Ndidọk Mme Andituak Ibuot
ẸMA ẹnọ apostle John n̄kukụt aban̄ade mme n̄kpọntịbe ẹmi ẹdinyen̄ede ererimbot oro ẹdidade itie ke “usen Ọbọn̄.” Enye ama okụt Ọbọn̄ Jesus Christ eke heaven awatde ọwọrọ aka edinen ekọn̄, oro afia ayara enan̄-mbakara adade aban̄a—edi “edikan, onyụn̄ ọdọdiọn̄ akan.” Akpa n̄kpọ oro enye anamde edi ndisio akwa asua Abasi oro, Satan, ke heaven nduọk mi ke isọn̄. Satan adaha iyatesịt ke ndinọmọ ubonowo ye nsobo, akan̄, ye udọn̄ọ oro akanam mîdaha itie, ẹmi mme ndamban̄a awat enan̄-mbakara ye mme enan̄-mbakara mmọ ẹdade ẹban̄a—ididuot, obubịt, ye ntọn̄ntọn̄ ke uduot. (Ediyarade 1:10; 6:1-8; 12:9-12) Afanikọn̄ ẹmi ẹkebemiso ẹsiaha ke 1914 ndien ọmọdọk toto ke ini oro. Ibịghike, mmọ ẹyesịm utịt ke se Jesus eketịn̄de aban̄a nte “akwa ukụt . . . , orụk eke akanam mîdụhe toto ke editọn̄ọ ererimbot tutu osịm emi, eke mîdinyụn̄ idụhe aba.”—Matthew 24:3-8, 21.
N̄kpọ editie didie ye mme andituak ibuot nnọ Jehovah ke ini oro? Ediyarade ibuot 7, ufan̄ikọ 1 osịm 10, etịn̄ aban̄a udịmekọn̄ ẹdide mme angel oro ‘ẹmụmde’ ofụm nsobo ẹkama tutu ẹtan̄ mme andituak ibuot ẹmi ẹbok. Ke ikpehe ini oro ọtọn̄ọde ke 1914, ẹmetan̄ akpatre ke otu mbon Israel eke spirit, ẹdide owo 144,000, ẹbok. Ndien ekem “sese, akwa otuowo, eke baba owo kiet mîkemeke ndibat, eke ẹtode ke kpukpru obio ye esien ye idụt ye usem.” Akwa otuowo emi ama ososịm ediwak miliọn. Mmọ ẹda ke eti idaha ke iso ebekpo Abasi ke ntak ẹwụtde mbuọtidem ke iyịp ufak Jesus, oro ẹkewotde nte eyenerọn̄ oro mîduehe. “Mmọ ẹnyụn̄ ẹfiori ke ọkpọsọn̄ uyo, ẹte, Yak edinyan̄a enyene Abasi nnyịn emi etiede ke ebekpo, onyụn̄ enyene Eyenerọn̄.” Ifịk ifịk mme andituak ibuot ẹmi ẹkaiso ndidọhọ mmọ en̄wen ẹmi n̄ko ẹtan̄de ẹbok kaban̄a edinyan̄a mbe “akwa ukụt” ẹte “Di.”—Ediyarade 7:14-17; 22:17.
“Ke Ofụri Isọn̄”
Ẹkeme nditịn̄ mban̄a ifịk ifịk mme andituak ibuot ẹmi ẹte: “Uyom mmọ ọmọwọrọ ke ofụri isọn̄, ikọ mmọ onyụn̄ osịm utịt ererimbot.” (Rome 10:18) Ẹmediọn̄ ubọkutom mmọ ye utịbe utịbe mbun̄wụm. Ke uwụtn̄kpọ:
Mexico idahaemi ọtọt ifịk ifịk mme andituak ibuot nnọ Jehovah 335,965, kpa se ikperede ndidi n̄kọri eke tọsịn ikie ke n̄kpasịp isua ita! Ntak utọ akwa n̄kọri oro? Mbụk etienede mi ekeme ndin̄wam ndinam an̄wan̄a. Akparawa kiet ekerede Aurelio ekedi ekpeme ufọkederi Catholic. Kpukpru ini ekededi Mme Ntiense Jehovah ẹkesidụkde obio-in̄wan̄ oro, enye ama esimia n̄kanika ufọkederi man ọbiọn̄ọ owo ekededi ndikpan̄ utọn̄ nnọ mmọ. Nte ini akade enye ama edep Jerusalem Bible eke mbon Catholic onyụn̄ ọtọn̄ọ ndikot enye, edi ikan̄wan̄ake enye. Ekem usen kiet enye ama okụt ufan kiet nte akamade New World Translation. Aurelio ama asua ọnọ ufan esie, ndien ke ọdọhọde enye ete ke Bible oro edi nsunsu, ama ada enye aka ufọk esie ndiwụt enye “ata” Bible. Ufan esie ama ọdọhọ ete: “Kot Exodus 20,” ndien ekem enye ọnyọn̄.
