepn̄kpọ ke emi ekedi ntem! Edieke afo edide kiet ke otu Mme Ntiense Jehovah, afo n̄ko emekeme ndikama n̄wed Abasi ye mme uwụtn̄kpọ nditụk ekikere ye esịt.

Ndikụt Mme Uwụtn̄kpọ

Edi m̀mọ̀n̄ ke afo ekeme ndikụt mme uforo uforo uwụtn̄kpọ m̀mê mme ifiọkutom edide ata-mbụk-ke-uwem? Afo emekeme ndida ediwak mmọ nto ọkpọkpọ ifiọkutom fo oro enyenede. Ke uwụtn̄kpọ, nte afo oyom ndiwụt mme edidiọn̄ otode mbuọtidem, odudu oro akam enyenede, m̀mê idatesịt oro odude ke utom ukwọrọikọ? Edieke afo edide Christian oro ama akayak idem ọnọ, anaedi afo eyekeme ndibụk nsio nsio n̄kpọntịbe ke uwem fo. Afo emekeme ndikop nti ifiọkutom ke mme mbonoesop m̀mê ke ini enemede nneme ye ekemmọ mme Christian. Mîdịghe afo emekeme ndikot ọnọ-nsịnudọn̄ ifiọkutom ke Yearbook of Jehovah’s Witnesses. Ke akpanikọ, Watch Tower Publications Index esinọ un̄wam ndikụt ifiọkutom oro ẹmịn̄de-mịn̄ otode ofụri ererimbot.

Didie ke afo ekeme ndibụk ifiọkutom uforo uforo? N̄kpọ kiet edi-o, ndinam ufan̄ odu ndikere n̄kpọ an̄wam fi ndimụm udọn̄ mme andikpan̄ utọn̄ nọ fi. Afo emekeme nditọn̄ọ ifiọkutom ke ndidọhọ ete: “Asiakusụn̄ kiet ama ekpep ke akpa ini nte Jehovah esikam ọdiọn̄de mbon oro ẹbuọtde idem ye enye.” Usọp usọp, mme andikpan̄ utọn̄ nnọ fi ẹyekere m̀mê mme edidiọn̄ ewe ke ọkwọrọikọ Obio Ubọn̄ uyọhọ-ini oro ekenyene. Kụt ete ke emetịn̄ ọnọ mmọ.

Domo ndibụk ifiọkutom ke ikọ idemfo. Nọ ọyọhọ mbụk, koro ndinam ntre adian odudu ke mbụk. Ke ndiwụt in̄wan̄în̄wan̄ ndise kaban̄a mme idaha oro okodude, afo nte ememde akan emekeme ndidemede esịt mme andikpan̄a uton̄ nnọ fi. Edi kụt ete ke afo usịnke idem ukaha ke unọ mbụk tutu mmọ ẹkpu ndifiọk ntak emi afo obụkde ifiọkutom oro. N̄ko, fep ikọ n̄kponinua, koro okposụkedi emi ekemede ndinam mbụk etie inem inem akan, enye ekeme ndinam ẹkûnịm fi ke akpanikọ. Ke ukem ntak oro, fep nditịn̄ ẹte ke ẹte m̀mê ndibụk ifiọkutom oro mûkemeke ndisọn̄ọ.

Ndinam Bible Enyene Uwem

Ẹkụt mme ifiọkutom oro ẹnọde ukpep ẹkan ke Bible ke idemesie. Ke uwụtn̄kpọ, yak idọhọ ke afo oyom ndiwụt eyen ukpepn̄kpọ Bible m̀mê otuowo nte ke nditọn̄wọn̄ ẹkeme ndida nnọ Jehovah Abasi. Afo emekeme ndibiere ndida mbụk ekpri eyenan̄wan oro owo mîsiakke enyịn̄ emi akasiande n̄wan Naaman aban̄a Elisha, prọfet Jehovah. Akpa, kot mbụk oro ke 2 Ndidem 5:1-5. Ndien afo emekeme ndibụp ete: “Afo ekere ke ekedi ọkpọsọn̄ n̄kpọ didie ọnọ eyenan̄wan emi ndimụm nsọn̄ọnda ke Abasi n̄kama ke idụt nsunsu utuakibuot? Nte ikoyomke uko man enye etịn̄ ikọ nte ẹkemede ndinịm aban̄a Jehovah ye prọfet esie?”

Mbemiso ndụn̄ọde ekeme ndin̄wam fi ndinam mbụk oro enyene uwem. Afo emekeme ndikụt ntọt oro enyenede ufọn ke idak mme ibuotikọ oro NAAMAN, SYRIA, ye ELISHA ke Watch Tower Publications Index. Mme itien̄wed oro ẹnyande ubọk ẹwụt efen ke New World Translation ẹkeme ndida fi nto mbụk oro ke 2 Ndidem n̄kosịm Psalm 148:12, 13, ke ebiet emi nnyịn ikotde ite: “N̄kparawa, ye nditọiban; n̄kaniren, ye nditọn̄wọn̄: yak mmọ ẹtoro enyịn̄ Jehovah: koro enyịn̄ esie ikpọn̄îkpọn̄ okon̄de; ubọn̄ esie emenede akan isọn̄ ye enyọn̄.” Nso n̄kpọ nsịnudọn̄ ke emi edi ntem ọnọ n̄kparawa owo nditịn̄ ikọ Abasi ye uko!—Utom 4:29-31.

Edieke afo edide Christian asan̄autom, ‘tịm kpeme se afo ekpepde owo’ ke afan̄ emi. (1 Timothy 4:16) Kûtịn̄ akpanikọ ikpọn̄îkpọn̄—nam enye an̄wan̄a. Nam mme mbụk Bible ẹdi akpan n̄kpọ ẹnyụn̄ ẹnyene se ẹwọrọde. Da mme ifiọkutom ye mme uwụtn̄kpọ oro ẹdotde. Ẹmi ẹdi mme usụn̄ ndisịm esịt.

[Mme Ikọ idakisọn̄]

[Ndise ke page 29]

Ukem nte Jesus, mme Christian asan̄autom eyomfịn ẹkeme ndida in̄wan̄în̄wan̄ uwụtn̄kpọ ndinọ etop mmọ nnyụn̄ nsịm esịt