Mme Mbụme Ẹtode Mme Andikot

◼Ntak emi ẹdade 29 C.E. nte akpan usenọfiọn̄ ke mbụk Bible utu ke 14 C.E., kpa ntọn̄ọ ini ukara Tiberius Caesar, emi ẹsiakde ke Luke 3:1?

Owo isiakke ntọn̄ọ ini ukara Tiberius ke Bible, edi ẹsiak n̄kpọntịbe oro akadade itie ke utịt utịt ikpehe ọyọhọ isua ubọn̄ esie 15. Emi anam nditọ ukpepn̄kpọ Bible ẹnịm n̄kpọntịbe oro nte se ikadade itie ke 29 C.E, emi ẹkemede ndida nte akpan usenọfiọn̄ ke ekikere Bible.

Ẹnyịme ubọn̄ udiana andikara Rome, Tiberius Caesar, ke mbụk. The New Encyclopædia Britannica ọdọhọ ete: “Ke AD 14, ke August 19, Augustus [akpa andikara] ama akpa. Tiberius, kemi edide akakan, ama ebre n̄kari ye akwa Ufọkmbet inyụn̄ iyakke ẹkot enye andikara ke se ikperede ndisịm ọfiọn̄ kiet, edi ke September 17 enye ama akabade edi ata akpan owo.”a

Ini emi ẹnịmde nte ntọn̄ọ ukara Tiberius mi ekem ye Bible koro Luke 3:1-3 etịn̄ aban̄a utom John Andinịm owo baptism ete: “Ke ọyọhọ isua efụt emi Tiberius Caesar adade ubọn̄, ke ini Pontius Pilate edide andikara Judea, . . . Uyo Abasi osịm John eyen Zechariah ke desat. Ndien enye asan̄a ke ofụri n̄kann̄kụk Jordan edikwọrọ baptism edikabade esịt, man ẹfen mme idiọkn̄kpọ.”

John ikọtọn̄ọke ukwọrọikọ ye edinịm owo baptism ke ini Tiberius ekedide andikara edi akanam ntre “ke ọyọhọ isua efụt emi Tiberius Caesar adade ubọn̄.” Ọyọhọ isua 15 oro ọkọtọn̄ọ ke ini idọk eke 28 C.E. osịm ini idọk eke, 29 C.E. Ndifiọk emi, nte ededi, iyakke owo ekeme ndibiere ata nnennen nnennen ini emi utom John ọkọtọn̄ọde ke isua oro m̀mê ndibat mme n̄kpọntịbe eken oro ẹnyenede ebuana.

Edi Bible ọnọ nnyịn akpan ntọt efen. Ke uwụtn̄kpọ, prọfesi Daniel eke “urua ata ye duop” ama anyan ubọk owụt 29 C.E. nte isua oro Messiah ediwụtde idem. Enye n̄ko ama owụt ete ke utom Jesus edibịghi ke isua ita ye ubak. (Daniel 9:24-27) Adianade ye ọyọhọ mbụk Bible ita emi: Jesus akamana ọfiọn̄ itiokiet ke John ama akamana; ke ini Jesus akanade baptism, enye “[ekedi] n̄kpọ nte isua edịp-ye-duop”; ndien Jesus akakpa ke ini utọ eke 33 C.E. (ini Passover), ke ini enye ekedide isua 33 1/2.—Luke 1:24-38; 3:23; 22:14-16, 54.b

Ye akpan ntọt Bible ntre, adianade ye usenọfiọn̄ ererimbot eke ukara Tiberius, nditọ ukpepn̄kpọ Bible ẹkeme ndibat nte ke utom John ọkọtọn̄ọ ke ini utọ eke 29 C.E. ye nte ke ọfiọn̄ itiokiet ke ukperedem, ke ini idọk eke 29 C.E., John ama onịm Jesus baptism. Ntem, idịghe 14 C.E. edi 29 C.E. ke ẹda nte akpan usenọfiọn̄ ke ekikere Bible.

[Mme Ikọ idakisọn̄]