Ke ọtọn̄ọde ye ibuot 1, ekpeme ufọkederi oro ama okot Exodus osụhọde tutu edisịm ke Ex ibuot 20, ufan̄ikọ 4 ye 5. Se Bible mbon Catholic esie eketịn̄de aban̄a ndisọi mbiet ama akpa enye idem. Ke Mass okụrede ke Sunday oro eketienede, enye ama ada itien̄wed oro aban̄ade ndisọi mbiet do ebịne oku. Ke akpa oku oro ọkọdọhọ ke imọ ke idem imọ n̄kukụre ikpokpono ndisọi mbiet oro; ituakke-tuak ibuot inọ mmọ. Ke okụtde ete ke emi ikoyụhọke Aurelio, oku oro ama odori enye ikọ ete ke ekpep n̄kpọ ye Mme Ntiense Jehovah. Aurelio ama afan̄a emi edi adian do ete, “Kemi ami nnyekpep!”
Isan̄ efen emi Mme Ntiense ẹkedide obio-in̄wan̄ oro, Aurelio ama okosobo ye mmọ onyụn̄ ọtọn̄ọ ndikpep Bible ye mmọ. Enye ama ọkpọn̄ utom ufọkederi oro ndien ke ọfiọn̄ ita ama odot ndibuana ke an̄wan̄wa utom ukwọrọikọ ye Mme Ntiense Jehovah. Akpa ufọk oro enye akawahade ekedi eke oku oro, emi okodude ke n̄kpaidem ke ini enye okokụtde akani ekpeme ufọkederi oro ke utom ọkwọrọikọ Obio Ubọn̄. Oku oro ama edịghe enye ye ikọ edidianade nsan̄a, edi Aurelio ama ọdọhọ enye ete ke oro ididịghe se ẹyomde sia imọ ima ikọkpọkpọn̄ ufọkederi oro. Uko uko edinam esie ama esịn udọn̄ ọnọ ediwak mbon obio-in̄wan̄ oro, ẹmi ẹma ẹkekpekpep n̄kpọ ye Mme Ntiense Jehovah. Aurelio ye owo 21 efen ke obio-in̄wan̄ oro ẹma ẹna baptism ke mbono district oro eketienede. N̄kọri ama ọsọp ke ikpehe emi tutu eyedi se ebiowo kiet kpọt okodude ndidụn̄ọde mme mbụme mbon oro ẹyomde ndina baptism ye otu emi.
“Uyom Mmọ Ọmọwọrọ”
Edifehe mbọhọ ukwọrọikọ Obio Ubọn̄ idụhe. Owo Catholic kiet otode Italy ama esikop iyatesịt ke kpukpru ini oro Mme Ntiense Jehovah ẹwahade ẹtiene enye. Ntem ke ini usiakifia esie ọkọnọde enye aka Singapore, enye ama ekere ete ke akpatre ke mmọ idifịnake imọ aba. Edi ke n̄kpaidem esie, Mme Ntiense ẹma ẹdu do n̄ko. Ntem enye ama edep idat idat ebua iba man ẹsibịne Mme Ntiense oro ẹdide. Ke ini Ntiense iba ẹkewahade ufọk esie, ebua oro ẹma ẹwọn̄ọ ẹdi. Ke ẹkopde ndịk, iban ẹmi ẹma ẹfehe kaban̄a uwem mmọ, ẹkade nsio nsio afan̄ ke n̄wan̄a usụn̄. Nte kiet ke otu ebua oro okosịmde enye, kiet ke otu Mme Ntiense oro ke mbrenyịn ama osion̄o n̄kpri n̄wed iba ke ekpat esie onyụn̄ ọdọn̄ mmọ ke inua ebua oro akanade in̄wan̄. Ke emi, ebua oro ama etre ndibịne enye, ọwọn̄ọde efehe ọnyọn̄ ufọk.
