Ọfọnido Akwa Owoekọn̄ Rome
IKPỌ mbonekọn̄ Rome ikesinyeneke eti enyịn̄ mfọnido. Ke ẹmekde ndida mbonekọn̄ ikie ẹmi ẹdiọkde ibuot un̄wanaekọn̄ usụn̄, akwa owoekọn̄ ekenyene ndidi ọdiọk-ibuot akwa owo oro ọnọde mbonekọn̄ ukpep, ọnọ-ntụnọ, ye, ke ndusụk ini, andiwot owo. Edi, Bible asian nnyịn akwa owoekọn̄ Rome eke udịmekọn̄ Augustus oro okowụtde apostle Paul ata ntatubọk ye mbọm. Nso idi enyịn̄ esie? Julius.
Bible etịn̄ eren emi ọnọ nnyịn ke Utom Mme Apostle ibuot 27. Apostle Paul ama esịn eben̄e ete Caesar okop n̄kpeubọk imọ ke Rome. Ntem, ẹma ẹyak Paul, adianade ye ediwak mbon-n̄kpọkọbi efen, ẹsịn ke ubọk “Julius, etubom udịmekọn̄ emi ekerede udịmekọn̄ Augustus.” Mmọ ẹma ẹdiere ẹto Caesarea, kpa obio esụk-mbehe ke edere edere edem usoputịn Jerusalem oro anamde n̄kpọ nte ibuot itieutom mbonekọn̄ Rome. Luke ewetmbụk eset oro ọdọhọ ete: “Ke ndan̄nsiere nnyịn idian ke Sidon; do Julius owụt Paul mfọnido, ayak enye aka ekese mme ufan esie, man idem atara enye.”—Utom 27:1-3.
Owo ikam itịn̄ke se ikonụkde Julius ndiwụt utọ mfọnido oro ke Bible. Ekeme ndidi Festus Andikara ọkọnọ enye ewụhọ oro ndinam n̄kpọ ye Paul ke san̄asan̄a usụn̄. Mîdịghe iso-ọfọn ke ama ekedi edifiọk ntak idaha oro akanamde ẹmụm Paul, ekeme ndidi Julius mmemmem mmemmem ama edima uko ye nsọn̄ọnda Paul. Ke idaha ekededi, etie nte Julius ama edifiọk nte ke Paul ikedịghe ikpîkpu owo n̄kpọkọbi.
Edi, Julius ama emek nditre ndikop ntọt Paul oro nte yak owo okûsio ọkpọn̄ Eti Itie-Uduọk-Ukwak. Ikebịghike ofụm ọkpọsọn̄ oyobio ama omụm ubom oro anamde etie nte ke enye eyebak ke utan ke mbenesụk edem edere Africa. (Utom 27:8-17) Ke ufọt akwa oyobio emi, Paul ama adaha ada onyụn̄ ọn̄wọn̄ọ ọnọ mbonisan̄ oro ẹkekopde ndịk mi ete ke ‘uwem mmọ baba kiet iditakke, edi ubom ikpọn̄ editak.’ Kpa ye oro, ndusụk mme awat ubom oro ẹma ẹdomo ndifehe. Paul adan̄aoro ama ọdọhọ Julius ete: “Edieke mmọemi mîsọn̄ọke itie ke ubom, mbufo idikemeke ndibọhọ.”—Utom 27:21, 22, 30, 31.
Isan̄ enyeemi, Julius ama emek ndikop uyo Paul, ndien ẹma ẹkpan edifehe oro mme awat ubom oro ẹkeyomde ndifehe. Nte Paul ekebemde iso etịn̄, iso ubom oro ama atuak ke isọn̄ onyụn̄ owụre. Ke ẹkopde ndịk ẹte ke ndusụk mbon-n̄kpọkọbi ẹkeme ndifehe, mbonekọn̄ ẹma ẹduak ndiwot kpukpru mmọ. Inikiet efen, nte ededi, Julius ama esịbe odụk onyụn̄ ọbiọn̄ọ ikọt esie, ke ntem anyan̄ade uwem Paul.—Utom 27:32, 41-44.
Bible isianke nnyịn se ikotịbede inọ ọfọnido akwa owoekọn̄ emi m̀mê enye ke akpatre ama edinyịme mbuọtidem Christian. Sededi mfonido oro enye okowụtde ekedi ediwụt mme utom ubieresịt oro Abasi ọnọde. (Rome 2:14, 15) Mme Christian, nte ededi, ẹka anyan ẹkan ediwụt mfọnido eke owo ẹnyụn̄ ẹwụt mfọnido ebietde eke Abasi oro osụn̄ọde ke ndinyene spirit Abasi. (Galatia 5:22) Ke akpanikọ, edieke okpono ndem owoekọn̄ oro mîkọfiokke Abasi ekekemede ndiwụt mfọnido, adan̄a didie akan oro ke okponụk ikọt Abasi ndinam ntre!