Ke urua oro eketienede, Ntiense iba oro ke ẹkenam mfiakn̄ka ke ufọk oro okodude ke edemusụn̄ efak oro. Enyene ebua oro okodu ke in̄wan̄esa esie, ndien, ke n̄kpaidem, enye ama ọkọm iban oro onyụn̄ okot mmọ ẹdụk ẹdi ufọk esie. Enye ama asian mmọ ete ke akanam imọ inyeneke nneme ye Mme Ntiense Jehovah m̀mê ndikot n̄wed mmọ ekededi. Edi ke imọ ima idu ke n̄kpaidem ndikụt n̄kpri n̄wed oro ke inua ebua imọ kiet. Ke mbubịteyo oro enye ama okot n̄kpri n̄wed oro onyụn̄ enen̄ede okop idatesịt aban̄a mmọ. Okposụkedi enye ekedide owo Catholic ke ofụri eyouwem esie, enye ama owụt udọn̄ ndikpep n̄kpọ ye Mme Ntiense Jehovah.
Sia ẹkenọde eren oro afiak aka Italy, ẹma ẹnam ndutịm Mme Ntiense Jehovah ndikpep n̄kpọ ye enye do. Nte enye ye n̄wan esie ẹketọn̄ọde ndidụk mme mbonoesop, oku n̄kann̄kụk oro ke iyatesịt ama edịghe mmọ uwem. Ke ini owo ekesịnde ikan̄ ke in̄wan̄esa mmọ, ebe ye n̄wan emi ẹma ẹsịbe kpukpru ebuana mmọ ye ufọkederi oro ẹfep. Eren emi kemi ọdọhọ ete: “Ami mma ntọtọn̄ọ ndinọ ediwak owo ke ubon mi ikọ ntiense koro nnyom ndinam mmọ ẹfiọk ẹte ke Jehovah edi n̄kukụre ata Abasi.”
“Osịm Utịt Ererimbot”
Ifiọkutom efen otode nsannsan ikpehe isọn̄ owụt nte ẹwụtde esịtekọm ẹban̄a etop Obio Ubọn̄ onyụn̄ an̄wamde ke ndikpụhọde uwem mme owo. Ke adan̄aemi okodụkde ndutịm ukpepn̄kpọ iban idịbi, Ntiense kiet ke Australia ama osobo ye n̄wan emi enyenede ediwak ndiọi edu, idem esịnde nditre un̄wọn̄ sika ke ini asan̄ade ye idịbi. Edu esie ama afịna Ntiense emi etieti. Mmọ mbiba ẹkediman nditọ ke ukem ini ye ke ukem ubet ke ufọkibọk, ntre mmọ ẹma ẹnyene ifet ndinyene nneme. Eketie nte ke n̄wan oro ama enyene ediwak mfịna ke ini ekedide ekpri eyen, ndien kemi ndọ mmọ ama ekpere ndibiara. Ntre, ke ẹma ẹkekpọn̄ ufọkibọk, Ntiense oro ama awaha etiene n̄wan oro onyụn̄ ọtọn̄ọ ukpepn̄kpọ Bible ye enye, akamade n̄wed Ndinam Uwem Ufọk Fo Enem.
Ebe an̄wan emi ama esibọn̄ akam ọnọ Abasi ete anam imọ ikụt ido ukpono akpanikọ, adiande ikọ emi ete: “Ama akam edi enye idịghe Mme Ntiense Jehovah!” Edi, ke ini enye ọkọfiọkde ete ke n̄wan esie ke ekekpep n̄kpọ ye Mme Ntiense, enye ama ọtọn̄ọ ndibụp mme mbụme ndien ẹma ẹnọ enye ikot nditiene mbuana ke ukpepn̄kpọ oro. Enye ama anam emi, ndien ikebịghike enye ama ọtọn̄ọ ndidụk mme mbonoesop. Idahemi ebe ye n̄wan oro ẹma ẹna baptism, ndien nte an̄wan̄ade idaha ndọ mmọ emenyene ukpụhọde akamba akamba.
Mme ukpepn̄kpọ Bible oro ẹkọn̄ọde ke mme utọ n̄wed ntre ẹmesụn̄ọ ke nditan̄ ediwak mbufa mme andituak ibuot mbok. Ke mme idụt oro Mme Ntiense Jehovah ẹnyenede ndiyọ ye mme en̄wan ukpụhọ ukara, ekọn̄ mbio obio, m̀mê mme ukpan ẹtode ukara, edinam ukpepn̄kpọ Bible ọmọkọri. Ẹma ẹn̄wana ekọn̄ mbio obio ke Angola ke ediwak isua, ndien Mme Ntiense ẹma ẹsobo ekese ukọbọ ye nsọn̄ọn̄kpọ. Ke ntọn̄ọ ntọn̄ọ isua oko, ibatutom owụt ete, ke ẹbaharede ukem ukem, asuanetop kiet kiet ama onịm n̄kpọ nte ukpepn̄kpọ Bible ita, edi mme asuanetop oro ẹkenyene esisịt n̄wed Bible. Mme esenyịn ẹsan̄ade-san̄a ẹma ẹsika ẹkese n̄kpri otu ke usen kiet kiet, ẹdiomide utom an̄wautom ke usenubọk ye mme mbonoesop ke mbubịteyo kiet kiet. Nso n̄kpọ idatesịt ke ekedi ntem ke ini ekọn̄ oro okokụrede ndien ẹnọde mme n̄wed Bible oro ẹketịmde ẹyom emi odobide tọn 42 oto South Africa edi! Ke akpanikọ, ima nditọete oro “[eye]dọdiọn̄ awak ke ifiọk ye kpukpru ikike,” nte mmọ kemi ẹkemede “ndidomo mfiọk se ifọnde ikan.” (Philippi 1:9, 10) Nso n̄kpọ nsịnudọn̄ ke edi ntem ọnọ mbon oro ẹnyenede ediwak n̄wed un̄wam ukpep Bible ke ubọk ndida ifet oro Jehovah ke mfọn anamde odu nnam n̄kpọ!—1 Timothy 4:15, 16.
Inemesịt mme anam-akpanikọ andituak ibuot ẹmi eti nnyịn mme ikọ Jesus ke Ukwọrọikọ oro ke Obot: “Inemesịt odu ọnọ mmọ oro ẹnyenede udọn̄ ke n̄kpọ eke spirit, sia obio ubọn̄ heaven enyene mmọ. . . . Inemesịt odu ọnọ mmọ oro ẹkọbọde ke ntak edinen ido, sia obio ubọn̄ heaven enyene mmọ, . . . Ẹdat esịt ẹnyụn̄ ẹfrọ ke ntak idara, sia utịp mbufo ke heaven omokpon.” (Matthew 5:3-12, NW) Nso idọk ke ẹdọk ntem ke Angola!
Ke mme ikpehe efen ke ererimbot, ẹmesụhọde ubọk mîdịghe ẹmemen ukpan ẹfep ke utom Mme Ntiense Jehovah. Jesus ama etịn̄ ke eyo esie ete: “Ke akpaniikọ idọk okpon, edi mme anamutom iwakke.” (Matthew 9:37) Emi edi akpanikọ mfịn didie ntem! Udọn̄ kaban̄a mme anamutom efen efen esidu kpukpru ini! Nnyịn imadat esịt nte ke utuakibuot nnyịn abuana idọk. Idụhe idatesịt oro okponde akan emi oro ẹkemede ndikụt ke isọn̄ mfịn akan utom uyakidem emi on̄wụmde mfri oro inamde inọ Jehavah Abasi.
Nte ededi, nso inụk mme andituak ibuot nnọ Jehovah ndinyene utọ idatesịt ye ifịk oro? Nnyịn iyokụt.